الماتىدا وقۋ جىلىنىڭ قورىتىندىسى بويىنشا نەگىزگى مەكتەپتى (9-سىنىپتى) 30 380 وقۋشى ءساتتى اياقتادى. ولار ءۇشىن بۇل بەلەس العاشقى كۇردەلى جەڭىس بولدى. جىلدار بويى ەرەكشە ىنتا-جىگەر تانىتقان تۇلەكتەر بولەك قۇرمەتكە لايىق: الماتىنىڭ 2 168 مەكتەپ وقۋشىسى 9-سىنىپتى ۇزدىك بىتىرگەنى تۋرالى اتتەستات الدى.

سۋرەت: الماتى قالاسى اكىمدىگىنەن الىندى.

11-سىنىپ تۇلەكتەرى ءۇشىن مەكتەپ ءومىرىنىڭ سوڭعى اككوردى سوعىلدى. بيىل الماتىدا ورتا مەكتەپتى 20 803 تۇلەك ءبىتىردى. قالانىڭ ءبىلىم بەرۋ جۇيەسىنىڭ ماقتانىشىنا اينالعان «التىن بەلگى» يەگەرلەرىنىڭ سانى دا كوڭىل قۋانتادى - بيىل بارلىق پاندەر بويىنشا ۇزدىك بىلىمدەرىن دالەلدەگەن 790 تۇلەك مەكتەپتىڭ ەڭ جوعارى ماراپاتىنا يە بولدى.

بۇدان بولەك, جالپى ورتا ءبىلىم بەرۋ كۋرسىن (11-سىنىپتى) ۇزدىك اياقتاعان 2 083 تۇلەككە ەرەكشە ۇلگىدەگى اتتەستات تابىستالدى, بۇل ولاردىڭ جوعارى اكادەميالىق مارتەبەسىن تاعى ءبىر مارتە ايقىندادى.

سوڭعى جىلدارى الماتى قالاسىندا اتتەستات تاپسىرۋ سالتاناتىن كۇندىزگى ۋاقىتقا وتكىزۋ داستۇرگە اينالىپ كەلە جاتىر. تۇلىكتەردىڭ قاۋىپسىزدىگى مەن قوعامدىق ءتارتىپ, وسكەلەڭ مادەنيەتتى ساقتاۋعا باعىتتالعان بۇل ءداستۇر بيىل دا جالعاسىن تاپتى.  سالتاناتتى جيىندارعا ءاربىر مەكتەپتىڭ پەداگوگيكالىق ۇجىمى, تۇلەكتەر, اتا-انالار, پەداگوگيكالىق ەڭبەك ارداگەرلەرى, قامقورشىلىق كەڭەس مۇشەلەرى, ءبىلىم باسقارماسىنىڭ جانە باسقا دا مۇددەلى مەملەكەتتىك ورگانداردىڭ وكىلدەرى قاتىستى.

اۋەزوۆ اۋدانىنداعى №202 مەكتەپ-گيمنازيا تۇلەكتەرىنە اتتەستات تاپسىرۋ سالتاناتى وقۋشىلاردىڭ يننوۆاتسيالىق ورتالىعىندا سالتاناتتى تابىستالدى. ارينە, مەكتەپ ءبىتىرۋشى تۇلەكتەر ءۇشىن اتتەستات تاپسىرۋ – ومىردەگى ەڭ ماڭىزدى ءارى ەستە قالارلىق ساتتەردىڭ ءبىرى. مەكتەپ ءبىتىرۋشى تۇلەكتەردى مەكتەپ-گيمنازيا ديرەكتورى بولات جانايحانۇلى, تۇلەكتەردىڭ اتا-انالارى اتىنان ايگۇل نۋرعازىقىزى, «التىن بەلگى» يەگەرىلەرى ارۋجان ميراسقىزى, اسلان ماقساتۇلى, شۇعىلا جۇمابەكقىزى, بايجان جانيا, ايساۋلە اسقارقىزى, ءامينا عابيتقىزىنىڭ تەبىرەنىسكە تولى تىلەكتەرى دە كوپشىلىكتى بەي-جاي قالدىرمادى.

