شارتتى ىسكە اسىرۋعا قازاقستان اتىنان باس پروكۋراتۋرا جاۋاپتى. سەناتتىڭ جالپى وتىرىسىندا قازاقستان مەن پەرۋ اراسىنداعى سوتتالعان ادامداردى بەرۋ تۋرالى شارت راتيفيكاتسيالادى.

قۇجاتتى سەناتور جاننا اسانوۆا تانىستىردى.

"شارتقا 2024 جىلعى 23 قازاندا استانا قالاسىندا قول قويىلدى. زاڭنىڭ نەگىزگى ماقساتى – باس بوستاندىعىنان ايىرۋعا سوتتالعان ادامداردى ولاردىڭ الەۋمەتتىك رەينتەگراتسياسىنا جاردەمدەسۋ ماقساتىندا وزدەرىنىڭ ازاماتتىعى بويىنشا تيەسىلى مەملەكەتتە جازاسىن ودان ءارى وتەۋ ءۇشىن بەرۋگە قۇقىقتىق نەگىز قۇرۋ. شارتقا سايكەس تاراپتار بەلگىلەنگەن جازانى ەكىنشى تاراپتىڭ اۋماعىندا وتەۋ ءۇشىن سوتتالعان ادامداردى بەرۋ سالاسىندا ىنتىماقتاستىقتى جۇزەگە اسىرۋعا مىندەتتەنەدى. سونداي-اق، سوتتالعانداردى بەرۋ ءۇشىن تالاپتار، بەرۋدەن باس تارتۋ نەگىزدەرى ايقىندالعان", – دەدى دەپۋتات.

سوتتالعان ادام كەلەسى شارتتار ساقتالعان جاعدايدا بەرىلۋى مۇمكىن:

• ەگەر ول قابىلداۋشى تاراپتىڭ ازاماتى بولسا;
• ۇكىم تۇپكىلىكتى بولىپ، ورىندالۋعا جاتاتىن بولسا;
• بەرۋ تۋرالى سۇراۋ سالۋدى العان كەزدە قالعان جازا مەرزىمى كەمىندە التى ايدى قۇراۋى ءتيىس;
• سوتتالعان ادام اۋىستىرۋ تۋرالى وتىنىشحاتپەن جۇگىنگەن كەزدە;
• ارەكەت نەمەسە ارەكەتسىزدىك ەكى تاراپتىڭ دا ۇلتتىق زاڭناماسىنا سايكەس قىلمىس بولىپ سانالسا;
• ەكى تاراپ تا سوتتالعان ادامدى بەرۋگە كەلىسۋى قاجەت;
• تولەم قابىلەتسىزدىگىن راستايتىن جاعدايلاردى قوسپاعاندا، سوتتالعان ادام ايىپپۇل تولەسە نەمەسە زالالدى وتەسە.

شارتتا سوتتالعان ادامدى بەرۋدەن باس تارتۋدىڭ نەگىزدەرى ناقتى ايقىندالادى. ەگەر بەرۋشى تاراپ ەگەمەندىككە، قاۋىپسىزدىككە، قوعامدىق تارتىپكە زالال كەلتىرۋى مۇمكىن نەمەسە ونىڭ ۇلتتىق زاڭناماسىنا قايشى كەلەدى دەپ ساناسا بەرۋدەن باس تارتىلۋى مۇمكىن.

شارتتى ىسكە اسىرۋعا جاۋاپتى بولىپ قازاقستان اتىنان باس پروكۋراتۋرا، ال پەرۋ تاراپىنان مەملەكەتتىك پروكۋروردىڭ ءوفيسى ايقىندالدى.

Abai.kz