سولتۇستىك قازاقستان وبلىسىنا جۇمىس ساپارى اياسىندا پرەمەر-مينيستر ولجاس بەكتەنوۆ كوكتەمگى ەگىس جۇمىستارىن اياقتاۋ جانە اگروونەركاسىپ كەشەنىن دامىتۋ ماسەلەلەرى جونىندە كەڭەس وتكىزدى. جيىندا اۋىل شارۋاشىلىعى ءمينيسترى ايداربەك ساپاروۆ، ەكولوگيا جانە تابيعي رەسۋرستار ۆيتسە-ءمينيسترى جومارت اليەۆ، «بايتەرەك» حولدينگىنىڭ باسقارما توراعاسى رۋستام قاراعويشين بايانداما جاسادى. سونىمەن قاتار جيىندا اقمولا، سولتۇستىك قازاقستان، قوستاناي، تۇركىستان، باتىس قازاقستان وبلىستارىنىڭ اكىمدەرى جانە اگرارشىلار اتىنان «زەنچەنكو ي ك» شارۋا قوجالىعىنىڭ ديرەكتورى گەننادي زەنچەنكو ءسوز سويلەدى.

«اۋىل شارۋاشىلىعى – ەل ەكونوميكاسىنىڭ باسىم باعىتى. پرەزيدەنت قاسىم-جومارت توقاەۆ سالانىڭ قارقىندى دامۋىنا ەرەكشە نازار اۋدارىپ، ونىڭ اۋىل تۇرعىندارىنىڭ ءومىر ءسۇرۋ ساپاسىن جاقسارتۋداعى ماڭىزدىلىعىن، سونداي-اق ازىق-تۇلىك قاۋىپسىزدىگىن جانە ەكونوميكانىڭ ورنىقتى ءوسۋىن قامتاماسىز ەتۋدەگى ءرولىن ۇنەمى ەرەكشە اتاپ كورسەتىپ كەلەدى», — دەپ اتاپ ءوتتى ولجاس بەكتەنوۆ.

اۋىل شارۋاشىلىعى ءمينيسترى ايداربەك ساپاروۆ ەگىس ناۋقانىنىڭ اياقتالعانى تۋرالى باياندادى. بيىل 23,8 ملن گەكتار القاپقا اۋىل شارۋاشىلىعى داقىلدارى ەگىلدى، بۇل وتكەن جىلعى كورسەتكىشتەن 180 مىڭ گەكتارعا ارتىق. پرەزيدەنت تاپسىرماسى بويىنشا جوعارى رەنتابەلدى جانە الەۋمەتتىك ماڭىزى بار داقىلدار القاپتارىن ۇلعايتا وتىرىپ، ەگىس القاپتارى قۇرىلىمىن ءارتاراپتاندىرۋ جۇمىستارى جۇرگىزىلۋدە. ماسەلەن، ءداندى جانە ءداندى-بۇرشاقتى داقىلدار القابى 15,8 ملن گەكتارعا، مايلى داقىلدار 4,3 ملن گەكتارعا، مال ازىقتىق داقىلدار 3,3 ملن گەكتارعا ەگىلدى. شەگىرتكەگە قارسى كۇرەس اياسىندا بيىل 2,2 ملن گەكتار جەر وڭدەلەدى. بۇگىندە شامامەن 665 مىڭ گەكتاردا زيانكەستەرگە قارسى ءىس-شارالار اياقتالدى. كوكتەمگى ەگىس جۇمىستارىن جۇرگىزۋ ءۇشىن مەملەكەت تاراپىنان قاجەتتى قولداۋ شارالارى قابىلداندى: شارۋالار 402 مىڭ توننا جەڭىلدەتىلگەن ديزەل وتىنىمەن قامتاماسىز ەتىلدى، 2,3 ملن توننا كولەمىندە تۇقىمعا قاجەتتىلىك تولىق جابىلدى، 2,3 ملن توننا مينەرالدى تىڭايتقىشتار ەنگىزۋ جوسپارلانعان.

ءتورت ايدا ەت ءوندىرىسى 338 مىڭ توننانى قۇرادى (+3,4%). سيىر ەتىن ءوندىرۋ كولەمى 112,9 مىڭ توننانى (+6,1%), قوي ەتى 34,7 مىڭ توننانى (+8,1%), جىلقى ەتى 41,2 مىڭ توننانى (+3,8%) قۇرادى.

