مەمقىزمەتشىلەردىڭ جالاقىسى 2029 جىلدا ءوسۋى مۇمكىن
يندەكساتسيالاۋ – مەملەكەتتىك قىزمەتشىلەر ءۇشىن 2029 جىلدان باستاپ كوزدەلىپ وتىر.
ءماجىلىس دەپۋتاتى قاراقات ابدەن مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقبايعا مەملەكەتتىك قىزمەتشىلەردىڭ جالاقىسىن يندەكستەۋ كەزىندە قانداي ناقتى كورسەتكىشتەر نەگىزگە الىناتىنى تۋرالى سۇراق قويدى.
دەپۋتات اتاپ وتكەندەي، قازىرگى ۋاقىتتا مەملەكەتتىك قىزمەتتىڭ تارتىمدىلىعىن ارتتىرۋ جانە مىقتى بىلىكتى مامانداردىڭ مەملەكەتتىك قىزمەتتەن كەتۋىن ازايتۋ ماسەلەسى وزەكتى بولىپ وتىر.
– بۇگىنگى تاڭدا ەڭ ۇلكەن ماسەلەلەردىڭ ءبىرى – جالاقى. وكىنىشكە وراي، قازىرگى كەزدە مەملەكەتتىك قىزمەتكەرلەردىڭ جالاقىسى ينفلياتسيا دەڭگەيىنەن ارتتا قالىپ وتىر. سونىڭ سالدارىنان بىلىكتى ماماندار جەكە سەكتورعا كەتىپ جاتىر، – دەدى قاراقات ابدەن.
ول سونداي-اق زاڭ جوباسىنا سايكەس مەملەكەتتىك قىزمەتشىلەردىڭ لاۋازىمدىق جالاقىسى كەمىندە ءۇش جىلدا ءبىر رەت يندەكساتسيالانۋى ءتيىس ەكەنىن اتاپ ءوتتى.
– بۇل وتە دۇرىس قادام، مەن ونى قولدايمىن. كەزەڭ-كەزەڭىمەن يندەكساتسيالاۋ جەرگىلىكتى جەرلەردە جاڭا بىلىكتى جانە ماقساتشىل قىزمەتكەرلەردى ساقتاپ قالۋعا كومەكتەسەدى جانە ۇلكەن موتيۆاتسيا بەرەدى، – دەدى دەپۋتات.
سونداي-اق، قاراقات ابدەن يندەكساتسيا كەزىندە قانداي كورسەتكىشتەر نەگىزگە الىناتىنىن سۇرادى.
– يندەكساتسيالاۋ – مەملەكەتتىك قىزمەتشىلەر ءۇشىن 2029 جىلدان باستاپ كوزدەلىپ وتىر. زاڭ جوباسىندا كورسەتىلگەندەي، قازىرگى تاڭدا بۇل يندەكساتسيا مەملەكەتتىك جوسپارلاۋ جونىندەگى ۋاكىلەتتى ورگان ارقىلى جۇزەگە اسادى. ماقسات – مەملەكەتتىك قىزمەتشىلەردىڭ جالاقىسى جەكە سەكتورمەن باسەكەگە قابىلەتتى بولۋىن قامتاماسىز ەتۋ. وسىعان بايلانىستى زاڭعا وزگەرىستەر ەنگىزىلىپ جاتىر، - دەپ جاۋاپ بەردى دارحان جازىقباي.
Abai.kz
