وسى ورايدا شوقايتانۋشى عالىم رەتىندە بىزبەن تانىسقىسى كەلەتىنىن، ونىڭ ءساتى بۇگىن تۇسكەنىن ايتىپ، قۋانىشىن ءبىلدىردى. ونىڭ بۇكىل ارمانى 1941 جىلعا دەيىن قازاقستان تاۋەلسىزدىگى ءۇشىن قاجىماي كۇرەس جۇرگىزگەن جانە وسى ۇلى ماقسات جولىندا جانىن قۇربان ەتكەن مۇستافا شوقايدىڭ اتىن ءوزى باسقارىپ وتىرعان مەكتەپكە بەرۋ. بىراق بۇل تۋرالى ءتيىستى ورىندارعا بەرگەن ءوتىنىش قۇجاتتارى ون جىلدان بەرى قابىلدانباي كەلەدى ەكەن.

ءيا بۇل ءار ادام تۇسىنە بەرمەيتىن كۇردەلى ماسەلە. بۇدان قازاقستاندا ۇلتتىق-تاريحي سانانىڭ ءالى تولىق قالپىنا كەلمەگەندىگىن بايقايمىز. ءبىر ماقالامدا جازىپ ەدىم: "ساياسي تاۋەلسىزدىك ءبىر كۇندە كەلەدى. ال سانا تاۋەلسىزدىگى ءبىر كۇندە كەلمەيدى، وعان ونداعان جىلدار كەرەك. ماسەلەن قازاقستان پارلامەنتى 1991 جىلى 16 جەلتوقساندا شەشىم قابىلداپ، ەلدىڭ تاۋەلسىزدىگىن جاريالادى. ءبىتتى. ءسويتىپ قازاقستان سول كەزدە ءبىر مينۋتتا تاۋەلسىز مەملەكەت بولىپ شىعا كەلدى. ال سانا تاۋەلسىزدىگى بولسا، سولاي ءبىر مينۋتتا، ءبىر ساعاتتا، ءتىپتى ءبىر جىل، ون جىلدا پايدا بولا المايدى. كەڭەستىك ۇكىمەتتىڭ قازاق حالقىنىڭ ساناسىنا 74 جىل بويى سىڭىرگەن ءوزىنىڭ ۇلتتىق تاريحىنا، ۇلى مەملەكەت قايراتكەرلەرىنە نۇمقۇرايدى، ءتىپتى ولاردى مەنسىنبەۋ، ساتقىن رەتىندە قاراۋعا نەگىزدەلگەن يدەولوگياسىنان ارىلۋ وڭاي ەمەس. وعان ونداعان جىلدار كەرەك.

ماسەلەن، تاۋەلسىزدىككە 25 جىل تولسا دا، قازاقستان تاۋەلسىزدىگىنىڭ باستى تۇلعاسىنىڭ ءبىرى مۇستافا شوقايعا ءالى دە بولسا ەل ورداسى جانە تاۋەلسىزدىكتىڭ سيمۆول قالاسى دەپ اتالعان استانادا ءبىر كوشە اتى بەرىلمەي وتىرعانىن قالاي تۇسىنەمىز؟ كوشە بىلاي تۇرسىن، ديرەكتورى ون جىلدان بەرى بۇكىل قۇجاتتاردى دايىنداپ جانىن سالىپ ۇكىمەتتىك ورىندارعا ءوتىنىش حاتتار بەرسە دە، ءبىر مەكتەپكە شوقاي اتىنىڭ بەرىلۋىنە ۇلىقسات ەتىلمەي وتىر. بۇعان كىم كەدەرگى بولىپ وتىر؟

ارينە، ءالى كەڭەستىك يدەولوگيادان تاۋەلسىزدىگىن تولىق الا الماي كەلە جاتقان كەيبىر ادامداردىڭ ساناسى. سولاي بولسا دا، كۇنىمحان ديرەكتور ءۇمىتىن جوعالتپاعان. ونىڭ ەندىگى ءۇمىتى، قازاقستان تاۋەلسىزدىگىنىڭ 25 جىلدىعىنا بايلانىستى بيىل بەرىلىپ قالۋى. لايىم سولاي بولعاي!