قىركۇيەكتىڭ ورتا شەنى بولاتىن. ونىنشى سىنىپتان ون ءبىرىنشى سىنىپقا ءوتىپ، ءوزىمىزدى قوي باستاعان سەركەدەي سەزىنىپ، مەكتەپتەگى بەتكە ۇستار بەدەلدى اتانىپ ساندەنىپ جۇرگەن شاعىمىز ەدى. ءبىر كۇنى مامىراجاي تىرلىكتىڭ قايماعى بۇزىلىپ، اياق استىنان الاساپىران باستالدى. سىنىپ جەتەكشىمىزدەن سۇراستىرىپ بىلگەنىمىز، مەكتەپكە ارنايى ءبىلىم ءمينيسترى كەلەتىن كورىنەدى-ءمىس. ايدالاداعى اۋىلدا ءمينيستردىڭ نەسى بار، - دەپ تاڭ-تاماشا بولىپ وتىرسىز با؟ تاڭعالاتىن تۇگى دە جوق. نەسى بار، ءوزىنىڭ ءوسىپ ونگەن اۋىلىن، تۇلەپ ۇشقان مەكتەبىن كورگەلى كەلە جاتىر. ءبىر ەسەپتەن بۇل دا بىزگە وتە ءتيىمدى بولدى. ساباق بولمايدى، ءۇي جۇمىسى دەگەندى اۋزىڭا الماي-اق قوي. تەك قارا بوپ قالقايىپ وتىرساڭ بولعانى. مۇعالىمنىڭ سەنىمەن شارۋاسى جوق. قالام مەن قاعازدى جاڭا كورگەندەي قادالىپ الىپ، جۋرنال تولتىرۋدان، ادىستەمەلىك قۇجاتتاردى رەتتەۋدەن ءبىر باس المايدى-اۋ شىركىن! جينالىس تا جيىلەپ كەتتى. مەن دە شولاق بەلسەندىنىڭ ءبىرى ەدىم، ديرەكتوردىڭ تاربيە ءىسى جونىندەگى ورىنباسارى كەڭسەسىنە شاقىرىپ، ارنايى تاپسىرما جۇكتەدى. تۇسىنگەنىم، وسى ەكى-ءۇش كۇننىڭ ىشىندە اسىعا كۇتكەن قوناعىمىز كەلىپ قالۋعا ءتيىس. Cوعان دەيىن مەن مىكەڭنىڭ اتاعىن اسىرىپ، ايبىنىن اسقاقتاتاتىن ماداق جىرىن جازۋىم كەرەك. جازىپ قانا قويماي، مانەرلەپ وبرازبەن وقىپ بەرۋىم شارت. جاتتاپ السام تىپتەن جاقسى. ساباق بىتكەننەن تۇگەل بوساتىلدىم. توسىن جاڭالىققا توسىرقاپ تۇر ەدىم، ساعان كەرەگى تىنىش جەر بولار، وتىر وندا وسىندا، - دەپ ورىنىن بوساتىپ كەڭسەسىنەن جىلىستاپ شىعا بەردى اپايىم. مىرزا قاماق. ءوزى ءجيى-ءجيى كەلىپ، قۇر ۇيقاس قۋالاعان شيماي-شاتپاعىما ءبىر ءۇڭىلىپ كەتپەسە قانى بويىنا تارامايدى-اۋ دەيمىن.

