رەداكتسيامىزعا Abai.kz اقپاراتتىق پورتالىنىڭ تۇراقتى اۆتورى، اقىن اۋىت مۇقيبەك قوڭىراۋ شالدى. داۋىسى ساڭقىلداپ تۇر.  كوڭىلدى.  كوشى-قونعا، الىستاعى باۋىرلارعا قاتىستى ءبىر جىلى ءسوز ەستىپ، يگىلىكتى ءىستىڭ نىشانىن اڭعارسا، اقىن باۋىرىمىزدىڭ وسىلايشا اڭقىلداپ كەتەتىنى بار. سونى بىلەتىن ءبىز دە مىنا جاقتان دابىرلاي سويلەدىك:

-         ءيا، اۋكە، كوڭىلدىسىز عوي؟!

-         وي، ايتپا. جاقسى اڭگىمە بولدى.

-         كىممەن جاقسى اڭگىمە بولدى؟

-         "سەرپىن" ۇلتتىق جوباسىنىڭ توراعاسى مۇرات ابەنوۆ مىرزامەن. 

-         ا-ا، مۇكەڭمەن بە؟ ءيا، سونىمەن نە اڭگىمە بولدى؟

-         بۇگىن مەملەكەت جانە قوعام قايراتكەرى، «سەرپىن» ۇلتتىق جوباسىنىڭ توراعاسى مۇرات ابەنوۆ مىرزامەن كەزدەسىپ،  «سەرپىن» جوباسىنىڭ اياسىندا شەتەلدەن كەلەتىن ەتنيكالىق قازاق جاستارىن سولتۇستىك ايماقتارعا تارتۋ، وقىتۋ، جۇمىسپەن قامتاماسىز ەتۋ جونىندە اڭگىمەلەستىم. بۇل ماسەلە جونىندە مۇرات اعامىزدىڭ ءوزى دە   ويلانىپ ءجۇر ەكەن. ارى قاراي اڭگىمەمىز جاراسىپ، بۇيىرسا، ءبىراز شرۋالار جاساۋعا كەلىستىك. العاشقى كەزەكتە شەتەلدەن كەلەتىن ەتنيكالىق قازاق جاستارىن سولتۇستىك ايماقتارعا تارتۋدىڭ ناقتىلى جوباسىن ازىرلەۋ كەرەكتىگىنە توقتالدىق.

-         ءاپ-بارەكەلدى! مۇكەڭ بۇرىن ءبىلىم جانە عىلىم مينيسترلىگىندە لاۋازىمدى قىزمەت اتقارعان، ۆيتسە-مينيستر، ونىڭ الدىندا دەپۋتات بولعان ادام عوي. ءىستىڭ ءمان-جايىن ءبىر بىلسە، سول كىسى ءبىلۋى مۇمكىن. ونىڭ ۇستىنە، پايدالانا بىلسەك، شەت ەلدەردەگى قازاق جاستارىنا ەلىمىزدە جوعارى ءبىلىم بەرۋ تۋرالى زاڭ دا بار ەمەس پە؟

-         ءيا، بار. ء «بىلىم تۋرالى» قازاقستان رەسپۋبليكاسى زاڭىنىڭ 66-بابىندا «1.قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار. 2.مەملەكەت شەتەلدەگى قازاق دياسپوراسىنىڭ ءبىلىم الۋ قاجەتتىلىكتەرىن قاناعاتتاندىرۋعا جاردەمدەسەدى» دەپ اشىق جازىلعان. سوعان ساي، ۇكىمەت ءار جىلى شەتەلدەن كەلەتىن 1400 بالاعا دەپ، ارنايى گرانت بولەدى» دەپ جازىلعان.