مال شارۋاشىلىعىن دامىتۋدىڭ تيىمدىلىگى ۆەتەريناريالىق قاۋىپسىزدىككە تىكەلەي بايلانىستى. وسىعان بايلانىستى ۇكىمەت ۆەتەريناريالىق قىزمەتتى نىعايتۋ، ينفراقۇرىلىمدى جاڭعىرتۋ جانە ەڭبەك جاعدايىن جاقسارتۋعا باعىتتالعان جۇيەلى شارالاردى جۇزەگە اسىرۋدا.

«سوڭعى ەكى جىلدا جەرگىلىكتى اتقارۋشى ورگاندار 9,1 ملرد تەڭگە سوماسىنا شامامەن 600 ۆەتەريناريالىق نىسان سالدى. مەملەكەتتىك ۆەتەريناريالىق زەرتحانالاردى قوسىمشا جاراقتاندىرۋ جۇمىستارى جالعاسۋدا. رەسپۋبليكالىق بيۋدجەتتەن بەرىلەتىن جالپى سيپاتتاعى ترانسفەرتتەر شەڭبەرىندە ينفراقۇرىلىمدى دامىتۋعا 66,2 ملرد تەڭگە ءبولىندى. قابىلدانىپ جاتقان شارالاردىڭ ناتيجەسى ەلەۋلى جەتىستىككە اكەلدى – قازاقستان رەسمي تۇردە اۋسىلدان تازا ەل مارتەبەسىنە يە بولدى. بۇل مارتەبە وتاندىق مال شارۋاشىلىعى ونىمدەرىنىڭ ەكسپورتتىق الەۋەتىن نىعايتۋعا ىقپال ەتەدى», — دەپ باياندادى ايداربەك ساپاروۆ.

بۇگىندە اۋىل شارۋاشىلىعى ونىمدەرى ەكسپورتىنىڭ جالپى كولەمىندەگى وڭدەلگەن ءونىم ۇلەسى 51%-دان استى، بۇل سالانىڭ قوسىلعان قۇنى جوعارى ءونىم وندىرۋگە كەزەڭ-كەزەڭىمەن كوشىپ جاتقانىن كورسەتەدى.

جالپى العاندا اوك-تەگى نەگىزگى كاپيتالعا سالىنعان ينۆەستيتسيالار كولەمى 1,6 ترلن تەڭگەگە جەتتى، بۇل وتكەن جىلعى دەڭگەيدەن جوعارى. سوڭعى 2 جىلدا قازىرگى زامانعى مال شارۋاشىلىعى كەشەندەرىنەن باستاپ تەرەڭ وڭدەۋ كاسىپورىندارىنا دەيىن 540 جاڭا ءوندىرىس پايدالانۋعا بەرىلدى. ونىڭ ىشىندە 89 مال شارۋاشىلىعى كەشەنى، 70 تاۋارلى-ءسۇت فەرماسى، 35 استىق قويماسى، 35 كوكونىس قويماسى، 16 قۇس فابريكاسى، 11 جىلىجاي سالىندى، وسىمدىك مايلارىن ءوندىرۋ جانە تەرەڭ وڭدەۋ بويىنشا 12 جوبا جۇزەگە اسىرىلدى. 2026 جىلى تەحنيكا پاركىن جاڭارتۋ قارقىنى 8%-عا جەتپەك، بۇل رەتتە پاركتىڭ توزۋى 65%-عا دەيىن تومەندەيدى.

پرەمەر-مينيستر ءىرى اۋىل شارۋاشىلىعى كاسىپورىندارىن مال شارۋاشىلىعىن دامىتۋعا بەلسەندى تارتۋ قاجەتتىگىن اتاپ ءوتتى.

