رەسەيدىڭ لدرپ پارتياسىنىڭ ليدەرى ۆلاديمير جيرينوۆسكي «رۋسسكايا سلۋجبا نوۆوستەي» اگەنتتىگىنە بەرگەن سۇحباتىندا ءوزىنىڭ تۇركيادا اسكەري كومەندانت بولۋعا دايىن ەكەنىن مالىمدەدى.

بۇل تۋرالى «موسكۆا-باكۋ» پورتالى اقپارىنا سۇيەنگەن ras.kz حابارلادى.

«مەن 1945 جىلعى بەرليندەگى جۋكوۆ سياقتى، تۇركياداعى ازات ەتىلگەن تەرريتوريالاردا اسكەري كومەندانت بولۋعا دايىنمىن. وندا ىستامبۇلعا بۇرىنعى كونستانتينوپول دەگەن اتىن قايتارىپ، پراۆوسلاۆيە حرامدارىن قالپىنا كەلتىرىپ، ورىس ءتىلىن ەكىنشى مەملەكەتتىك ءتىل جاساۋ كەرەك»، – دەدى جيرينوۆسكي.

ول قازىر تۇركيانى جويىپ جىبەرىپ، ونىڭ تەرريتورياسىن سوندا تۇراتىن بىرنەشە ۇلتتىڭ اراسىنا ءبولىپ تاستاۋ كەرەك ەكەنىن ايتتى.

«تۇركيانىڭ مۇلدەم بولماۋى ءۇشىن تولىق جويىپ جىبەرۋ كەرەك. ونى كۇردتەرگە، ارمياندارعا، گرەكتەرگە، بولگارلارعا ءبولىپ بەرۋ كەرەك. سوندا ءبارىنىڭ اۋزى جابىلادى. ناتو ەشقانداي دا جەلەۋمەن بۇعان ارالاسا المايدى، وعان تۇركيانىڭ كەرەگى دە جوق»، – دەپ ءتۇسىندىردى ساياساتكەر مۇنى.

لدپر ليدەرى بۇل ءۇشىن رەسەيدىڭ اسكەري كومەگى كەرەك بولاتىنىن باعىت سىلتەدى.

«بۇل اسكەري جوسپاردىڭ جۇزەگە اسۋىنا تەك رەسەي عانا كومەكتەسە الادى. كۇردتەر انكارانى ەكى اپتانىڭ ىشىندە-اق باسىپ الۋعا دايىن، ولارعا تەك قازىرگى زامانعى قارۋ-جاراقتار كەرەك. ارمياندار دا كەك قايتارۋدى ارماندايدى، بۇدان ءجۇز جىل بۇرىن ولاردى قىرعىنعا ۇشىراتقان»، – دەپ اتاپ ءوتتى جيرينوۆسكي.

ساياساتكەر وداقتاستارى اراسىنان انكارانى ەشكىمنىڭ دە قورعاۋعا نيەتتى ەمەس ەكەنىنە سەنىم ءبىلدىرىپ وتىر. ولاي بولا قالسا، ءۇشىنشى دۇنيەجۇزىلىك سوعىس باستالىپ كەتەدى.

«ەشتەڭە دە باستالمايدى! بۇل – بوسقا اداسۋ. ەۋروپا ەشقاشان تۇركيا ءۇشىن سوعىسپايدى. ولار ونسىز دا جاقسى تۇرىپ جاتىر. امەريكاعا قايداعى ءبىر تۇرىكتەر ءۇشىن بۇكىل پلانەتانى تۇتىنگە كومۋ نەمەنەگە كەرەك»، – دەپ تۇيىندەدى جيرينوۆسكي.

Nur.kz