جاستار – ءاربىر مەملەكەت دامۋىنىڭ ەڭ بەلسەندى ءارى قوزعاۋشى كۇشى. ولار – ەلدىڭ ەرتەڭى، ۇلتتىڭ بولاشاعى. سوندىقتان ولاردىڭ دۇنيەتانىمى، ومىرلىك ۇستانىمى مەن قۇندىلىقتار جۇيەسى قوعامنىڭ كەلەشەگىن ايقىندايدى. وسى تۇرعىدان العاندا، جاستار ومىرىندەگى رۋحاني قۇندىلىقتاردىڭ ءرولى ەرەكشە ماڭىزدى. سەبەبى رۋحاني نەگىزى بەرىك جاس – كەز كەلگەن سىناققا توتەپ بەرە الاتىن، سانالى تاڭداۋ جاسايتىن ءارى ەلدىڭ دامۋىنا تۇرتكى بولاتىن كەمەل تۇلعا.

رۋحاني قۇندىلىقتار دەگەنىمىز – ادامنىڭ ىشكى دۇنيەسىن بايىتاتىن، ونى ىزگىلىككە، ادىلدىككە، مەيىرىم مەن ادامگەرشىلىككە جەتەلەيتىن قاسيەتتەر جيىنتىعى. وعان ار-وجدان، يماندىلىق، جاۋاپكەرشىلىك، ادالدىق، ۇلكەنگە قۇرمەت، كىشىگە قامقورلىق سەكىلدى ۇستانىمدار جاتادى. مۇنداي قۇندىلىقتار ادامدى تەك جەكە تۇلعا رەتىندە عانا ەمەس، قوعامنىڭ تولىققاندى مۇشەسى رەتىندە قالىپتاستىرادى.

بۇگىندە اقپاراتتىق كەڭىستىكتىڭ كەڭەيۋى، الەۋمەتتىك جەلىلەردىڭ ىقپالى جاستاردىڭ ساناسىنا ءارتۇرلى يدەيالار مەن كوزقاراستاردى ەركىن ءسىڭدىرىپ جاتىر. بۇل – ءبىر جاعىنان مۇمكىندىك بولسا، ەكىنشى جاعىنان ۇلكەن جاۋاپكەرشىلىك. سەبەبى كەز كەلگەن اقپارات پايدالى بولا بەرمەسى انىق. كەي جاعدايدا جاستار جات يدەولوگيالاردىڭ، تەرىس اعىمداردىڭ ىقپالىنا ءتۇسىپ قالۋى مۇمكىن. مۇنداي كەزدە رۋحاني يممۋنيتەتتىڭ ماڭىزى ارتا تۇسەدى. ال رۋحاني يممۋنيتەت – ءدال وسى قۇندىلىقتار ارقىلى قالىپتاسادى.

جاستاردىڭ ومىرىندە رۋحاني قۇندىلىقتاردىڭ ورنى ەرەكشە ەكەندىگىن وتباسى تاربيەسىنەن-اق بايقاۋعا بولادى. وتباسى – العاشقى تاربيە مەكتەبى. بالا ەڭ الدىمەن اتا-اناسىنىڭ ءىس-ارەكەتىنەن، سويلەگەن سوزىنەن ۇلگى الادى. ەگەر وتباسىندا سىيلاستىق، تۇسىنىستىك، يماندىلىق ۇستەم بولسا، بالا دا سول ورتادا دۇرىس جەتىلگەن تۇلعا بولىپ قالىپتاسادى. ال رۋحاني تاربيەدەن كەندە قالعان ورتادا وسكەن جاس بۋىننىڭ ومىرلىك باعدارىن تابۋى قيىنعا سوعارى بەلگىلى.

ءبىلىم بەرۋ جۇيەسى دە جاستاردىڭ رۋحاني دامۋىنا ۇلكەن ىقپال ەتەدى. مەكتەپ پەن جوعارى وقۋ ورىندارى تەك ءبىلىم بەرۋمەن شەكتەلمەي، ادامنىڭ جان-جاقتى دامۋىنا جاعداي جاساۋعا ءتيىس. ۇستاز – تەك اقپارات جەتكىزۋشى ەمەس، ول – تاربيەشى، باعىت-باعدار بەرۋشى. سوندىقتان ءبىلىم وردالارىندا ۇلتتىق جانە جالپىادامزاتتىق قۇندىلىقتاردى دارىپتەۋ – ۋاقىت تالابى.

قازىرگى جاستاردىڭ الدىندا تۇرعان تاعى ءبىر سىن – ماتەريالدىق قۇندىلىقتاردىڭ باسىم بولۋى. كەي جاعدايدا بايلىق، مانساپ، سىرتقى جەتىستىك ءبىرىنشى ورىنعا شىعىپ، رۋحاني دۇنيەگە جەتكىلىكتى ءمان بەرىلمەي جاتاتىنى راس. الايدا ادامدى شىنايى باقىتقا جەتكىزەتىن – تەك ماتەريالدىق يگىلىك ەمەس، رۋحاني تەپە-تەڭدىك. ىشكى جان دۇنيەسى باي، ار-ۇياتى تازا ادام عانا ءومىردىڭ ءمانىن تەرەڭ تۇسىنە الادى.

رۋحاني قۇندىلىقتار جاستاردى ءتۇرلى تەرىس قۇبىلىستاردان قورعايدى. ولار ەكسترەميزم، راديكاليزم، زورلىق-زومبىلىق، ناشاقورلىق سەكىلدى قاۋىپتەردىڭ الدىن الۋدا ماڭىزدى ءرول اتقارادى. سەبەبى سانالى، تاربيەلى، يماندى جاس مۇنداي جولعا بارمايدى. ول ءوز ءومىرىنىڭ عانا ەمەس، قوعامنىڭ دا الدىنداعى جاۋاپكەرشىلىگىن سەزىنەدى.

ءسوزىمىزدىڭ تۇقەتەرىن ايتار بولساق، جاستار ومىرىندەگى رۋحاني قۇندىلىقتار – ولاردىڭ دۇرىس باعىتتا قالىپتاسۋىنىڭ، قوعامعا پايدالى تۇلعا بولىپ جەتىلۋىنىڭ نەگىزى. رۋحاني بايلىق – ۇلتتىڭ ەڭ ۇلكەن كاپيتالى. سوندىقتان جاس ۇرپاقتىڭ ساناسىنا ىزگىلىك پەن پاراساتتى ءسىڭىرۋ – بارشامىزدىڭ ورتاق مىندەتىمىز. رۋحاني قۇندىلىقتارعا سۇيەنگەن قوعامنىڭ عانا ىرگەسى بەرىك، بولاشاعى جارقىن بولماق.

Abai.kz