«كەڭەس جۇمىسىنا بيزنەس پەن اۋىل شارۋاشىلىعى سالاسىنىڭ وكىلدەرى قاتىسىپ وتىرعانىن پايدالانىپ، مىنا ماسەلەگە تاعى دا نازار اۋدارعىم كەلەدى: ءىرى شارۋاشىلىقتار جىل بويعى جۇمىسپەن قامتۋدى تۇراقتى جولعا قويۋى ءتيىس. بۇل – سىزدەرگە قويىلاتىن نەگىزگى تالاپتاردىڭ ءبىرى. مەملەكەت قاجەتتى قولداۋدى كورسەتۋدە، بىراق ءىرى بيزنەس تاراپىنان دا ءبىرىنشى كەزەكتە جىل بويعى جۇمىسپەن قامتۋ جونىندە قارسى مىندەتتەمەلەر كۇتەدى. اشىعىن ايتايىن، ەگەر وسى باعىتتا ءتيىستى شارالار قابىلدانباسا، ءبىز سىزدەرمەن بىرگە بۇدان ءارى جۇمىس ىستەي المايمىز، مۇنداي مەنشىك يەلەرىنەن جەر تەلىمدەرىن كەرى قايتارىپ الا باستايمىز», — دەپ اتاپ ءوتتى ولجاس بەكتەنوۆ.

سۋدى ۇتىمدى پايدالانۋ ماسەلەلەرىنە ەرەكشە نازار اۋدارىلدى. وتكەن جىلى جەكەلەگەن شارۋاشىلىقتاردىڭ ەگىس قۇرىلىمىن ساقتاماۋى، اسىرەسە تۇركىستان جانە قىزىلوردا وبلىستارىندا سۋ تۇتىنۋدىڭ وسۋىنە اكەلدى. وسىعان بايلانىستى پرەمەر-مينيستر سۋ رەسۋرستارى جانە يرريگاتسيا مينيسترلىگىنە اكىمدىكتەرمەن بىرلەسىپ ماسەلەنى باقىلاۋدا ۇستاۋدى، ىلعال كوپ قاجەت ەتەتىن داقىلدار بويىنشا بەكىتىلگەن ەگىس قۇرىلىمىنىڭ ساقتالۋىن قامتاماسىز ەتۋدى جانە فەرمەرلەرمەن ءتۇسىندىرۋ جۇمىستارىن كۇشەيتۋدى تاپسىردى.

وڭىرلەردە سۋ رەسۋرستارىن ەسكەرە وتىرىپ، ەگىس قۇرىلىمىن وڭتايلاندىرۋ جۇرگىزىلۋدە. سۋدى پايدالانۋدىڭ بەلگىلەنگەن ليميتتەرىنە سايكەس كۇرىش الاڭى 20,6 مىڭ گەكتارعا قىسقارىپ، 79,9 مىڭ گەكتاردى قۇرادى. ماقتا شارۋاشىلىعىندا سۋ ۇنەمدەۋ تەحنولوگيالارىن ەنگىزۋگە باسا نازار اۋدارىلۋدا: تامشىلاتىپ سۋارۋعا ارنالعان ماقتا الاڭى 29,8 مىڭ گەكتارعا ۇلعايتىلىپ، 79,8 مىڭ گەكتارعا جەتتى، ال ءداستۇرلى سۋارۋعا ارنالعان الاڭدار 12 مىڭ گەكتارعا قىسقاردى.

ۆەگەتاتسيالىق كەزەڭدەگى اۋا رايى بولجامى تۋرالى ەكولوگيا جانە تابيعي رەسۋرستار ۆيتسە-ءمينيسترى جومارت اليەۆ باياندادى. «قازگيدرومەتتىڭ» مالىمەتى بويىنشا، وسى كەزەڭدە اۋا تەمپەراتۋراسى جوعارى بولادى جانە جاۋىن-شاشىن ءار جەردە ءار ءتۇرلى جاۋادى. جالپى العاندا ۆەگەتاتسيالىق ماۋسىمنىڭ باستالۋى قولايلى دەپ باعالانىپ وتىر. سونىمەن قاتار، شىلدە-قىركۇيەك ايلارىندا ەلىمىزدىڭ جەكەلەگەن وڭىرلەرىندە ىلعال تاپشى بولۋى مۇمكىن قاۋپى بار. قىركۇيەك ايىندا جاۋىن-شاشىن مولشەرى قازاقستاننىڭ باسىم بولىگىندە نورمادان از، ال سولتۇستىك قازاقستان، شىعىس قازاقستان، باتىس قازاقستان، قوستاناي، اقمولا، پاۆلودار، اباي وبلىستارىنىڭ باسىم بولىگىندە، اقتوبە وبلىسىنىڭ شالعاي سولتۇستىگىندە نورماعا جاقىن دەپ بولجانىپ وتىر.

