ءماجىلىس دەپۋتاتتارى «جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭعا وزگەرىستەردى ءبىرىنشى وقىلىمدا ماقۇلدادى.

ءماجىلىس دەپۋتاتى ەكاتەرينا سمىشلياەۆا اتاپ وتكەندەي، زاڭ جوباسى وڭىرلەردىڭ الەۋەتىن كۇشەيتۋگە جانە جەرگىلىكتى ءوزىن-ءوزى باسقارۋدىڭ مارتەبەسىن ارتتىرۋعا باعىتتالعان.

– جوبا جيىن جانە جەرگىلىكتى قاۋىمداستىق جيىنى دەگەن ۇعىمداردى ناقتى ءبولىپ، زاڭ جۇزىندە بەكىتەدى. جيىن – ءوزىن-ءوزى باسقارۋ ورگانى بولسا، ال قاۋىمداستىق جيىنى – تۇرعىنداردىڭ قاتىسۋ فورماسى. سونداي-اق اۋماقتىق كەڭەستەردىڭ قۇرىلۋ ءتارتىبى مەن فۋنكتسيالارى ناقتىلاندى. بۇعان دەيىن اۋماقتىق كەڭەستەر تۋرالى نورما ءىس جۇزىندە جۇمىس ىستەمەگەن، قولدانىلماعان. بۇل ءىرى اۋىلدار مەن قالالار تۇرعىندارىنىڭ باسقارۋعا كوبىرەك قاتىسۋىنا مۇمكىندىك بەرەدى، – دەدى ەكاتەرينا سمىشلياەۆا.

وزگەرىستەردىڭ تاعى ءبىر باعىتى – ءماسليحاتتاردىڭ ءرولىن كۇشەيتۋ.

– دەپۋتاتتار اكىمدەردىڭ حالىقپەن كەزدەسۋلەرىنەن كەيىن قابىلدانعان جوسپارلاردىڭ ورىندالۋىن باقىلاۋعا قاتىسادى. سونداي-اق دەپۋتاتتارعا بيۋدجەتكە وزگەرىستەر ەنگىزۋدى باستاۋعا، بيۋدجەتتىك كوميسسيا جۇمىسىنا قاتىسۋعا جانە باسقا دا مۇمكىندىكتەر بەرىلەدى. ءماسليحاتتاردىڭ كوممۋنالدىق نىسانداردى باسقارۋعا قاتىسۋى دا كەڭەيتىلەدى. ەندى ءماسليحات دەپۋتاتتارىنىڭ دەپۋتاتتىق ساۋالدارى اشىق تۇردە جاريالاناتىن بولادى، – دەدى دەپۋتات.

سونىمەن قاتار ءماسليحات دەپۋتاتتارىنىڭ الەۋمەتتىك كەپىلدىكتەرى كۇشەيتىلەدى. اتاپ ايتقاندا، ءىسساپار شىعىندارىن وتەۋ قاراستىرىلعان. ال ءماسليحات تاراتىلعان جاعدايدا شتاتتىق نەگىزدە جۇمىس ىستەيتىن دەپۋتاتتارعا تولەمدەر تولەنەدى.

بۇدان بولەك، ءماسليحات اپپاراتىنىڭ باسشىسىن تاعايىنداۋ جانە قىزمەتىنەن بوساتۋ ءتارتىبى بەكىتىلەدى. ەندى بۇل وكىلەتتىك تىكەلەي ءماسليحات توراعاسىنا بەرىلەدى. اپپارات باسشىسىنا كادرلاردى باسقارۋ جانە قىزمەتكەرلەردى تاعايىنداۋ قۇزىرەتى بەرىلەدى.

ءماسليحات تاراتىلعان جاعدايدا اپپارات باسشىسىنىڭ قىزمەتىنە قاتىستى ماسەلە دە شەشىلەدى.

– پرەزيدەنتتىڭ تاپسىرمالارىن ورىنداۋ اياسىندا، اۋىل اكىمدەرىمەن ديالوگ الاڭىندا جانە ءماسليحات دەپۋتاتتارىنىڭ فورۋمىندا زاڭ جوباسى بىرقاتار ۇسىنىستارمەن تولىقتىرىلدى. سونىڭ ىشىندە وڭىرلەردىڭ قارجىلىق دەربەستىگىن كۇشەيتۋگە باعىتتالعان نورمالار ەنگىزىلدى. جەرگىلىكتى بيۋدجەتتەر قوسىمشا ءۇش ءتۇرلى تولەم مەن ايىپپۇلداردى يەلەنەدى. وسىلايشا جەرگىلىكتى ءوزىن-ءوزى باسقارۋ ورگاندارى قاراجاتتى ءبولۋ مەن شەشىم قابىلداۋدا كوبىرەك ەركىندىك الادى، – دەپ اتاپ ءوتتى سمىشلياەۆا.

تاعى ءبىر ماڭىزدى باعىت – ءماسليحات قىزمەتىنىڭ اشىقتىعىن ارتتىرۋ جانە تسيفرلاندىرۋ. مىسالى، سەسسيالاردى ونلاين كورسەتۋ، قۇجاتتاردى جاريالاۋ جانە حات الماسۋدى جۇرگىزۋ تالاپتارى ەنگىزىلەدى. زاڭ جوباسى دەپۋتاتتاردىڭ جاۋاپكەرشىلىگىن كۇشەيتىپ، ءماسليحات توراعاسىنىڭ وكىلەتتىك مەرزىمىن شەكتەيدى.

Abai.kz