ۇكىمەت اسكەري قاقتىعىستار جالعاسىپ جاتقان ەلدەرگە ازاماتتاردىڭ شىعۋىنا ۋاقىتشا شەكتەۋ قويۋ ماسەلەسىن قاراستىرۋدا. سونىمەن قاتار، داعدارىستى جاعدايلاردا ۇلتتىق جانە وتاندىق اۋە تاسىمالداۋشىلارىن جۇمىلدىرۋدىڭ جاڭا ءتارتىبى تۋرالى ءسوز بولىپ وتىر.

توتەنشە جاعدايلار كەزىندە ارنايى ۇشاقتاردى ساتىپ الۋ ماسەلەسى دە قوزعالدى. بۇل تۋرالى پرەمەر-مينيستر ولجاس بەكتەنوۆتىڭ دەپۋتاتتىق ساۋالعا بەرگەن جاۋابىندا ايتىلعان.

بۇعان تاياۋ شىعىس ەلدەرىنەن قازاقستاندىقتاردى اۋقىمدى ەۆاكۋاتسيالاۋ سەبەپ بولدى. ەستەرىڭىزگە سالا كەتەيىك، بۇعان دەيىن ازاماتتاردى اسكەري قيمىلدارعا بايلانىستى بۇل وڭىرگە بارۋدان باس تارتۋعا شاقىرعان بولاتىن. الايدا ۇكىمەت ەۆاكۋاتسيا كۇندەرى دە كەيبىر ازاماتتاردىڭ جاعدايعا قاراماستان، قاقتىعىس ايماقتارىنا ۇشۋدى جالعاستىرعانىن مالىمدەدى.

مينيسترلەر كابينەتىنىڭ مالىمەتىنشە، ەۆاكۋاتسيا كەزەڭىندە الماتىدان دۋباي مەن شاردجاعا 191 قازاقستان ازاماتى ۇشىپ كەتكەن. ەندى بيلىك قاۋىپتى ايماقتارعا ساپارلاردى ۋاقىتشا شەكتەۋگە مۇمكىندىك بەرەتىن زاڭنامالىق مەحانيزمدەردى ازىرلەگىسى كەلەدى.

«ەۆاكۋاتسيا كەزەڭىندە قاقتىعىس ايماقتارىنا ساپارلاردىڭ جالعاسۋى قوسىمشا جۇكتەمە تۋدىردى. وسىعان بايلانىستى مۇنداي وڭىرلەرگە شىعۋدى ۋاقىتشا شەكتەۋگە مۇمكىندىك بەرەتىن زاڭنامالىق مەحانيزمدەر ازىرلەنەتىن بولادى»، — دەلىنگەن جاۋاپتا.

ەۆاكۋاتسيالىق رەيستەردىڭ ستاتيستيكاسى

سونداي-اق، جاۋاپ اۆتورلارى ەسكالاتسيا باستالعاننان بەرى قازاقستاننىڭ 66 ەۆاكۋاتسيالىق رەيس ۇيىمداستىرعانىن اتاپ ءوتتى:

• 27 رەيس – رەسپۋبليكالىق بيۋدجەت ەسەبىنەن تولەندى;

• 39 رەيس – كوممەرتسيالىق نەگىزدە بولدى (بيلەتتەردى ازاماتتار ءوز بەتىنشە ساتىپ الدى).

«وسىعان بايلانىستى داعدارىستى جاعدايلاردا ۇلتتىق جانە وتاندىق اۋە تاسىمالداۋشىلارىن جەدەل جۇمىلدىرۋ ءتارتىبىن جەتىلدىرۋ، سونداي-اق توتەنشە جاعدايلار قاجەتتىلىگى ءۇشىن ارنايى اۋە كەمەلەرىن ساتىپ الۋ مۇمكىندىكتەرىن قوسىمشا قاراستىرۋ جوسپارلانۋدا»، — دەدى پرەمەر-مينيستر.

بۇعان دەيىن قازاقستاننىڭ تاياۋ شىعىس ەلدەرىنەن ازاماتتاردى ەۆاكۋاتسيالاۋعا شامامەن ءتورت ميلليون دوللار جۇمساعانىن جازعان بولاتىنبىز. وقيعانىڭ ەگجەي-تەگجەيىن كولىك ءمينيسترى نۇرلان ساۋرانباەۆ ايتىپ بەرگەن ەدى.

Abai.kz