ەرقانات (ەرقانات تاۋكەباي) ءسوزىڭنىڭ جانى بار. مەن اناۋكۇنى جالاڭاشقا تويعا بارىپ قايتتىم. سول كەزدە ءبىر كىسىمەن تانىستىم. ءوزى جاتتىقتىرۋشى ەكەن. دايىنداعان جىگىتتەرى حالىقارالىق دودالاردا سان مارتە توپ جارىپتى. الدى امەريكاعا دەيىن بارىپ، ارتى مىنا تۇرعان قىرعىزستاننان قايتسا كەرەك. سول كىسى ايتىپ وتىر، چەمپيون جىگىتتەردىڭ كوتەرىلۋىنە ەرمەگياۆتاردىڭ ىقپالى زور دەيدى. جىگىتتەردىڭ بارىپ كەلۋ جولى، جاتىن ورنى، اناۋ-مىناۋى ءبارى سول وتباسىنىڭ موينىندا بولىپتى. لوندون وليمپياداسىنداعى جەتىستىكتەرى تالعاتتىڭ مامان رەتىندە جاساعاندارى. مىندەتى بولدى. ال، مەن ەستىگەندەردىڭ بارلىعى ونىڭ ادامدىق قاسيەتى ەدى. ءوز ەركىمەن، جىگىتتەر ءۇشىن جاساعان. 
ەندى سونداي جىگىتتىڭ مىناداي جاعدايدا قالعانى كوپشىلىكتى تاڭقالدىرعانى راس. ەكسپو دەگەندى سەن مايشەلپەك دەپسىڭ. مەنىڭشە ول باياعى كەسەدەگى ءسۇت سياقتى. «كوبەلەك كەلىپ، كومپ ەتىپ، كوبىگىن ءىشىپ ول كەتتى. جاپالاق كەلىپ جالپ ەتىپ، جارتىسىن ءىشىپ ول كەتتى. قارعا كەلىپ قاڭق ەتىپ، قالعانىن ءىشىپ ول كەتى. ساۋىسقان كەلىپ ساڭق ەتىپ، سارقىپ ءىشىپ ول كەتتى…» دەگەن ەسىڭدە شىعار. «سور قۇدىقتىڭ باسىنا سورعا بولا قوندى اتام» دەگەندەي، تالعاتتاي جىگىتتەردىڭ سونداي جەرگە بارعانىن قولداي قويمايمىز نەگىزى. ويتكەنى، «مەن قالاي تازا بولايىن، عالامنىڭ ءوزى بىلعانىش...» دەگەندەي ونداي جەرلەردەن ءوزىڭدى قانشا ۇستاساڭ دا كىر جۇقتىرماي شىعۋىڭ قيىن. بالاعىڭا كارىقىزى ورالا كەتەتىن ەرمەندى دالا سياقتى عوي. نەمەسە جاۋىندى كۇنى، بالشىق-بالشىق اۋلاعا اق تۋفليمەن شىققانىڭداي جاعداي. ونداي جەرلەر نەگىزىندە «قورعانىس قاباتى» بار، احاي اعايلاردىڭ ورنى عوي. 
ءجا، ول كىسىنى قىلمىسكەر دەۋگە ەشكىمنىڭ قاقىسى جوق. جانە اقتاپ الۋعا دا ءالى ەرتە. كىمنىڭ كىم ەكەنىن زاڭ انىقتايدى. ەگەر سول زاڭىمىز ءادىل بولسا... ءادىل بولسىن دەپ تىلەيىك. ايتپەسە اناۋ الىپ مەكەمەنىڭ قىزمەتكەرلەرىنىڭ اشىق حاتىن وقىدىڭ عوي. سۇمدىق. دەمەك، بۇنداي ۇلكەن ىستەر ءبىز ارالاساتىن نارسە ەمەس. بىزدىكى سول ەلدىڭ ءبىر بالاسى رەتىندە پىكىر ءبىلدىرۋ عانا. راس، ەلدىڭ پىكىرى تالعاتتى جاماناتقا قيمايدى. باياعىدا اتى-شۋلى ءبىر كىسى ءىستى بولعاندا كۇللى ەل ساۋاپ دەدى. نەگە؟ ويتكەنى ەل ونىڭ قاندىقول ەكەنىن، تالايدى قان قاقساتقانىن بىلگەن. ال، تالعاتقا كەلگەندە، كەرىسىنشە «قوي ولاي ەمەس شىعار، وبال بولعان ەكەن» دەپ وتىر. حالىق ايتسا قالت ايتپايدى دەگەن راس بولسا، سوڭى جامان بولماس.
مەن دە ويلايمىن: تالعات سياقتى بايلىعى ءبىر باسىنا جەتەتىن جىگىت، بەس تيىن ۇرلاسا ءوزىنىڭ بەس مىڭ سومىنان ايىرىلىپ قالاتىنىن، ءتىپتى بوستاندىعىنا قاۋىپ تونەتىنىن، قازىرگى جاعدايدان حابارى بار جىگىت، ءاي وندايعا بارا قويمايدى-اۋ. مەنىكى دە ەلدىكى سياقتى جاناشىر وي مەن جوبا عانا. بۇنى دا زاڭ انىقتايدى. ارينە ءادىل بولسا. دەمەك، ەرەما ەر موينىندا قىل ارقان شىرىمەيدى، ەل امان بولسىن دەپ تىلەيىك، قولىڭ تيسە ءۇي جاققا سوعىپ قايت، شار سوعايىق. 
تۇك پايداسى جوق وسى پالە تەزىرەك ءوتىپ-اق كەتسە بولار ەدى.

بەيبىت سارىباي

facebook-تەگى پاراقشاسىنان