رەسەي مەن ۋكراينا اراسىنداعى تەرريتوريالدىق جانجال كۇن ساناپ جاڭا دەڭگەيدە ۋشىعىپ جاتقانى جاسىرىن ەمەس. پوست كەڭەستىك شەكپەننەن شىققان ەكى بىردەي سلاۆيان ۇلتىنىڭ داۋى بۇگىندە الەمدىك ماسششتابقا جەتتتى. ەقىۇ، بۇۇ، شوس ت.ب. بارلىق حالىقارالىق جيىنداردىڭ كۇن تارتىبىندە ۋكراينا-رەسەي جانجالى تالقىعا سالىنىپ، مىنبەردەگى ماسەلەگە اينالدى.

قوس مەملەكەتتىڭ اراسىنداعى قارۋلى قاقتىعىستار بۇگىندە،  اقپاراتتىق سوعىسقا اينالىپ، باق بەتىندە ءبىر-ءبىرىن اشىق سىبىپ، سىناۋعا كوشكەن.

جاقىندا ۋكراينالىق شوۋمەن، تەلەجۇرگىزۋشى، انتيرەسەيلىك پوزيتسياسىمەن كرەمىلدە وتىرعان «ۆوۆا اعانىڭ» اشۋىنا ءتيىپ جۇرگەن ۆلاديمير زەلەنسكي پرەزيدەنت ءپۋتيندى كەزەكتى رەت كەلەمەجگە اينالدىردى.

«كۆارتال 95» ستۋدياسىنىڭ تۇسىرگەن كەزەكتى ساتيرالىق كەشىندە ۆلاديمير زەلەنسكي  رەسەي پرەزيدەنتى پۋتين مىرزانىڭ «ورىس تىلدىلەردىڭ قۇقىعى» تۋرالى ايتقان قۇيتىرقى مالىمدەمەسىنە قايتا شۇيلىكتى.

الەۋمەتتىك جەلىلەر مەن «Youtube» ينتەرنەت كانالىندا تارالىپ كەتكەن بۇل بەينەباياندا ۋكراينالىق اكتەر ءپۋتيندى «و دۇنيەگە» اتتاندىرىپ، اتىنا تەرىس مىنگىزىپ جىبەرگەن.

«قۇرمەتتى ۆلاديمير ۆلايميريچ! ءسىز بىلەسىز بە، اناۋ دۇنيەدە ەشكىم ورىس تىلدىلەردىڭ قۇقىعىن شەكتەپ، قىسىم كورسەتپەيدى ەكەن. سوندىقتان ول جاققا ءوز اسكەرلەرىڭىزدى جىبەرمەي-اق، قويىڭىز»،-دەيدى انتيرەسەيلىك كوزقاراستاعى اكتەر ۆلاديمير زەلەنسكي.

رەسەي پرەزيدەنتىنىڭ تاۋەلسىز، بوتەن مەملەكەتكە اسكەر كىرگىزۋگە قۇمار ەكەندىگىن ءبىز جاقسى بىلەمىز. ۋكراينا، تۇركيا، سيريا سياقتى مەملەكەتتەردىڭ تەرريتورياسىنا باسىپ كىرىپ، اسكەري وپەراتسيا جۇرگىزۋ رەسەي پرەزيدەنتىنىڭ سۇيىكتى ءىسى سەكىلدى كورىنەدى كەيدە. ايتپەگەندە،  بوتەن مەملەكەتتىڭ ىشكى ساياساتىنا قول سۇعىپ، اسكەر جىبەرۋ پۋتين مىرزانىڭ بەيبىتسۇيگىشتىگى ءام بىتىمگەرلىگىن كورسەتپەسە كەرەك. ءتىپتى، ۋكراينا تەرريتورياسىنا تيەسىلى «قىرىمدى» الىمجەتتىلىككە سالىنىپ، تارتىپ العانى دا بار. رەسەي پرەزيدەنتىنىڭ وسى  جانە وزگە دە ساياسي ويىندارى ءام مالىمدەمەلەرى اكتەر زەلەنسكيدىڭ نەگىزگى تاقىرىپتارىنىڭ بىرىنە اينالعان.

