رەسەيگە كوشۋشىلەردىڭ كونسۋلدىقتاعى كەزەگى
استانادا رەسەي ەلشىلىگى كونسۋلدىعىنا سول ەلدىڭ «وتانداستار» باعدارلاماسىنا قۇجات وتكىزۋگە كۇنىنە ونداعان ادام كەلەدى. ەلشىلىك مالىمەتىنشە، تمد-دا نەگىزىنەن بۇل باعدارلاماعا قازاقستان ازاماتتارىنىڭ ىقىلاسى ەرەكشە.
انكەتا، مەكەنجاي انىقتاماسى
قاراعاندىنىڭ 24 جاستاعى تۇرعىنى يرينا سميرنوۆا قۇجاتتارىن چەليابينسك قالاسىنا كوشۋ ءۇشىن تاپسىرۋعا كەلگەن. ول تۇراتىن قالا مەن استانا اراسى - 200 كيلومەتر، تەمىر جول ارقىلى - ءۇش ساعات جول. ول جۋىردا ۋنيۆەرسيتەت بىتىرگەنىن، ەندى رەسەيدە جۇمىس ىستەگىسى كەلەتىنىن ايتادى.
بويجەتكەن كونسۋلدىق بولىمگە العاش كەلىپ تۇرعانىن، بىراق ءتيىستى قۇجاتتاردى تۇگەل اكەلگەنىن ايتادى. ول كەرەك قۇجاتتار ءتىزىمىن ەلشىلىكتىڭ كونسۋلدىعى سايتىنان تاپقان.
- قۇجاتتار جيناۋ قيىن ەمەس. قۇجاتتاردىڭ كوشىرمەسىن نوتاريۋس كۋالاندىرۋى كەرەك، بىراق ولاردى اۋەلى اۋدارۋ قاجەت. موردەگى سوزدەر سياقتى قازاق تىلىندە جازىلعان سوزدەردىڭ ءبارىن اۋدارىپ، كۋالاندىراسىڭ. بۇدان بولەك، فوتوسۋرەت پەن مەكەنجايىڭ تۋرالى انىقتاما اكەلەسىڭ، انكەتا تولتىراسىڭ، - دەيدى يرينا سميرنوۆا.
مۇندا ەشكىم «قازاقستاننان نە سەبەپتى كەتكىڭىز كەلەدى؟» دەپ سۇرامايدى. جۇرت كوبىنەسە قۇجاتتى تەز قابىلداۋ ءۇشىن قانداي رەتپەن جيناپ، وتكىزۋگە بولاتىنىن سۇرايدى.
استانا تۇرعىنى يۆان مالىحين قونىستاندىرۋ باعدارلاماسىنا قاتىسۋشى كۋالىگىن الىپ قويعانىن ايتادى. ءمالىحيننىڭ ازاتتىققا ايتۋىنشا، ول قۇجاتتارىن وتكىزگەن كۇنى ءوزى سياقتى جاڭا ءومىر ىزدەپ كوشكىسى كەلەتىن ونداعان ادام كەزەكتە تۇرعان.
- مەن كەزەككە جازىلعان كەزدە بوس ورىن ەكى ايدان كەيىن عانا بولعان، ال قۇجاتتارىمدى قايتا العان كەزدە كەزەك ءتىپتى كوبەيىپ، جۇرت بىرنەشە اي بۇرىن كەزەككە جازىلىپ جاتقان. ماۋسىم ايىندا كەلگەنىمدە، قاڭتارعا كەزەككە جازىپ جاتقان. كوشكىسى كەلەتىندەر وتە كوپ، جۇرت بالا-شاعاسىمەن كەتىپ جاتىر. بۇل - ءبىر عانا استاناداعى جاعداي. قازاقستاندا دەۆالۆاتسيا بولىپ، جالاقىنى قىسقارتتى، جۇرتتىڭ كوشۋىنە مۇنىڭ ءبارى اسەر ەتەدى عوي، - دەيدى يۆان مالىحين.
جۋىردا قازاقستانداعى رەسەي كونسۋلدىعى سايتىندا رەسەي ازاماتتىعىن الۋ جايلى كەڭەس الۋعا جازىلعىسى كەلەتىندەردى الاياقتاردان ساقتاندىرعان حابارلاندىرۋ پايدا بولدى. حابارلاندىرۋدا «الدىن الا وتىرىك جازىلىپ» كەزەكتەگى ورنىن اقشاعا ساتۋعا تىرىساتىن ادامدار بار دەپ جازىلعان.
رەسەيگە كوشۋشىلەر (قاڭتاردا تۇسىرىلگەن ۆيدەو):
رەسەي كونسۋلدىعى سايتىندا جاريالانعان حابارلاندىرۋدا «ەگەر وسى ءماتىندى وقىپ وتىرساڭىز، دەمەك قازىرگى ساتتە قابىلداۋ كەزەگىندە بوس ورىن جوق دەگەن ءسوز. قابىلداۋعا جازىلۋ ءۇشىن بوس ورىن بار-جوعىن كۇن سايىن تەكسەرىپ وتىرىڭىز: كەزەك ءار كۇن سايىن (دەمالىس، مەرەكە كۇندەرىنەن بولەك كۇندەرى) اۆتوماتتى تۇردە اشىلادى. بىراق كەزەككە بۇرىن جازىلىپ قويعانداردىڭ ىشىندە بىرەۋلەر ورنىنان باس تارتسا، بوس ورىن شىعىپ قالۋى مۇمكىن» دەپ جازىلعان.
