وقيعا شتاتتاعى ەڭ ءىرى مەشىت سانالاتىن سان-ديەگو يسلام ورتالىعى اۋماعىندا بولعان.

پوليتسياعا جەرگىلىكتى ۋاقىتپەن شامامەن تاڭعى 11:40-تا حابار تۇسكەن. قۇقىق قورعاۋ ورگاندارى وقيعا ورنىنا جەدەل جەتىپ، جاعداي تولىق باقىلاۋعا الىنعانىن مالىمدەدى.

قالالىق پوليتسيا باسشىسى سكوتت ۋول شابۋىل سالدارىنان 3 ەر ادامنىڭ كوز جۇمعانىن ايتتى. قازا تاپقانداردىڭ اراسىندا يسلام ورتالىعىنىڭ كۇزەت قىزمەتكەرى دە بار. ال شابۋىل جاسادى دەگەن كۇدىككە ىلىنگەن ەكى ادامنىڭ دەنەسى كەيىنىرەك تابىلعان.

پوليتسيانىڭ مالىمەتىنشە، كۇدىكتىلەر – ەكى جاس جىگىت. قازىرگى ۋاقىتتا ولاردىڭ جەكە باسى مەن ارەكەتىنىڭ سەبەبى انىقتالىپ جاتىر. تەرگەۋشىلەر بۇل وقيعانى ءدىني وشپەندىلىك نەگىزىندە جاسالعان قىلمىس بولۋى مۇمكىن دەگەن نۇسقانى دە قاراستىرۋدا. سەبەبى، شابۋىل ءدىني نىسان اۋماعىندا جاسالعان.

اتىس سان-ديەگو ورتالىعىنان شامامەن 14 شاقىرىم سولتۇستىكتە ورنالاسقان كەشەندە بولعان. مۇندا مەشىتپەن قاتار مەكتەپ تە بار. شابۋىل كەزىندە عيماراتتا بالالار وتىرعان. ابىروي بولعاندا، بارلىعى دەر كەزىندە ەۆاكۋاتسيالانىپ، زارداپ شەكپەگەن. مەكتەپتە اراب ءتىلى، يسلامتانۋ جانە قۇران ساباقتارى ءوتىپ جاتقان.

قۇقىق قورعاۋ ورگاندارى وقيعانىڭ وتە جىلدام وربىگەنىن ايتادى. اتىس مەشىت ماڭىندا دا، وعان جاقىن اۋدانداردا دا تىركەلدى. پوليتسيا وقيعا ورنىنا كەلگەن ساتتە بىرنەشە قۇرباندى انىقتاعان. كەيىنىرەك كولىكتەن 17 جانە 19 جاستاعى ەكى جىگىتتىڭ ءمايىتى تابىلدى. ولاردىڭ دەنەسىندە وق جاراقاتى بولعان. تەرگەۋدىڭ الدىن الا بولجامىنشا، ەكەۋى وزدەرىنە قول سالعان.

قازىر ىسكە اقش فەدەرالدىق تەرگەۋ بيۋروسى دا ارالاسىپ، تەرگەۋ امالدارى جالعاسىپ جاتىر.

وسى وقيعادان كەيىن نيۋ-يورك، ۆاشينگتون جانە لوس-اندجەلەس پوليتسياسى مەشىتتەر مەن وزگە دە ءدىني نىساندار ماڭىنداعى قاۋىپسىزدىك شارالارىن كۇشەيتەتىنىن حابارلادى.

Abai.kz