اقتوبە مەن الماتىداعى تەراكتىلەر ەلىمىزدەگى باستى پروبلەما جەر ماسەلەسىن كولەڭكەدە قالدىرعان جوق پا؟ وسى سۇراققا جاۋاپ ىزدەپ، جەركومنىڭ مۇشەلەرىنە حابارلاسۋدى ءجون سانادىق.

1 سۇراق. لانكەستىك ارەكەتتەر جەر كوميسسياسىنىڭ جۇمىسىن كۇن تارتىبىنەن ىسىرىپ تاستاعان جوق پا؟

2 سۇراق. جەر كوميسسياسىنىڭ توراعاسى اسقار مىرزاحمەتوۆ جەركوم مۇشەلەرىنە الداعى وتىرىسقا ارنايى ۇسىنىسپەن كەلۋدى تاپسىرعان ەدى. قانداي ۇسىنىس دايىنداپ جاتىرسىز؟

جانۇزاق اكىم، عالىم:

1. كەشەگى الماتىدا بولعان وقيعانى ءوز باسىم بۇزاقىلىق دەپ باعالايمىن. تۇرمەدە وتىرىپ شىققان قىلمىسكەر ادامنىڭ ىسىنە بولا حالقىمىز نەگىزگى جەر ماسەلەسىن ۇمىتىپ كەتەدى دەگەنگە سەنبەيمىن. كەشەگى الماتىداعى وقيعانى، وتكەندە اقتوبەدە بولعان لانكەستىك ارەكەتتەردى جەر ماسەلەسىنە بايلانىستىرۋدىڭ قاجەتى جوق. سوندىقتان ەلىمىزدەگى جەرگە قاتىستى قوردالانعان پروبلەمالاردى شەشۋ ءۇشىن كوميسسيا ءوز جۇمىسىن تىنباي جالعاستىرا بەرەدى.

2. بارلىق وتىرىسقا دا ارنايى دايىندىقپەن بارامىز. الداعى وتىرىستا اۋىلدىڭ جايى، اۋىلشارۋاشىلىعىن دامىتۋ ماسەلەسىن كوتەرۋ ويدا بار. جەركومنىڭ جۇمىسى ناتيجەسىندە 7 ملن. گەكتار جەر مەملەكەتكە قايتارىلدى. ەندى ول جەرلەردى قالاي پايدالانۋ كەرەكتىگىن انىقتاۋ كەرەكپىز. ەلدىڭ بولاشاعى ءۇشىن ءوز ۇستانىمدارىمىزدى اشىق ايتاتىن كەز كەلدى. ماسەلەن، جەر كوميسسياسىندا ءالى كۇنگە شەتەلدىكتەرگە جەردى جالعا بەرۋ، بەرمەۋ ماسەلەسى اشىق ايتىلعان جوق. ەكىۇشتى پىكىر ايتۋدى قويىپ، ناقتى ۇسىنىستارمەن ماسەلەنىڭ باسىن اشىپ الۋىمىز كەرەك. بۇل ورايدا جەر ماسەلەسى كولەڭكەدە قالىپ قويدى دەپ قورقۋدىڭ قاجەتى جوق. جەردى ساقتاپ قالۋدىڭ كۇرەسى ەندى عانا باستالدى. سوندىقتان، قوعام ۇيقىدان ويانىپ، بەلسەندىلىك تانىتقانى ءجون.

دوس كوشىم، ساياساتتانۋشى:

1. مەنىڭشە، اقتوبە مەن الماتىداعى تەراكتىلەر جەر ماسەلەسىن ەكىنشى كەزەكتەگى پروبلەما ەتەدى دەپ قورقۋعا نەگىز جوق. جەرگە قاتىستى حالىقتىڭ باياعى كوڭىل-كۇيى وزگەرمەيدى. باياعى تالابىمىز وزگەرمەيدى.

2. جەركومدا ءوز ۇسىنىسىمىزدى ايتۋىمىز ءۇشىن ول جەردەگى ازاماتتاردىڭ ۋاجدەرىن تىڭداپ الۋىمىز قاجەت. مىسالى، وسى ۋاقىتقا دەيىن جەر كودەكسىندەگى كوپتەگەن ولقىلىقتاردى تاۋىپ، ونى تۇزەتۋ كەرەكتىگىن دالەلدەپ بەردىك. ياعني، ءار وتىرىستا ءبىر پروبلەما وزدىگىنەن پايدا بولىپ، وعان تەرەڭىرەك ۇڭىلۋگە مۇمكىندىك الىپ وتىرمىز. جۇمىستى وسى نەگىزدە جالعاستىرا بەرگەن دۇرىس دەپ ويلايمىن.

جەردى جالعا بەرۋ مەن يەلەنۋدەگى اشىقتىقتى قامتاماسسىز ەتۋ كەرەكتىگىن ايتىپ كەلەمىز. بۇعان جەر كوميسسياسىنىڭ توراعاسى اسقار مىرزاحمەتوۆ زاڭ بويىنشا كەيبىر تۇلعالاردىڭ مۇلكىن اشىق جاريالاۋعا تىيىم سالىنعانىن ايتتى. زاڭ سولاي بولعاننىڭ وزىندە حالىق كىمنىڭ قانشا جەردى يەلەنىپ وتىرعانىن، قانداي ماقساتقا پايدالانىپ جاتقانىن ءبىلۋى كەرەك. جەكەمەنشىكتى بىلاي قويىپ، كىم قانشا جەردى مەملەكەتتەن جالعا الىپ وتىرعانىن بىلۋگە ارقايسىمىزدىڭ قۇقىعىمىز بار. ياعني، بۇل ماسەلەدە اشىقتىقتى، جاريالىقتى تالاپ ەتۋ قاجەت دەپ ويلايمىن.

جەركوم جۇمىسىن باستاعالى ءبىراز ماسەلەلەردىڭ بەتى بەرى قارادى. دەسە دە تالقىلاناتىن جايتتار ءالى كوپ.

دايىنداعان قانات بىرلىكۇلى

Abai.kz