بۇگىنگى تاڭدا 8 اقىلى ۋچاسكەدە ورنالاسقان اركالارداعى بەينەكامەرالار ورتاشا جىلدامدىقتى تىركەۋدە. بۇل تۋرالى ورتالىق كوممۋنيكاتسيالار الاڭىندا وتكەن بريفينگتە «قازاۆتوجول» ۇك» اق باسقارما توراعاسى دارحان يماناشەۆ ءمالىم ەتتى.

بەينەكامەرالار قۇقىق بۇزۋشىلىق فاكتىلەرىن ءتيىستى مەملەكەتتىك ورگاندارعا جولدايدى. 2026 جىلدىڭ سوڭىنا دەيىن قوسىمشا 16 اقىلى ۋچاسكەدە جىلدامدىقتى باقىلايتىن جۇيەنى ورناتۋ جوسپارلانعان.

– اتالعان جۇمىستار رەسپۋبليكالىق ماڭىزى بار جولداردىڭ 22 ۋچاسكەسىندە جۇزەگە اسىرىلدى. ولاردىڭ قاتارىندا استانا – ششۋچينسك، الماتى – قورعاس، شىمكەنت – تاراز، ورال – رەسەي فەدەراتسياسى شەكاراسى باعىتتارى جانە وزگە دە ستراتەگيالىق ماڭىزى جوعارى دالىزدەر بار. لازەرلىك قوندىرعىلار جۇرگىزۋشىنىڭ كورۋ ايماعىنا ايقىن جارىق سىزىقتارىن پروەكتسيالاپ، جول بويىندا ناقتى ۆيزۋالدى باعدار قالىپتاستىرادى. بۇل ءوز كەزەگىندە - قوزعالىس جىلدامدىعى مەن باعىتىن ۋاقىتىلى تۇزەتۋگە; ۇزاق ءارى ءبىرسارىندى ۋچاسكەلەردە رولدە قالعىپ كەتۋ قاۋپىن ازايتۋعا; جۇرگىزۋشىنىڭ زەيىنىن ارتتىرۋعا جانە جول جاعدايىن قابىلداۋدى جاقسارتۋعا مۇمكىندىك بەرەدى، - دەيدى يماناشەۆ.

Abai.kz