پۋتيندە كەتكەن ەلىنىڭ ەسەسىن، كەكەسىن، اجۋامەن الىپ جۇرگەن زەلەنسكيدى بۇل كۇندە بۇكىر ورىسيا حالقى جاقسى تانيدى دەسەك ارتىق ەمەس. سونىمەن قاتار، زەلەنسكيدىڭ زاپىراندى ازىلدەرى ءام ايتپاق بولعان ويى پۋتين مىرزاعا دا جەتىپ تۇرادى. ءتىپتى، كرەمل قوجايىنىنىڭ شابارماندارى بيىلعى جىلى تۇساۋى كەسىلەتىن «8 جاڭا كەزدەسۋ» (8 نوۆىح سۆيدانيا) اتتى ءفيلمنىڭ پرەمەراسىنا زەلەنسكيدى كەلتىرمەيتىن بولعان.

ايتا كەتەيىك، ۋكراينالىق اكتەر زەلەنسكي ەكى مەملەكەت اراسىنداعى الاۋىزدىق وتى تۇتانباس بۇرىن، رەسەيدە تۇرعان.  تەلەارنالاردىڭ جارىق جۇلدىزى بولىپ ءجۇرىپ، ورىس ەستراداسىنىڭ تورىندە ونەر كورسەتكەن. ۋكرايناداعى «مايدان» وقيعاسىنان كەيىن زەلەنسكي ءوزىنىڭ وتانىنا ورالىپ، قاتارداعى ۋكراينالىقتاردىڭ ءبىرى بولدى. كرەمل قوجايىنىنىڭ ۋكراينا تەرريتورياسىنا جاساعان اگرەسسيۆتى باسقىنشىلىعىنان سوڭ، ۆلاديمير زەلەنسكي انتيرەسەيلىك كوزقاراسقا كوشىپ، پۋتين مەن ونىڭ جاقتاستارىن اشىق اجۋالاۋعا كوشكەن.

ايتپاقشى، وسىعان دەيىن، زەلەنسكي مازاعىنىڭ ناسانى بولىپ ۇلگەرگەن ساياساتكەرلەردىڭ ساپىندا – ۆلاديمير پۋتين، دميتري مەدۆەدەۆ، پەتر پوروشەنكو، يۋليا تيموشەنكو، ۆيكتور يانەۋكوچيچ، الەكساندر لۋكاشەنكو، رامزان قادىروۆ ت.ب. بار.

ءيا، رامزان قادىروۆقا قاتىستى قالجىڭى ءۇشىن، زەلەنسكي باق الدىندا كەشىرىم سۇراپ تا ۇلگەرگەن. شەشەنستان باسشىسىنىڭ جەرلەۋ راسىمىندەگى كوز جاسىن كەكەتكەن اكتەر، «قازا كەزىندە تۇرعانىن بىلگەن جوقپىن» دەپ اقتالعان.

دەسە دە، ءوزىنىڭ ساياسي كەكەسىندەرىمەن كوپكە تانىلىپ ۇلگەرگەن ۆلاديمير زەلەنسكي بۇل جولى پۋتين مىرزادان كەشىرىم سۇراماق ەمەس.

ءتۇيىن: ەسكى ءام جاڭا وداقتاسىمىز دەپ ايدارلاپ وتىرعان سولتۇستىكتەگى كورشىمىزگە الاش ارىستارىنىڭ دا، بۇگىنگى قازاقستاننىڭ دا كەتىپ جاتقان ەسەسى قانشا؟ كەشەگى حان كەنەنىڭ باسىنان باستاپ، بۇگىنگى بايقوڭىرداعى بىلىقتار تۋرالى ايتار بولسا، ءبىر ءارتىستىڭ بۇكىل ومىرىنە ازىق بولارلىق تاقىرىپتار بار ەمەس پە دەگەن ويعا كەلدىك. راس، بىزدە وتباسى، وشاق قاسىنان اسپايتىن ارزان ازىلدەر ەكراننان تۇسپەيدى. زەلەنسكيشە پۋتينگە دۇرسە قويماسا دا، استارلاپ جەتكىزۋدىڭ ءجونىن تاپپاسا كەرەك ءبىزدىڭ ازىلكەشتەر. الدە، مەملەكەتتىڭ تسەنزۋرالىق ساياساتى ما تۇرسىنبەكتەردىڭ اۋزىنا بۇعاۋ بولىپ جۇرگەن؟ جوق شىنىمەن، بىزدە باتىل ويلى، سالماقتى، ساياساتتى سىمداي قىلىپ جەتكىزەتىن تالانتتار جوق پا؟

نۇرگەلدى ابدىعانيۇلى

Abai.kz