«حابار» اگەنتتىگىنە قاراستى «24KZ» تەلەارناسىنىڭ تىكەلەي ەفيرىندە ەل تاريحىنداعى تۇڭعىش قۇرىلتاي سايلاۋى قارساڭىندا ساياسي پارتيا كوشباسشىلارىنىڭ قورىتىندى تەلەدەباتى ءوتتى. «دامىعان ەكونوميكا – قۋاتتى قوعام» تاقىرىبىنداعى ءىس-شارا بۇرىن سوڭدى بولماعان اۋقىمدى دەڭگەيدە ۇيىمداستىرىلدى.

بۇل جولى پىكىرسايىس الاڭىندا ساياسي ۇيىمداردىڭ وكىلدەرى ەمەس، ەلىمىزدەگى جەتى پارتيانىڭ كوشباسشىلارى، ياعني «ادىلەت» پارتياسىنىڭ توراعاسى ايبەك دادەباي, «اق جول» دەموكراتيالىق پارتياسىنىڭ توراعاسى دانيا ەسپاەۆا, قازاقستان حالىق پارتياسىنىڭ توراعاسى نۇرسۇلتان شوقانوۆ, «اۋىل» پارتياسىنىڭ توراعاسى قايرات ايتۋعانوۆ, قازاقستاننىڭ جالپىۇلتتىق سوتسيال-دەموكراتيالىق پارتياسىنىڭ توراعاسى اسحات راحىمجانوۆ, Respublica پارتياسىنىڭ توراعاسى ايداربەك حودجانازاروۆ جانە Baytaq پارتياسىنىڭ توراعاسى ازاماتحان امىرتاەۆ ءوزارا ساياسي دەباتقا ءتۇستى.

دەبات بارىسىندا تىكەلەي ترانسلياتسيا ارقىلى ەلدىڭ بارلىق ايماعى قامتىلدى. ءىس-شارا باستالماس بۇرىن ەفيردە جەتى پارتيانىڭ سايلاۋالدى شتابتارىنان تىكەلەي قوسىلىمدار ۇيىمداستىرىلدى. سونىمەن قاتار اگەنتتىكتىڭ اقش، قىتاي جانە ءباا-دەگى مەنشىكتى تىلشىلەرى قازاقستاننىڭ ساياسي ومىرىنە بەيجاي قارامايتىن ازاماتتاردىڭ قاتىسۋىمەن تەلەكوپىر وتكىزدى.

19:00-دە ارنايى پرەۆيۋ-باعدارلامامەن باستالعان باستى دەبات تەك مازمۇنىمەن ەمەس، ۇتىمدى رەجيسسەرلىك شەشىمىمەن ەرەكشەلەندى. بۇل زاماناۋي تەحنولوگيالار، قىزۋ پىكىرتالاس، حالىقارالىق تەلەكوپىرلەر جانە پارتيا جاقتاستارىنىڭ شىنايى ەموتسياسىن ۇندەستىرگەن اۋقىمدى ديسكۋسسيا الاڭىنا اينالدى. ەكراننىڭ ار جاعىندا وتىرعان كورەرمەننىڭ دە ساياسي دوداعا تىكەلەي قاتىسۋىنا مۇمكىندىك جاسالدى. سايلاۋشىلار تولعاندىرعان سۇراقتارىن QR كود ارقىلى پارتيا كوشباسشىلارىنا جولدادى. سول ارقىلى ەل ازاماتتارىنان پارتيا كوشباسشىلارىنىڭ اتىنا 59 مىڭعا جۋىق ساۋال كەلىپ ءتۇستى. سايلاۋشىلاردىڭ سۇراقتارى دەباتتىڭ ءۇشىنشى راۋندىندا ساياسي پارتيالاردىڭ كوشباسشىلارىنا قويىلدى.

كورەرمەن ساياسي دودانى 24KZ تەلەارناسىنان, سونداي اق ارنانىڭ YouTube, Telegram, TikTok, Facebook جانە Instagram جەلىلەرىندەگى رەسمي اككاۋنتتارىنان ونلاين رەجيمدە كوردى.

دەبات بارىسىندا جەتى ساياسي پارتيانىڭ كوشباسشىلارى مەملەكەتتى دامىتۋ، ەكونوميكالىق ساياسات، الەۋمەتتىك سالا جانە ازاماتتاردىڭ ءومىر ءسۇرۋ ساپاسىن ارتتىرۋ باعىتىنداعى ۇسىنىستارىن تانىستىردى.