بۇل رەتتە ۆەگەتاتسيالىق ماۋسىمعا جاسالعان الدىن الا بولجام ۋاقىت وتە ناقتىلانىپ، اي سايىنعى مالىمەتتەرمەن تولىقتىرىلىپ، بارلىق مۇددەلى مەملەكەتتىك ورگاندار مەن حالىققا جەتكىزىلەتىن بولاتىنى اتاپ ءوتىلدى.

«بايتەرەك» ۇلتتىق ينۆەستيتسيالىق حولدينگى» اق باسقارما توراعاسى رۋستام قاراعويشين شارۋالاردى قارجىلاي قولداۋ شارالارى تۋرالى باياندادى. بيىل اوك-ءتى دامىتۋعا 1,2 ترلن تەڭگەدەن استام قاراجات قاراستىرىلعان، ونىڭ 750 ملرد تەڭگەسىن ەگىن ەگۋ جانە جيناۋ جۇمىستارىنا باعىتتاۋ جوسپارلانۋدا. بۇگىنگى تاڭدا فەرمەرلەر 573 ملرد تەڭگە قارىز العان، بۇل شامامەن 6,8 ملن گا ەگىس القابىن وڭدەۋگە مۇمكىندىك بەردى. وعان قوسىمشا «دامۋ» قورى 232 ملرد تەڭگەگە 1,7 مىڭ كەپىلدىك بەردى، سونىڭ ارقاسىندا اگرارشىلار 273 ملرد تەڭگەگە نەسيە الا الدى.

«زەنچەنكو ي ك» شارۋا قوجالىعىنىڭ ديرەكتورى گەننادي زەنچەنكو فەرمەرلىك قوعامداستىق مەملەكەتتىڭ شارۋالاردى قولداۋ بويىنشا جۇرگىزىپ جاتقان جۇمىسىن وڭ باعالايتىنىن اتاپ ءوتتى. ونىڭ ايتۋىنشا، اعىمداعى شەشىمدەر اۋىل شارۋاشىلىعى تاۋارىن وندىرۋشىلەر اراسىندا قولداۋ تاۋىپ، جاڭا ينۆەستيتسيالىق جوبالارعا، زاماناۋي وندىرىستەرگە جانە اۋىلداعى جۇمىس ورىندارىنا اينالۋدا.

«شارۋالار قوعامداستىعى اتىنان مەملەكەت باسشىسىنا بۇگىندە اگروونەركاسىپتىك كەشەندى دامىتۋعا كوڭىل ءبولىنىپ جاتقانى ءۇشىن ريزاشىلىعىمدى بىلدىرگىم كەلەدى. جاسالىپ وتىرعان قولداۋ تەتىكتەرى بيزنەسكە ۇزاق مەرزىمدى جوبالارعا سەنىمدى ينۆەستيتسيا سالۋعا، زاماناۋي تەحنولوگيالاردى ەنگىزۋگە جانە ەلدىڭ ازىق-تۇلىك قاۋىپسىزدىگىن قامتاماسىز ەتۋگە ۇلەس قوسۋعا مۇمكىندىك بەرەدى. بۇگىنگى تاڭدا فەرمەرلەرگە ودان ءارى دامۋ ءۇشىن بارلىق قاجەتتى جاعدايلار مەن قۇرالدار بار. سونىمەن بىرگە، مەملەكەتتىك قولداۋ بيزنەستىڭ بەرىلگەن مۇمكىندىكتەردى ءتيىمدى پايدالانۋداعى جوعارى جاۋاپكەرشىلىگىن دە كوزدەيدى», — دەدى گەننادي زەنچەنكو.

شارۋا قوجالىعىنىڭ ديرەكتورى سونداي-اق جاساندى ينتەللەكتىنى ەنگىزۋ، اوك-ءتى تسيفرلاندىرۋ، مال شارۋاشىلىعىن دامىتۋ، اۋىل شارۋاشىلىعى ءبىلىمىنىڭ ساپاسىن ارتتىرۋ، اۋىل ءۇشىن كادرلار دايارلاۋ جانە قوسىلعان قۇنى جوعارى باسەكەگە قابىلەتتى ءونىم شىعارۋ ماسەلەلەرىن كوتەردى.

