الەمنىڭ 23 ەلىندە، سونىڭ ىشىندە اقش، ۇلىبريتانيا، گونكونگ جانە موزامبيكتە رەسمي تۇردە BA.3.2 دەپ اتالاتىن COVID-19-دىڭ جاڭا «تسيكادا» شتاممى انىقتالدى. دۇنيەجۇزىلىك دەنساۋلىق ساقتاۋ ۇيىمى (ددسۇ) بۇل نۇسقانى «باقىلاۋداعى» ساناتقا قوستى، بۇل ۆيرۋستىڭ حالىقارالىق دەڭگەيدە ءجىتى نازار اۋدارۋدى تالاپ ەتەتىنىن بىلدىرەدى، دەپ حابارلايدى Qaz365.kz..

نيۋ-يوركتەگى زەرتتەۋلەرگە سۇيەنگەن ماماندار جاڭا شتاممنىڭ ەرەسەكتەرگە قاراعاندا بالالارعا تەزىرەك جۇعاتىنىن بايقاعان. بۇعان بالالاردىڭ يممۋندىق جۇيەسىنىڭ بۇرىن-سوڭدى مۇنداي ۆيرۋستارمەن ءجيى بەتپە-بەت كەلمەگەنى سەبەپ بولۋى مۇمكىن. سونىمەن قاتار، «تسيكادا» ۆيرۋسىنىڭ اقۋىزى قاتتى مۋتاتسياعا ۇشىراعاندىقتان، ادامنىڭ يممۋندىق جۇيەسىنە ونى تانۋ جانە انتيدەنەلەر ارقىلى توسقاۋىل قويۋ قيىنعا سوعۋدا.

ۆيرۋسولوگتاردىڭ ايتۋىنشا، جاڭا شتاممنىڭ وزىنە ءتان ەرەكشە سيمپتومدارى جوق. ول ادەتتەگىدەي دەنە قىزۋىنىڭ كوتەرىلۋى، جوتەل، تاماق اۋرۋى، مۇرىننىڭ بىتەلۋى، شارشاعىشتىق جانە تىنىس الۋدىڭ قيىنداۋىمەن سيپاتتالادى. قازىرگى قولدانىستاعى ۆاكتسينالاردىڭ تيىمدىلىگى بۇل شتاممعا قارسى ءسال تومەندەۋى مۇمكىن، بىراق ساراپشىلار ولاردىڭ اۋرۋدى جەڭىل تۇردە وتكەرۋگە كومەكتەسەتىنىن ايتادى.

ددسۇ قازىرگى ۋاقىتتا «تسيكادانىڭ» قوعامدىق دەنساۋلىققا توندىرەتىن قاۋپى تومەن دەپ باعالاپ وتىر. جاڭا شتاممنىڭ اۋرۋحاناعا جاتقىزۋ نەمەسە ءولىم جاعدايلارىن كوبەيتكەنى تۋرالى ناقتى دەرەكتەر جوق. دەگەنمەن، 65 جاستان اسقان قارتتار مەن سوزىلمالى اۋرۋى بار جاندارعا ساقتىق شارالارىن ساقتاۋ ۇسىنىلادى.

Abai.kz