يمانتاۋ-شالقار كۋرورتتىق ايماعىنداعى كولدە قۇرىلتاي سايلاۋىنىڭ سيمۆوليكاسى بەينەلەنگەن جەلكەندى قايىق ءجۇزدى. سولتۇستىك قازاقستان وبلىسىنىڭ كوركەم تابيعاتى اياسىنداعى جارقىن جەلكەن بۇل باستامانىڭ باستى بەينەسىنە اينالدى.

جەلكەن – العا جىلجۋدىڭ سيمۆولى

جەلكەندى قايىق بەينەسى كەزدەيسوق تاڭدالعان جوق. جەل جەلكەندى كەرىپ، قايىقتى قوزعالىسقا كەلتىرەدى، الايدا ونىڭ باعىتىن ادام ايقىندايدى. ماقساتقا جەتۋ ءۇشىن باعىتتى تاڭداپ، سول جولمەن سەنىمدى تۇردە ءجۇرۋ قاجەت.

جەل وڭىنان سوققاننىڭ وزىندە كەمەگە ناقتى باعىت پەن ەكيپاجدىڭ ۇيلەسىمدى ارەكەتى قاجەت. وسىلايشا جەلكەندى قايىق العا جىلجۋدىڭ، بىرلىكتىڭ جانە تاڭدالعان جول ءۇشىن ورتاق جاۋاپكەرشىلىكتىڭ سيمۆولىنا اينالدى.

ورتاق باعىت جەكە تاڭداۋدان باستالادى

بۇل بەينە الداعى داۋىس بەرۋمەن ۇندەسەدى. سايلاۋ – ءاربىر ازامات ءوز ۇستانىمىن سانالى تۇردە ءبىلدىرىپ، ەلدىڭ الداعى باعىتىن ايقىنداۋعا قاتىسا الاتىن ءسات.

اكتسيانىڭ ءمانىن ۆيدەوروليككە قاتىسقان ەكى باستاماشىل ازامات ءتۇسىندىردى:

«ءبىز بۇل باستامامىز ارقىلى قازاقستاندىقتارعا ەلدىڭ ورتاق باعىتى ارقايسىمىزعا بايلانىستى ەكەنىن ەسكە سالعىمىز كەلدى. جەلكەندى قايىق ءۇشىن دۇرىس باعىتتى تاڭداۋ قانشالىقتى ماڭىزدى بولسا، ازاماتتار ءۇشىن دە ءوز تاڭداۋىن سانالى تۇردە جاساۋ سونشالىقتى ماڭىزدى. سوندىقتان 23 تامىزدا بارشاڭىزدى شەت قالماي، داۋىس بەرۋگە قاتىسۋعا شاقىرامىز».

ولاردىڭ سوزدەرى باستامانىڭ نەگىزگى يدەياسىن ايقىندايدى: ورتاق باعىت ميلليونداعان ازاماتتىڭ شەشىمىنەن قۇرالادى جانە ولاردىڭ ارقايسىسىنىڭ تاڭداۋى ماڭىزدى.

23 تامىزدا قازاقستاندىقتار جاڭا ءبىر پالاتالى قۇرىلتايدىڭ دەپۋتاتتارىن العاش رەت سايلايدى. «قۇرىلتاي جەلكەنى» العا جىلجۋ سانالى تاڭداۋدان باستالاتىنىن، ال ەلدىڭ ورتاق باعىتى ءاربىر ازاماتتىڭ شەشىمىنە بايلانىستى ەكەنىن ەسكە سالادى.

Abai.kz