-         اۋكە، زاڭ-زاكونگە ابدەن باپ بولىپ الىپسىز عوي. كانىگى كاسىبي زاڭگەرلەرشە زاۋلايسىز. ءبىزدىڭ ايتىپ وتىرعانىمىز وسى زاڭ. ءسىز قازىر كوشى-قونعا قاتىستى زاڭ جوباسىن دا پارالمەنت دەپۋتاتتارىمەن بىرگە تالقىلاپ، ساراپقا سالىپ ءجۇرسىز. ول جوبادا سولتۇستىككە قونسىستانۋ تۋرالى ايتىلا ما؟

-         ايتىلادى. ايتىلعاندا قانداي! ەلباسى ۇكىمەتكە ورالمانداردى قونىستاندىرۋدا باسىمدىق بەرىلۋگە ءتيىس بەس وبلىستى بەلگىلەپ بەرگەنىن بىلەسىزدەر. ماجىلىستە تالقىلانىپ جاتقان "حالىقتىڭ كوشى-قونى تۋرالى" جاڭا زاڭ جوباسىندا اتالعان ايماققا قونىستاناتىن اعايىندارعا جەڭىلدىكتەر قاراستىرىلعان.

-         پرەزيدەنت وتكەندەگى ءبىر سوزىندە «قازاقتار، جالپيىپ جاتىپ الماي سولتۇستىككە قاراي جىلجىڭدار» دەگەندى ايتتى. دۇرىس قوي. الايدا، وسى كۇنگى قازاقتىڭ جالپيىپ جاتقىسى جوق. مۇمكىندىك بولسا، جەرى كەڭ، كاسىپ-قارەكەت ەتەتىن تىرشىلىك كوزى بار، جايلى قونىستى جايلاماقشى. ايتكەنمەن دە، بۇگىنگى كۇنگە دەيىن وسى ماسەلە كۇن تارتىبىنە ناقتى قويىلدى ما؟ جوق. ءتىپتى، كەرەك دەسەڭىز، شەت ەلدەردەن كەلگەن قازاقتى قازاعى قالىڭ وڭتۇستىككە عانا جىبەرىپ وتىرعان باسقا بيلىك ەمەس، ءوزىمىزدىڭ قاسقا بيلىك ەدى عوي؟   

-         «ەشتەن كەش جاقسى» دەگەن اتامىز قازاق. «يگىلىكتىڭ ەرتە كەشى جوق» دەگەندى دە سول اتالارىمىز قۇلاعىمىزعا قۇيىپ كەتكەن. سوندىقتان، ءبىر يگىلىكتى ءىس باستالىپ جاتىر ەكەن، ەندى وعان تىلەكشى، جاردەمشى بولايىق. راس،  بۇدان بۇرىنعى جىلدارى دايىندىق بولىمدەرىندە وقيتىن ورالمان ستۋدەنتتەرگە ونسىزدا حالقى لىقسىپ وتىرعان وڭتۇستىكتەگى وبلىستاردىڭ جوو-نا جولداما بەرىلەتىن.  مۇرات ابدۋلاميتۇلىنا وسى جاعدايلاردى بايانداپ بەردىم. وسىدان كەيىن مۇكەڭمەن ەكەۋارا اڭگىمەمىزدە دايىندىق بولىمدەرىندە وقيتىن  قازاق جاستارىن ەندىگى رەتتە  "سەرپىن" باعدارلاماسىنىڭ اياسىنا بەرىپ، ولاردى كەلگەن بەتتە بىردەن حالقى شالاڭ، جۇمىس كۇشى جەتىسپەيتىن سولتۇستىك ايماقتارعا جىبەرگەن دۇرىس دەگەن پىكىرگە توقتادىق. ول ءۇشىن ءبىلىم مينيسترلىگىنىڭ كەلىسىمى كەرەك.

-         بۇلاي بولعاندا، جاڭا كەلگەن جاستار بىتىراماي، دەلدالدارعا دا جەم بولماي، ءبىر ورتالىقتان باسقارىلاتىن بولادى عوي؟

-         قازىردىڭ وزىندە  «سەرپىن» ۇلتتىق جوباسىنىڭ توراعاسى مۇرات ابەنوۆ مىرزا  ون ۇل، ون قىز – جيىنى جيرما بالانى استانا ماڭىنداعى كوللەدجدەن وقىتۋعا ءازىر ەكەنىن ايتتى. وقۋ تەگىن، جاتاقحانا جانە ءۇش مەزگىل تاماقپەن قاماتاماسىز ەتەدى. شارت - "سەرپىندە" كورسەتىلگەن وبلىستاردان بولۋ كەرەك. وقىعىسى كەلەتىندەر ماعان تىكەلەي حابارلاسا بەرسە بولادى.

سۇحباتتاسقان – داۋرەن قاسەنۇلى

Abai.kz