بۇگىن 2026 جىلعى 23 تامىزعا تاعايىندالعان قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋ ناۋقانى اياسىندا قر ورتالىق سايلاۋ كوميسسياسىنىڭ ءۇشىنشى وتىرىسى ءوتتى. وتىرىسقا سونداي-اق «Respublica» پارتياسىنىڭ باسشىلارى، ەقىۇ دياقب اتىنان بايقاۋشىلار، باس پروكۋراتۋرا، قارجى، ىشكى ىستەر، ادىلەت مينيسترلىكتەرىنىڭ جانە باق وكىلدەرى قاتىستى. سونىمەن قاتار بەينەكونفەرەنتسيالىق بايلانىس ارقىلى وبلىستاردىڭ، ەلوردا جانە رەسپۋبليكالىق ماڭىزى بار قالالاردىڭ اۋماقتىق سايلاۋ كوميسسيالارىنىڭ توراعالارى مەن مۇشەلەرى دە قوسىلدى. 

كۇن تارتىبىنە سايكەس «2026 جىلدىڭ 23 تامىزىنا تاعايىندالعان قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋعا «Respublica» پارتياسى» قوعامدىق بىرلەستىگىنىڭ پارتيالىق ءتىزىمىن تىركەۋ تۋرالى» ماسەلە قارالدى.

ورتالىق سايلاۋ كوميسسياسىنىڭ توراعاسى نۇرلان ءابدىروۆ بۇعان دەيىن وسك-عا 7 ساياسي پارتيانىڭ ءتيىستى قۇجاتتارىن تاپسىرعانىن اتاپ ءوتتى. قازاقستان رەسپۋبليكاسى ورتالىق سايلاۋ كوميسسياسىنىڭ جولداعان سۇراۋىنا سايكەس، ۋاكىلەتتى مەملەكەتتىك ورگاندار پارتيالىق تىزىمگە ەنگىزىلگەن تۇلعالاردىڭ كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى كونستيتۋتسيالىق زاڭ تالاپتارىنا سايكەستىگىنە تەكسەرۋ جۇرگىزدى.

«اعىمداعى جىلعى 7 شىلدەدە «Respublica» پارتياسى قۇرىلتاي دەپۋتاتتارىنىڭ سايلاۋىنا قاتىسۋ ءۇشىن پارتيالىق ءتىزىمىن قازاقستان رەسپۋبليكاسى ورتالىق سايلاۋ كوميسسياسىنا ۇسىندى. ورتالىق سايلاۋ كوميسسياسى زاڭناماعا سايكەس بارلىق قاجەتتى راسىمدەردى جۇزەگە اسىردى. سونىمەن قاتار، قازاقستان رەسپۋبليكاسى ورتالىق سايلاۋ كوميسسياسىنىڭ قۇزىرەتىنە ساياسي پارتيالاردىڭ قۇرىلتاي سايلاۋىنداعى پارتيالىق تىزىمدەرىن تىركەۋ ماسەلەسى جاتادى»، - دەپ اتاپ ءوتتى نۇرلان ءابدىروۆ.

ءوز بايانداماسىندا وسك حاتشىسى شاۆحات وتەمىسوۆ بۇعان دەيىن پارتيا تاراپىنان ورتالىق سايلاۋ كوميسسياسىنا 76 ادامنان تۇراتىن پارتيالىق ءتىزىمدى ۇسىنعانىن ەسكە سالدى. سونىمەن قاتار، كەيىننەن ورتالىق سايلاۋ كوميسسياسىنا كانديدات تەمىرعاليەۆا ءسانيا باقىتجانقىزىنىڭ ءوز ەركىمەن پارتيالىق تىزىمنەن شىعارۋ تۋرالى ءوتىنىشى كەلىپ ءتۇستى.

«ءوتىنىش 2026 جىلعى 11 شىلدەدە كەلىپ ءتۇستى. سايلاۋ تۋرالى كونستيتۋتسيالىق زاڭنىڭ 90 بابى 1 تارماعىنا سايكەس ورتالىق سايلاۋ كوميسسياسى ءوز قۇزىرەتى شەڭبەرىندە «Respublica» پارتياسى» قوعامدىق بىرلەستىگىنىڭ پارتيالىق تىزىمىنەن تەمىرعاليەۆا ءسانيا باقىتجانقىزىن الىپ تاستاۋ بويىنشا ءتيىستى شەشىم جوباسىن ازىرلەدى. وسىنىڭ نەگىزىندە قازىرگى ۋاقىتتا پارتيالىق تىزىمدە 75 ادام بار. ونىڭ ىشىندە 38 كانديدات - ايەلدەر، جاستار جانە مۇگەدەكتىگى بار ادامدار. بۇل كانديداتتاردىڭ جالپى سانىنىڭ 50,7 پايىزىن قۇرايدى. زاڭدا بەلگىلەنگەن كۆوتا ساقتالعان. پارتيالىق تىزىمگە ەنگىزىلگەن بارلىق تۇلعالار كونستيتۋتسيانىڭ جانە سايلاۋ تۋرالى كونستيتۋتسيالىق زاڭنىڭ تالاپتارىنا سايكەس كەلەدى»، - دەپ اتاپ ءوتتى شاۆحات وتەمىسوۆ.

سونداي-اق، وسك حاتشىسى VIII سايلانعان قر پارلامەنتى ءماجىلىسى دەپۋتاتتارىنىڭ سايلاۋىندا پارتيانىڭ 8,59 پايىز داۋىس جيناعانىن ەسكەرە وتىرىپ، «Respublica» پارتياسى سايلاۋ جارناسىن تولەۋدەن بوساتىلاتىنىن ايتتى.

وتىرىس قورىتىندىسى بويىنشا ورتالىق سايلاۋ كوميسسياسىنىڭ مۇشەلەرى ءتيىستى قاۋلىلار قابىلدادى. بۇدان كەيىن ساياسي پارتيانىڭ وكىلدەرى بۇقارالىق اقپارات قۇرالدارىنا ارنالعان بريفينگ بارىسىندا جۋرناليستەردىڭ سۇراقتارىنا جاۋاپ بەردى.

Abai.kz