اشىق پىكىرتالاس ساياسي كوزقاراستاردى سالىستىرۋعا، ورتاق تۇستاردى انىقتاۋعا جانە مەملەكەتتىك ساياساتتىڭ نەگىزگى ماسەلەلەرى بويىنشا پارتيالاردىڭ ۇستانىمدارىنداعى تۇبەگەيلى ايىرماشىلىقتاردى كورۋگە مۇمكىندىك بەردى.

جەرەبە بويىنشا ءبىرىنشى بولىپ ءسوز العان «Respublica» پارتياسىنىڭ توراعاسى ايداربەك قوجانازاروۆ حالىقتىڭ ءال-اۋقاتىن ارتتىرۋ مەن الەۋمەتتىك جاعدايدى جاقسارتۋ، سونىمەن قاتار كاسىپكەرلىكتى دامىتۋعا ارنالعان ۇسىنىستارىن ايتتى.

«Baytaq» پارتياسىنىڭ توراعاسى ازاماتحان امىرتاەۆ كورەرمەننىڭ قازىرگى تاڭدا الدىمەن ەكولوگيالىق ءتۋريزمدى نە ساناتوري-كۋرورتتىق ورىنداردى دامىتقان ءجون بە؟ دەگەن سۇراعىنا ەكوتۋريزم ەكونوميكانىڭ لوكوموتيۆىنە اينالا الاتىنىن مالىمدەدى.  

«اقجول» پارتياسىنىڭ توراعاسى دانيا ەسپاەۆا كەز كەلگەن ۇيىمنىڭ نەگىزگى ماقساتى ەڭبەك ەتكەن ادامعا جول اشىپ، ەل بايلىعىن حالىقتىڭ يگىلىگىنە جۇمساۋ ەكەنىن جەتكىزدى.

«ادىلەت» پارتياسىنىڭ توراعاسى ايبەك دادەباي پارتيا پرەزيدەنتتىڭ ساياسي باعىتىنا تىرەك بولاتىنىنا توقتالىپ، «ادىلەت» ءپرينتسيپى كۇندەلىكتى ءومىرىمىزدىڭ بولشەگىنە اينالۋىنا ءتيىس ەكەنىن مالىمدەدى.

اۋىل تۇرعىندارىنىڭ تابىسىن ارتتىرۋعا قاتىستى ساۋالعا جاۋاپ بەرگەن «اۋىل» پارتياسىنىڭ توراعاسى قايرات ايتۋعانوۆ پارتياننىڭ سايلاۋالدى باعدارلاماسىنداعى باسىم باعىتتاردى ەگجەي-تەگجەيلى ءتۇسىندىردى.

جسدپ پارتياسىنىڭ توراعاسى اسحات راحىمجانوۆ ءوز سوزىندە حالىق جاي عانا جۇمىس ىستەپ قويماي، سوعان لايىقتى تابىس الۋى ماڭىزدى ەكەنىن اتاپ ءوتتى.

قحپ پارتياسىنىڭ توراعاسى نۇرسۇلتان شوقانوۆ ءوز سوزىندە ەكونوميكالىق دامۋ ءار ءوڭىردىڭ وزىندىك ماماندانۋىنا نەگىزدەلۋى ءتيىس ەكەنىن العا تارتتى.

دەباتتىڭ ەڭ مازمۇندى كەزەڭدەرىنىڭ ءبىرى – ازاماتتاردىڭ تىكەلەي قويعان سۇراقتارىنا ارنالعان راۋند بولدى. سۇراقتار لەگى قازاقستان اۋماعىنان عانا ەمەس، شەت مەملەكەتتەردەن دە كەلىپ ءتۇستى.

سونىمەن «باستى دەبات – 2026» اياقتالدى. جەتى ساياسي پارتيا ءوز باعدارلاماسىن، دالەلدەرى مەن ەلدى دامىتۋدىڭ نەگىزگى تەتىكتەرىن ورتاعا سالدى.

دەبات اشىق ساياسي ديالوگ الاڭىنا اينالىپ، سايلاۋشىلارعا پارتيالاردىڭ ۇستانىمىن تىڭداۋعا جانە ولاردىڭ ۇسىنىستارىن ءوزارا سالىستىرۋعا مۇمكىندىك بەردى.

ال ەندى 22:00-دە «24KZ» تەلەارناسىنىڭ تىكەلەي ەفيرىندە ساياسي ساراپشىلاردىڭ قاتىسۋىمەن بۇگىنگى تەلەدەبات بارىسىندا ايتىلعان ۋاجدەر مەن بەرىلگەن ۋادەلەر، ەلدى دامىتۋعا قاتىستى ايتىلعان تەتىكتەر تالقىلانادى.

كورەرمەن تەلەدەباتتىڭ تولىق نۇسقاسىن «24KZ» تەلەارناسىنىڭ YouTube ارناسىنان كورە الادى.

Abai.kz