جيىن قورىتىندىسىندا پرەمەر-مينيستر مەملەكەت باسشىسىنىڭ ازىق-تۇلىك قاۋىپسىزدىگىن نىعايتۋ جانە اوك-ءتى جوعارى تەحنولوگيالىق ەكسپورتتىق سالاعا اينالدىرۋ جونىندەگى العا قويعان مىندەتىن جۇزەگە اسىرۋ ءۇشىن بارلىق قاجەتتى جاعدايلار جاسالىپ جاتقانىن اتاپ ءوتتى.

«وسىمدىك شارۋاشىلىعى سالاسى تۇراقتى ءوسىم كورسەتىپ وتىر، ال ءبىزدىڭ مىندەتىمىز – وسى قارقىندى ساقتاپ، ودان ءارى ارتتىرا ءتۇسۋ. اۋىل شارۋاشىلىعى، سۋ رەسۋرستارى جانە ەكولوگيا مينيسترلىكتەرى ءوڭىر اكىمدىكتەرىمەن بىرلەسىپ، اسىرەسە قۋاڭشىلىق قاۋپى بار ايماقتاردا ەگىستىكتەردى سۋمەن قامتاماسىز ەتۋ جاعدايىن تۇراقتى باقىلاۋدا ۇستاۋى ءتيىس. قاجەت بولعان جاعدايدا اۋىل شارۋاشىلىعى تاۋار وندىرۋشىلەرىن قولداۋ جانە ءونىمدى ساقتاپ قالۋ ءۇشىن جەدەل شارالار قابىلداۋ كەرەك. بارلىق اگروتەحنولوگيالىق تالاپتار بەلگىلەنگەن عىلىمي نورمالارعا قاتاڭ سايكەس ورىندالۋى ءتيىس. مينەرالدى تىڭايتقىشتاردى ۋاقتىلى ەنگىزۋدى قامتاماسىز ەتۋ قاجەت. وسىمدىكتەردى قورعاۋ شارالارىن جۇرگىزۋگە ەرەكشە نازار اۋدارۋ كەرەك», — دەپ اتاپ ءوتتى ولجاس بەكتەنوۆ.

اۋىل شارۋاشىلىعىنىڭ نەگىزگى باعىتتارىنىڭ ءبىرى رەتىندە مال شارۋاشىلىعى سالاسىنىڭ زور الەۋەتى بار ەكەنى اتاپ ءوتىلدى. ونىڭ جۇيەلى دامۋى ءۇشىن بيىل 5 جىلعا ارنالعان، بۇكىل وندىرىستىك تىزبەك بويىنشا جەڭىلدەتىلگەن قارجىلاندىرۋدى كوزدەيتىن كەشەندى جوسپار بەكىتىلدى. مال شارۋاشىلىعىنىڭ بارلىق كىشى سالالارى مەن ساناتتارىنا 220 ملرد تەڭگە باعىتتالاتىن بولادى. ءىرى قارا جانە ۇساق مالدىڭ اسىل تۇقىمدى باسىن ساتىپ الۋعا ارنالعان «يگىلىك» جانە «بەرەكە» جاڭا كرەديتتىك ونىمدەرى ىسكە قوسىلدى، ولاردىڭ بەكىتىلگەن مولشەرلەمەسى 6%-دان اسپايدى. مال ايداۋ شارۋاشىلىعىن ىنتالاندىرۋ ماقساتىندا جايىلىم ينفراقۇرىلىمىن دامىتۋعا باعىتتالعان «جايلاۋ» بىرىڭعاي كرەديتتىك ءونىمى ىسكە قوسىلۋدا. اينالىم قاراجاتىن تولىقتىرۋعا ارنالعان 5% مولشەرلەمەمەن جەڭىلدەتىلگەن كرەديتتەۋ باعدارلاماسى قولجەتىمدى. وسى باعىتتا اكىمدىكتەرگە جۇمىستى كۇشەيتىپ، جەر رەسۋرستارى ايتارلىقتاي ءىرى شارۋاشىلىقتاردىڭ مۇمكىندىكتەرىن تولىق كولەمدە پايدالانۋ تاپسىرىلدى.

