2020 جىلى ايتىلعان ءبىر ۇسىنىس بۇگىن حالىقارالىق ۋنيۆەرسيتەتكە جول اشتى

 كەيدە ءبىر يدەيا العاش ايتىلعان كەزدە بىردەن قولداۋ تابا بەرمەيدى. بىراق ۋاقىت وتە كەلە ونىڭ ەل دامۋى ءۇشىن قانشالىقتى ماڭىزدى ەكەنى ايقىندالا باستايدى.

2020 جىلدىڭ كوكتەمىندە مەن استانا قالاسىنان پەتروپاۆلعا قونىس اۋدارىپ، ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنە جۇمىسقا كەلدىم. سول كەزدە كوپشىلىككە توسىن كورىنگەن ءبىر ۇسىنىستى اشىق تۇردە كوتەرگەن ەدىم.

ول – پەتروپاۆلداعى قوزىباەۆ ۋنيۆەرسيتەتىن حالىقارالىق دەڭگەيگە كوتەرۋ كەرەك دەگەن باستاما.

بۇل يدەيا كەزدەيسوق تۋعان جوق. ۇزاق جىلدار بويى ۋنيۆەرسيتەتتەردە گەوبرەندينگ پانىنەن ءدارىس بەرىپ، ايماقتاردىڭ دامۋى مەن باسەكەگە قابىلەتتىلىگى كوبىنە ءبىلىم مەن عىلىمنىڭ ساپاسىنا تاۋەلدى ەكەنىن جاقسى ءتۇسىندىم.

سوندىقتان دا 2020 جىلى وسى باستامانى جاريا تۇردە كوتەرىپ، قوزىباەۆ ۋنيۆەرسيتەتىنە حالىقارالىق مارتەبە بەرۋ ماسەلەسىن كۇن تارتىبىنە شىعارۋعا تىرىستىم. العاشىندا بۇل ۇسىنىسقا ءارتۇرلى كوزقاراس بولدى. كەيبىرەۋلەر قولدادى، ال كەيبىرەۋلەر كۇمانمەن قارادى.

الايدا ۋاقىت وتە كەلە بۇل يدەيا قوعامدا قىزۋ تالقىلانىپ، مەملەكەت دەڭگەيىندە ءمان-ماڭىز بەرىلە باستادى. ناتيجەسىندە قوزىباەۆ ۋنيۆەرسيتەتىنىڭ حالىقارالىق دەڭگەيگە كوتەرىلۋى تۋرالى باستاما ەلدىڭ جوعارى بيلىگىنىڭ نازارىن وزىنە اۋدارتىپ، ناقتى مەملەكەتتىك شەشىمدەر قابىلدانۋىنا تۇرتكى بولدى.

بۇگىنگى كۇنى قوزىباەۆ ۋنيۆەرسيتەتى اقش-تاعى اريزونا ۋنيۆەرسيتەتىمەن ستراتەگيالىق سەرىكتەستىك ورناتىپ، حالىقارالىق ءبىلىم مەن عىلىم كەڭىستىگىنە سەنىمدى قادام جاساپ وتىر.

سونىڭ ناتيجەسىندە ۋنيۆەرسيتەت QS World University Rankings 2026 الەمدىك رەيتينگىنە العاش رەت ەندى. بۇل – ەلىمىزدىڭ سولتۇستىگىندە جوعارى ءبىلىم مەن عىلىمنىڭ جاڭا دەڭگەيگە كوتەرىلىپ كەلە جاتقانىنىڭ ايقىن دالەلى.

سوڭعى جىلدارى ۋنيۆەرسيتەتتىڭ حالىقارالىق بايلانىستارى كەڭەيىپ، ەۋروپا مەن ازيانىڭ بىرقاتار جەتەكشى ۋنيۆەرسيتەتتەرىمەن عىلىمي ىنتىماقتاستىق ورنادى.

عالىم رەتىندە مەن دە وسى حالىقارالىق عىلىمي بايلانىستاردىڭ قالىپتاسۋىنا ءوز ۇلەسىمدى قوسقانىمدى ۇلكەن ماقتانىش دەپ سانايمىن.

ەندى ەلىمىز ءۇشىن تاعى ءبىر ماڭىزدى تاريحي كەزەڭ كەلىپ وتىر.

2026 جىلعى 15 ناۋرىزدا قازاقستاندا جاڭا كونستيتۋتسيا بويىنشا رەسپۋبليكالىق رەفەرەندۋم وتەدى.

جاڭا كونستيتۋتسيا – بۇل جاي عانا قۇقىقتىق قۇجات ەمەس. بۇل – مەملەكەت، قوعام جانە ازامات اراسىنداعى جاڭا قوعامدىق كەلىسىم.

ونىڭ نەگىزگى ماقساتى:

– ادام قۇقىقتارى مەن بوستاندىقتارىن باستى قۇندىلىق رەتىندە بەكىتۋ;

– مەملەكەتتىك ورگانداردىڭ قوعام الدىنداعى جاۋاپكەرشىلىگىن ارتتىرۋ;

– ساياسي ينستيتۋتتاردىڭ تەڭگەرىمدى جۇمىسىن قامتاماسىز ەتۋ;

– ءححى عاسىردىڭ تسيفرلىق قوعامىنىڭ تالاپتارىنا ساي باسقارۋ جۇيەسىن قالىپتاستىرۋ.

سونىمەن بىرگە جاڭا كونستيتۋتسيادا ءبىلىم، عىلىم، مادەنيەت جانە يننوۆاتسيا ەل دامۋىنىڭ نەگىزگى تىرەكتەرىنىڭ ءبىرى رەتىندە ەرەكشە اتاپ كورسەتىلەدى.

بۇل – بولاشاق ۇرپاقتىڭ ساپالى ءبىلىم الىپ، ادىلەتتى ءارى اشىق قوعامدا ءومىر سۇرۋىنە باعىتتالعان ستراتەگيالىق قادام.

مەن بارلىق وتانداستارىمدى 2026 جىلعى 15 ناۋرىزدا وتەتىن رەسپۋبليكالىق رەفەرەندۋمعا بەلسەندى قاتىسىپ، ەلىمىزدىڭ جاڭا كونستيتۋتسياسىنا داۋىس بەرۋگە شاقىرامىن.

ءبىزدىڭ تاڭداۋىمىز – ەلىمىزدىڭ بولاشاعى.

كونستيتۋتسيا – مەملەكەتتىڭ ىرگەتاسى، ال رەفەرەندۋم – سول ىرگەتاستى بىرگە قالايتىنىمىزدى كورسەتەتىن تاريحي مۇمكىندىك.

مىرزانتاي قوجابايۇلى جاقىپ،

ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ پروفەسسورى.

 Abai.kz