    «تويدىڭ بولعانىنان بولادىسى قىزىق» دەگەن ماقالدىڭ ءمانىن مەن سوندا ءتۇسىندىم. ەرتەسى سىنىپقا كىرىپ كەلگەندە ءبارىمىزدىڭ اۋزىمىز اشىلعان قالپى، اڭتارىلىپ تۇردىق تا قالدىق. مەكتەپ تە، سىنىپ تا ءبارى ورنىندا، تەك ىشكى كورىنىسى مۇلدەم ادام تانىماستاي وزگەرىپ كەتكەن. تەرەزەنىڭ الدىنا قويىلعان سان الۋان گۇلدەردىڭ جۇپار ءيسى تاناۋىڭدى قىتىقتايدى. ءبىزدىڭ سىنىپ قازاق ءتىلى پانىنە ارنالعاندىقتان نەگىزىنەن ءار ءتۇرلى تىلدىك تالداۋلار، ەرەجە-زاڭجدار جازىلىپ، ادەمى بەزەندىرىلگەن تاقتالار ءىلىنىپتى. ارت جاقتاعى سۋ جاڭا شكافتاردان جوعارى ورنالاسقان كوركەم ءسوز بەن تۇلعالاردىڭ كورنەكى سۋرەتتەرى دە مەن مۇندالاپ تۇر. مۇنىڭ دا سىرى بەلگىلى بولدى كوپ ۇزاماي. اۋداندىق ءبىلىم ءبولىمىنىڭ باستىعى ءوز قاراماعىنداعى  قۇرىعى جەتەر ماڭايدىڭ بار جىلتىراعىن ءۇيىپ-توگىپ وسىندا جيناتىپتى. قوش، مىكەڭنىڭ كەلەتىن كۇنى ەرتەڭ. اۋدانىڭىز بىلاي تۇرسىن انەۋگۇنى اپايدىڭ كەڭسەسىندەگى سورەدەن سۋرەتىن كورگەن وبلىستاعى كىسىنىڭ ءوزى وسىندا ءجۇر. مەن بايعۇستا شىر جوق. وزىمە دە سول كەرەك، نەم بار ەدى اقىنسىماقتانىپ. ماداق جىرىن ديرەكتور ءبىر وقىتادى، اۋدانىڭىز ەكى وقىتادى، وداندا زورى تاعى بار. قۋىرداقتىڭ كوكەسى تۇيە سويعاندا دەمەكشى قاربالاستىڭ كوكەسى ەرتەسى كۇنى تاڭمەن تالاسا باستالدى. بارىنەن بۇرىن ءومىرى گالستۋك تاعىپ كورمەگەندەرگە وبال-اق بولدى. كوگەندەگى قوزىداي باستارىن بۇلعاقتاتىپ، قايتا-قايتا جاعالارىن تۇزەپ، مازالارى كەتتى سابازداردىڭ. ەدەن جۋشى اپايلاردىڭ تىنىمسىز قيمىلدارى وڭدى-سولدى ويقاستاپ جۇرگەن اق ايدىنداعى حوككەيشىلەردەن ءبىر اينىسايشى.  مەكتەپتىڭ الدىنداعى اسفالتقا اق سىزىق سىزىلىپ، ءار سىنىپ ءوز رەتىمەن قاز-قاتار تۇرعىزىلدى. كەشە ءار بالاعا ەكى شاردان الىپ كەلۋ ارنايى تاپسىرىلعان. جۇرتتىڭ ءبارى سول شارلارىن ۇرلەپ،بويلارىن تۇزەپ اۋرە سارساڭعا ءتۇسىپ جاتقاندا “كەلدى،كەلدى”-دەگەن سىبىس شىقتى. ءبارىمىز ىشتەن تىنىپ،ايقارا اشىلعان قاقپاعا قادالدىق. ىلە-شالا ەكى جاققا ىرعالىپ،اياڭداي باسىپ شۋاپ كىرىپ كەلە جاتقان اۋىلدىڭ تابىنىن كورگەندە “دۋ”ەتە تۇستىك. ءانى كەلەدى ءمىنى كەلەدىمەن ساعات ءتىلى سىرعىپ ەكىنى كورسەتتى. ال قوناعىمىزدىڭ توبەسى كورىنەر ءتۇرى جوق. ءبىر مەزەتتە وبلىستاعى كىسىنىڭ تەلەفونى سىڭعىر ەتتى، سويلەسىپ بولعاسىن اۋدانعا سىبىر ەتتى، ديرەكتور جىبىر ەتتى. جامىراپ مەكتەپتىڭ الدىنا شىعىپ العاندارىڭىز جاراماس، سىنىپقا ءوتسىن بالالار دەگەن بۇيرىق جەتتى. جارقىراپ تۇرعان ەدەندى بۇلدىرەر، - دەپ شاكىرتتەردىڭ شوعىرىن بۇزباستان شۋاتقان كۇيدە مەكتەپتىڭ ارتىن اينالدىرىپ، قوسالقى ەسىكپەن كىرگىزبەككە دەنە شىنىقتىرۋ ءپانىنىڭ مۇعالىمدەرى ەرتىپ كەتتى. ارادا از وتپەي تاعى دا تەلەفون سىڭعىر ەتتى، بىرەۋلەر سىبىر ەتتى، بىرەۋلەر جىبىر ەتتى. جوق، مەنسىنبەگەندەي سىنىپقا جايعاسىپ الۋ جاراماس، قوشامەتپەن قارسى الۋ كەرەك، - دەگەن تىڭ اقپارات ەكەن. تاعى دا مەكتەپتى اينالىپ، ەسكى ورىندارىنا كەلدى سالقار كوش. اتام قوي ساناعاندا تۇگەل بولماسا قورادان قايتا شىعارىپ، قايتا سانايتىن ادەتى بار-تىن. مىنا كورىنىس ەرىكسىز سونى ەسكە سالىپ-اق تۇر. كوز الدىمدا اسفالتقا تۋفليلەرى تىقىلداپ، بالالار مەكتەپكە ەكىنشى مارتە ەنىپ بارا جاتتى. ەندىگى زوبالاڭنىڭ بىزگە دە كەلمەسى بار ما. كەلىندى كۇتكەن جەڭگەلەردەي ەسىكتىڭ كوزىنە جيىلىپ تۇرماي ىشكە ەنۋىمىز تالاپ ەتىلدى.