سۋرەت: الماتى قالاسى اكىمدىگىنەن الىندى.

عاسىردان استام تاريحى بار ايتۋلى ءبىلىم وشاعى №12 مەكتەپتە وتكەن اتتەستات تاپسىرۋ سالتاناتتى جيىنى وزگەشە ماندە وتكىزىلدى. مەكتەپ ديرەكتورى ايىمگۇل داۋىربەكوۆا تۇلەكتەردى قۇتتىقتاپ, ولاردىڭ الداعى ءومىر جولىنا ساتتىلىك تىلەدى:

– بيىل ءبىزدىڭ مەكتەپتى 141 تۇلەك بىتىرسە, ولاردىڭ 11-ءى «التىن بەلگى» يەگەرى اتاندى. ەندى سىزدەر العان بىلىمدەرىڭىزدىڭ ارقاسىندا تاڭداعان وقۋ ورنىنىڭ ستۋدەنتى اتانىپ, قالاعان ماماندىق يەسى بولىڭىزدار. قازاق ءبىلىمىنىڭ شامشىراعى اڭىزعا اينالعان التىن ۇيانىڭ داڭقى داۋىرلەي بەرسىن, – دەدى مەكتەپ باسشىسى.

جيىندا وقۋ وزاتتارى مەن قوعامدىق جۇمىستارعا بەلسەندى قاتىسقان وقۋشىلاردىڭ ەسىمدەرى ەرەكشە اتالدى. تۇلەكتەر ءوز كەزەگىندە ءبىلىم نارىمەن سۋسىنداتىپ, ومىرلىك باعىت-باعدار بەرگەن ۇستازدارىنا العىستارىن ءبىلدىردى. اتا-انالار دا بالالارىنىڭ جەتىستىكتەرىنە قۋانىپ, مەكتەپ ۇجىمىنا ريزاشىلىقتارىن جەتكىزدى.

ەندى تۇلەكتەردىڭ الدىندا ۇلكەن ماقساتتار مەن جاڭا بەلەستەر تۇر. ولار العان بىلىمدەرىن ەل يگىلىگى ءۇشىن جۇمساپ, قازاقستاننىڭ جارقىن بولاشاعىن قالىپتاستىرۋعا ءوز ۇلەستەرىن قوسارى ءسوزسىز. وسىناۋ قيماستىققا تولى ساتتە ورتاعا شىققان 11-سىنىپتى ءبىتىرۋشى تۇلەكتەر وزدەرى تۇلەپ ۇشقان التىن ۇياعا دەگەن ىڭكار سەزىمدەرىن ەرەكشە تەبىرەنىسپەن جەتكىزدى. الماتى مەكتەپتەرىنە ءتان قالىپتاسقان ءداستۇر – تۇلەكتەر قايىرىمدىلىق ءىس-شارالارىن وتكىزىپ, «مەكتەپكە كىتاپ سىيلا», «مەكتەپكە سىي» اتتى اعاش, گۇل وتىرعىزۋ اكتسيالارى مەن الەۋمەتتىك از قامتىلعان وتباسىلار مەن ارناۋلى ەمدەۋ مەكەمەلەرىنە قولداۋ كورسەتۋدى جالعاستىردى.

الماتى قالاسىنىڭ ءبىلىم باسقارماسى بارلىق تۇلەكتەردى, ولاردىڭ اتا-انالارى مەن ۇستازدارىن وقۋ جىلىنىڭ ءساتتى اياقتالۋىمەن شىن جۇرەكتەن قۇتتىقتايدى!

ءاربىر تۇلەكتەر لەگى — شاكىرتتەرىنە جۇرەك جىلۋىن سىيلاعان مۇعالىمدەر مەن ولاردى ارقاشان قولداپ وتىرعان اتا-انالاردىڭ بىرلەسكەن اۋقىمدى ەڭبەگىنىڭ ناتيجەسى. بارلىق بىتىرۋشىلەرگە بولاشاق ماماندىقتى تاڭداۋدا دۇرىس قادام جاساپ, جوعارى وقۋ ورىندارىنا ءساتتى تۇسۋلەرىنە تىلەكتەسپىز. اق جول!

Abai.kz