قازاقستاندا ەلەكتر قۋاتىن ءوندىرۋ مەن تۇتىنۋ اراسىنداعى الشاقتىق قىسقارىپ كەلەدى. بۇل جونىندە قر ەنەرگەتيكا مينيسترلىگى رەسمي ساۋالىمىزعا جولداعان جاۋابىندا مالىمدەدى.

مينيسترلىكتىڭ حابارلاۋىنشا، 2025 جىلى 123,1 ملرد كۆت/ساع ەلەكتر ەنەرگياسى ءوندىرىلدى. ونىڭ 8,6 ملرد كۆت/ساع جاڭارتىلاتىن ەنەرگيا كوزدەرى وبەكتىلەرى ارقىلى الىنعان. ال قولدانىلعان ەلەكتر قۋاتى كولەمى — 124,6 ملرد كۆت/ساع. دەمەك، بىلتىر 1,5 ملرد كۆت/ساع ەنەرگيا سىرتتان يمپورتتالعان.

— ەلىمىزدە ەلەكتر ەنەرگياسىن ءوندىرۋ مەن تۇتىنۋ كولەمى اراسىنداعى الشاقتىقتى قىسقارتۋدىڭ تۇراقتى ءۇردىسى بايقالادى، بۇل وتكەن جىلدارمەن سالىستىرعاندا الشاقتىقتىڭ تومەندەگەنىن كورسەتەدى: 2023 جىلى — 2,2 ملرد كۆت/ساع، 2024 جىلى — 2 ملرد كۆت/ساع، 2025 جىلى — 1,5 ملرد كۆت/ساع، — دەلىنگەن حابارلامادا.

سونداي-اق 2026 جىلدىڭ 9 ناۋرىزىنداعى جاعداي بويىنشا 25,8 ملرد كۆت/ساع ەلەكتر ەنەرگياسى ءوندىرىلىپ، ونىڭ 25,7 ملرد كۆت/ساع تۇتىنىلعان.

جالپى، ەلىمىزدىڭ وڭتۇستىك ايماقتارىندا ەلەكتر قۋاتى جەتىسپەۋشىلىگى بايقالادى. مينيسترلىكتىڭ مالىمەتىنشە، جامبىل، قىزىلوردا، تۇركىستان، جەتىسۋ وبلىستارى، سونداي-اق الماتى جانە شىمكەنت قالالارى ەنەرگيا جۇيەسىنىڭ تاپشىلىعىنا نەعۇرلىم بەيىم. ويتكەنى، ەنەرگيا كوزدەرىنىڭ باسىم بولىگى سولتۇستىك جانە باتىس وبلىستاردا.

— وڭتۇستىك ايماقتا ەلەكتر ەنەرگياسىنىڭ جەتىسپەۋشىلىگى سولتۇستىك ايماقتان جەتكىزۋ ارقىلى قامتاماسىز ەتىلەدى، — دەلىنگەن رەسمي جاۋاپتا.

ايتا كەتەيىك، بۇعان دەيىن بيۋدجەتتىك ۇيىم نىساندارىنا كۇن پانەلدەرىنەن ەلەكتر ەنەرگياسىن الۋ مۇمكىندىگى بەرىلەتىنىن جازعانبىز.

Abai.kz