«29,7 پايىزى قازاقستاننان»
رەسەي فەدەرالدىق كوشى-قون (فمس) قىزمەتى دەرەگىنشە، سوڭعى كەزدە «وتانداستار» مەملەكتتىك باعدارلاماسى بويىنشا بۇرىنعى وداقتاس رەسپۋبليكالاردان رەسەيگە جىل سايىن 100 مىڭنان كوپ ادام كوشەدى. ونىڭ 29,7 پايىزى ءارى بۇل باعدارلاما بويىنشا «ەڭ كوپ ءوتىنىش بەرەتىندەر» - قازاقستان ازاماتتارى. ودان كەيىن - وزبەكستان، مولدوۆا، ۋكراينا، ارمەنيا، قىرعىزستان جانە تاجىكستان ازاماتتارى. رەسەي ەلشىلىگى ازاتتىقتىڭ رەسمي ساۋالىناوسىنداي دەرەكتەرمەن جاۋاپ بەرەدى.
2013 جىلى «وتانداستار» مەملەكەتتىك باعدارلاماسىنىڭ مەرزىمى تاعى جەتى جىلعا ۇزارتىلعان. قازاقستانداعى رەسەي ەلشىلىگىنىڭ مالىمدەۋىنشە، باعدارلاما ىسكە قوسىلعان 2007 جىلدان بەرى تمد ەلدەرىنەن 375 مىڭعا جۋىق ادام كالۋگا، ليپەتسك، ۆورونەج سياقتى وبلىستار مەن ومبى، نوۆوسيبيرسك جانە كالينينگراد قالالارىنا قونىس اۋدارعان.
قازاقستانداعى رەسەي ەلشىلىگى فەدەرالدىق ميگراتسيالىق قىزمەتتىڭ بىلتىرعى قىركۇيەكتەگى دەرەكتەرىنە سىلتەمە جاساپ، ازاتتىققا بۇرىنعى سوۆەتتىك رەسپۋبليكالاردان كوشكەن ازاماتتاردىڭ 41 پايىزىنىڭ - جوعارى ءبىلىمى، 43 پايىزىنىڭ ورتا ارناۋلى ءبىلىمى بار دەپ حابارلادى. ولاردىڭ كوبى - جۇمىس ىستەۋگە جارامدى جاستاعىلار.
رەسەي ەلشىلىگى كوممەنتاريىندە «مەملەكەتتىك باعدارلاما دارىگەر، مۇعالىم سياقتى سۇرانىس جوعارى ماماندار تاپشىلىعىن ازايتۋعا كومەكتەسەدى» دەپ حابارلايدى.
بۇدان بولەك، ميگراتسيالىق قىزمەت بىلتىر تمد ەلدەرىنەن وسى باعدارلامامەن 1500 ستۋدەنت پەن 44 عالىم رەسەيگە كوشكەنىن حابارلايدى.
كونسۋلدىقتىڭ حابارلاۋىنشا، باعدارلاما ستۋدەنتتەر مەن رەسەيدە بيزنەس جۇرگىزگىسى كەلەتىندەر ەسەبىنەن كەڭەيگەن. بۇعان قوسا، باعدارلاماعا قاتىسۋشى ادامنىڭ وتباسى مۇشەسى رەتىندە تانىلاتىن تۋىستارىنىڭ ءتىزىمى دە كەڭەيتىلگەن، «اكىمشىلىك پروتسەدۋرالار سانى قىسقارعان» ءارى كوشەتىندەرگە بەرىلەتىن جاردەماقى كولەمى ۇلعايعان.
«ونشا كوپ كەتىپ جاتقان جوق»
قازاقستان ۇلتتىق ەكونوميكا مينيسترلىگىنە قاراستى ستاتيستيكا كوميتەتىنىڭ ازاتتىققا حابارلاۋىنشا، بىلتىر توعىز اي ىشىندە قازاقستاننان 19 مىڭ ادام رەسەيگە كوشكەن. كوميتەتتىڭ باس مامانى ەربولات مۇسابەكوۆ ء«بىزدىڭ قولىمىزدا 2015 جىلدىڭ مالىمەتتەرى ازىرشە جوق» دەيدى. ونىڭ دەرەگىنشە، 2014 جىلى رەسەيگە 24 مىڭ ادام كوشكەن.
- مەنىڭشە، بۇل - ونشا كوپ ەمەس. بۇرىن – مىسالى، 2005, 2006, 2007 جىلدارى بۇدان دا كوپ – 65 مىڭ، 56 مىڭ ادام كەتەتىن. قازىر ونشا كوپ ادام كەتىپ جاتقان جوق، - دەيدى ەربولات مۇسابەكوۆ.
ستاتيستيكا كوميتەتى قىزمەتكەرىنىڭ ايتۋىنشا، جۇرت «تۋىستارىنىڭ جانىنا كوشكىسى كەلەدى ءارى كەتىپ جاتقانداردىڭ كوبى - جاسى كەلگەن قارت ادامدار».