   ارادا ءسۇت پىسىرىمدەي ۋاقىت وتكەندە اسىعا كۇتكەن قوناعىمىز كەلدى-اۋ ايتەۋىر. الدىمەن باستاۋىشتىڭ ەكى ءبۇلدىرشىنى تاقىلداپ تاقپاق ايتىپ، قولدارىنداعى گۇل شوقتارىن ۇسىندى قادىرلى مەيمانعا. كەلەسى كەزەك مەنىكى. ميكروفوندى اۋىزىما تاقاپ(ونىڭ اپپاراتى دالادا قالعانى ەسىمدە جوق)ماداق جىرىن جاڭىلماي وقىپ شىعىپ،تەرەڭ تىنىستادىم.

وزىڭىزبەن مارعاسقام دەپ ماقتانادى ەل بۇگىندە!

باسا نازار اۋداردىڭىز تاربيە مەن بىلىمگە.

وسەر ەلدىڭ ورەندەرى وزىڭىزدەي بولسىن دەپ،

شىن جۇرەكتەن جىر ارنايىن تۋعان انا تىلىمدە!...

   مەكتەبىمىزگە دارىندى تۇلعانىڭ ەسىمى بۇيىرسا دا، ءمۇيىستى بىلتىر اشىلعان-دى. ونى تانىستىرۋ ديرەكتوردىڭ وزىنە جۇكتەلگەن. ءسوزىنىڭ ءسانى قاشىپ، قيۋىن كەلتىرە الماي ابدەن قارا تەرگە مالشىندى. ءبىز دە جارىتىپ ەشتەڭە تۇسىنە المادىق. تاپ وسى تۇستا ەپتى ورىنباسار ورتاعا شىعىپ،مينيسترگە مەكتەپتىڭ مۇراجايىمەن تانىسۋدى ۇسىنىپ،جۇرت نازارىن وزىنە بۇرىپ اكەتتى. باس-اياعى ون بەس مينۋتتىڭ ىشىندە تالاي كۇنگى سارساڭنىڭ سوڭعى نۇكتەسىن قويىپ، اتتانىپ كەتتى قادىرلى قوناعىمىز. سىڭعىرلاي سوققان قوڭىراۋدىڭ ءۇنى سول جاڭالىقتىڭ جارشىسىنداي بولىپ ەستىلدى ماعان. سىنىپتان شىققان دوسىم، قۇر سۇلدەرى قالىپ، سۇلەساپا وتىرعان مەنىڭ جانىما كەلىپ:

-         مىنا ءمينيستردىڭ كەلەتىن ءتۇرى بار ما؟،- دەپ سۇراۋلى جۇزبەن قارادى.                                                                                           

قىدىربەك تاسقىن،

ەۋرازيا ۇلتتىق ۋنيۆەرسيتەتى

فيلولوگيا قازاق ءتىلى

ماماندىعىنىڭ

3-كۋرس ستۋدەنتى

Abai.kz