وسى جىلدىڭ اقپان ايىندا ۇكىمەتتىڭ كەڭەيتىلگەن وتىرىسىندا بەرىلگەن مەملەكەت باسشىسىنىڭ ۆەتەريناريالىق ينفراقۇرىلىم دەڭگەيىن ودان ءارى ارتتىرۋ جونىندەگى تاپسىرمالارىن ورىنداۋعا ەرەكشە نازار اۋدارىلدى. اۋىل شارۋاشىلىعى مينيسترلىگىنە اكىمدىكتەرمەن بىرلەسىپ ۆەتەريناريالىق ءىس-شارالاردى ۋاقتىلى جانە ءتيىمدى جۇرگىزۋدى قامتاماسىز ەتۋ، اۋىل شارۋاشىلىعى وندىرۋشىلەرى اراسىندا ءتۇسىندىرۋ جۇمىستارىن كۇشەيتۋ تاپسىرىلدى.

«مينيستر اتاپ وتكەندەي، قازاقستان اۋسىلدان تازا ەل مارتەبەسىنە يە بولدى. ءبىز الداعى ۋاقىتتا دا وسىنداي مارتەبەگە ساي بولۋىمىز كەرەك. سونىمەن قاتار مال شارۋاشىلىعىنىڭ تۇراقتى دامۋى ۆەتەريناريالىق قاۋىپسىزدىك دەڭگەيىنە تىكەلەي بايلانىستى. اۋرۋلاردىڭ الدىن الۋ مەن باقىلاۋدىڭ ءتيىمدى جۇيەسى بولماسا، مال باسىنىڭ ءوسۋىن، ونىمدىلىكتى ارتتىرۋ جانە ءونىم ساپاسىن جاقسارتۋ مۇمكىن ەمەس. وسىعان بايلانىستى ىشكى نارىقتاعى ەپيزووتيالىق تۇراقتىلىقتى قامتاماسىز ەتۋ وتە ماڭىزدى», – دەپ اتاپ ءوتتى پرەمەر-مينيستر.

اكىمدىكتەرگە بازارلاردا ۆەتەريناريالىق جانە فيتوسانيتاريالىق باقىلاۋدى كۇشەيتۋدى، ونىڭ ىشىندە ۆەتەريناريالىق-سانيتاريالىق تالاپتاردىڭ قاداعالانۋىن جانە ساقتالۋىن قامتاماسىز ەتۋ تاپسىرىلدى. وڭىرلەردە ۆەتەريناريالىق ينفراقۇرىلىمدى سالۋ جانە جاڭعىرتۋ بويىنشا مىندەتتەر قويىلدى.

«اۋىل شارۋاشىلىعى سالاسىنداعى مەملەكەتتىك ساياسات تيىمدىلىك پەن اگرارشىلاردىڭ ادالدىق قاعيداتتارىنا نەگىزدەلىپ قالىپتاستىرىلادى. سونىمەن قاتار اكىمدىكتەر بولىنگەن قاراجاتتىڭ ماقساتتى پايدالانىلۋىن تۇراقتى باقىلاۋدا ۇستاۋى قاجەت. مەملەكەت باسشىسى جاريالاعان تسيفرلاندىرۋ جانە جاساندى ينتەللەكت جىلىندا اگرارلىق ءوندىرىستىڭ بارلىق كەزەڭىنە – ەگىستىكتەن باستاپ ساۋدا سورەسىنە دەيىن تسيفرلىق قۇرالداردى ەنگىزۋ تالاپ ەتىلەدى. سونداي-اق اۋىل-ايماقتا جايلى ءومىر سۇرۋگە جاعدايلار جاساۋ ماڭىزدى. زەنچەنكو، ەراليەۆ، ساۋەر، قۇرمانقۇلوۆ شارۋاشىلىقتارىنىڭ اۋىلدارى سەكىلدى مىسالدار ەلىمىزدە از ەمەس، الايدا ولاردىڭ سانى ارتا ءتۇسۋى ءتيىس. مەملەكەت ولاردىڭ دامۋىن جان-جاقتى قولداپ، ىنتالاندىراتىن بولادى», — دەپ اتاپ ءوتتى پرەمەر-مينيستر.

