بۇگىن الماتى قالاسىنداعى «الاتاۋ» ءداستۇرلى ونەر تەاترىنىڭ الاڭىندا جاڭا كونستيتۋتسيانىڭ كۇشىنە ەنگەن كۇنگە ارنالعان «ءبىز، ءبىرتۇتاس قازاقستان حالقى» اتتى اۋقىمدى كونتسەرت ءوتتى.

الماتى قالاسى اكىمدىگىنىڭ قولداۋىمەن وتكەن مادەني ءىس-شارانىڭ نەگىزگى ماقساتى قازاقستاندىق قوعامداعى بىرلىك پەن قوعامدىق كەلىسىم قۇندىلىقتارىن دارىپتەۋ، كونستيتۋتسيانىڭ ەل ومىرىندەگى ماڭىزىن كەڭىنەن ناسيحاتتاۋ جانە تۇرعىندارعا كوتەرىڭكى كوڭىل كۇي سىيلاۋ بولدى.

Open-air فورماتىندا ۇيىمداستىرىلعان كونتسەرتتە ەلىمىزدىڭ تانىمال ەسترادا ونەرپازدارى مەن شىعارماشىلىق ۇجىمدارى ونەر كورسەتتى. ساحنا تورىندە «ابىروي» توبى، ايدانا مەدەنوۆا، «كەشYOU» توبى، Ziruza, «الاش ۇلى» توبى، ەركە، رايم، سادراددين جانە باسقا دا تانىمال ارتىستەر پاتريوتتىق رۋحتاعى شىعارمالارمەن قاتار وزدەرىنىڭ ۇزدىك اندەرىن ورىنداپ، كورەرمەندەردىڭ ىستىق ىقىلاسىنا بولەندى. ولار جينالعان قاۋىمدى جاڭا كونستيتۋتسيانىڭ كۇشىنە ەنگەن كۇنىمەن قۇتتىقتاپ، ەلىمىزدىڭ بەيبىتشىلىگى، تۇراقتىلىعى مەن ءوسىپ-وركەندەۋىنە ارنالعان جۇرەكجاردى تىلەكتەرىن جەتكىزدى.

كەش بارىسىندا جينالعان حالىق الدىندا الماتى قالاسى قوعامدىق كەڭەسىنىڭ مۇشەسى ديدار دىلدابەك، الماتى قالاسى جاستار قوزعالىستارىنىڭ جەتەكشىسى ەرمۇحاممەد پالماعانبەتوۆ، «G35» ستۋدەنتتىك ءوزىن-ءوزى باسقارۋ ۇيىمىنىڭ مۇشەسى ماريام دۋانبەك، «الاشۇلى» توبىنىڭ ءسوليسى ماقسات راحمەت ءسوز سويلەپ، قازاقستان حالقىنىڭ ىنتىماعى، قوعامدىق كەلىسىمى مەن ءوزارا قۇرمەتى – مەملەكەتتىڭ ورنىقتى دامۋىنىڭ نەگىزگى كەپىلى ەكەنىن ەرەكشە اتاپ ءوتتى. سونىمەن قاتار، كونستيتۋتسيا – ەلىمىزدىڭ قۇقىقتىق نەگىزىن ايقىندايتىن، ءاربىر ازاماتتىڭ قۇقىقتارى مەن بوستاندىقتارىن قامتاماسىز ەتەتىن باستى قۇجات رەتىندە مەملەكەتىمىزدىڭ تۇراقتى دامۋى مەن دەموكراتيالىق قاعيداتتارىنىڭ بەرىك تىرەگى ەكەنى ايتىلدى.

كونتسەرت سوڭىندا مىڭداعان الماتىلىق پەن قالا قوناقتارى سۇيىكتى ونەرپازدارىنىڭ ورىنداۋىنداعى اندەردى بىرگە شىرقاپ، كەرەمەت اتموسفەرانىڭ اجىراماس بولىگىنە اينالدى. «ءبىز، ءبىرتۇتاس قازاقستان حالقى» اتتى كونتسەرت كونستيتۋتسيانىڭ ەل ومىرىندەگى ماڭىزىن ايشىقتاپ قانا قويماي، تۇرعىنداردى ورتاق ماقسات پەن ۇلتتىق قۇندىلىقتار توڭىرەگىنە توپتاستىرعان جارقىن مادەني كەش بولدى.

Abai.kz