سونىمەن قاتار اعىمداعى بىرقاتار وزەكتى ماسەلەنى شەشۋ بويىنشا تاپسىرمالار بەرىلدى:

• اۋىل شارۋاشىلىعىنىڭ قوسىمشا باعىتتارىن دامىتۋ ماقساتىندا اۋىل شارۋاشىلىعى مينيسترلىگى مەن «بايتەرەك» ۇبح جىلىجايلار، باۋ-باقشا جانە بالىق شارۋاشىلىقتارىن جەڭىلدەتىلگەن نەسيەلەۋ باعدارلامالارىن ىسكە قوسۋ جونىندە (جەكە ينۆەستيتسيالار مەن ءمجا تەتىكتەرىن ەسكەرە وتىرىپ) قىسقا مەرزىمدە ۇسىنىستار ەنگىزۋ;
• جەڭىلدەتىلگەن قارجىلاندىرۋ الۋ كەزىندە مال وسىرۋشىلەردىڭ قاجەتتى كەپىلىنىڭ بولماۋى ماسەلەسىن شەشۋ ءۇشىن اۋىل شارۋاشىلىعى مينيسترلىگىنە، قارجى مينيسترلىگىنە جانە «بايتەرەك» ۇبح قارىزدارعا كەپىلدىك بەرۋ تەتىگىن جەدەل تۇردە ەنگىزۋ تاپسىرىلدى;
• ونەركاسىپ جانە قۇرىلىس مينيسترلىگىنە قازاقستاندىق اگرارشىلاردى وتاندىق مينەرالدى تىڭايتقىشتارمەن تولىق كولەمدە جانە تۇراقتى باعامەن قامتاماسىز ەتۋ بويىنشا شارالار قابىلداۋ;
• شەگىرتكەلەردىڭ تارالۋىنا جول بەرمەۋ ءۇشىن اۋىل شارۋاشىلىعى مينيسترلىگىنە ءوڭىر اكىمدەرىمەن بىرلەسىپ 2,2 ملن گەكتار القاپتا حيميالىق وڭدەۋ جۇمىستارىن ۋاقىتىلى ءارى ساپالى اياقتاۋ، زيانكەستەر وشاقتارىن وقشاۋلاۋ;
• سۋ رەسۋرستارى جانە يرريگاتسيا، اۋىل شارۋاشىلىعى، مادەنيەت جانە اقپارات مينيسترلىكتەرىنە سۋ رەسۋرستارىن ۇتىمدى پايدالانۋ جانە سۋ ۇنەمدەۋ تەحنولوگيالارىن قولدانۋ بويىنشا اقپاراتتىق-ءتۇسىندىرۋ جۇمىستارىن كۇشەيتۋ.

«دالا مەن ورمان ورتتەرىنىڭ قاۋپى كۇشەيىپ وتىر. توتەنشە جاعدايلار مينيسترلىگى ەكولوگيا مينيسترلىگىمەن جانە ءوڭىر اكىمدىكتەرىمەن بىرلەسىپ ازاماتتىق قورعاۋ قىزمەتتەرى مەن كۇشتەرىنىڭ جوعارى ازىرلىگىن قامتاماسىز ەتۋى قاجەت. ءورت ءسوندىرۋ تەحنيكاسىنىڭ، بايلانىس جۇيەلەرىنىڭ جانە جانار-جاعارماي قورىنىڭ دايىندىق دەڭگەيىن تەكسەرۋ كەرەك. سونداي-اق الدىن الۋ شارالارى اياسىندا ورمان جانە دالا القاپتارىن، اسىرەسە ەلدى مەكەندەر مەن ەگىستىك جەرلەرگە جاقىن اۋماقتاردى قۋراعان شوپتەر مەن وسىمدىك قالدىقتارىنان تازارتۋ جۇمىستارىن جۇرگىزۋ قاجەت»، — دەپ تاپسىردى ولجاس بەكتەنوۆ.

اتالعان بارلىق تاپسىرمالاردىڭ ساپالى ورىندالۋىن باقىلاۋ اۋىل شارۋاشىلىعى مينيسترلىگىنە جانە وبلىس اكىمدىكتەرىنە جۇكتەلدى.

Abai.kz