بيىل ناۋرىزدا تاجىكستان ءىىم ۇيىمداسقان قىلمىسپەن كۇرەس باسقارماسى دۋستي اۋدانىنىڭ 32 تۇرعىنىن سيرياداعى اسكەري ارەكەتتەرگە قاتىسى بار دەگەن كۇدىكپەن تۇتقىنعا الىپ، دۋشانبەگە جەتكىزدى. كەيىن ولاردىڭ 24-ءى بوساتىلدى، قالعان سەگىزى ءالى اباقتىدا وتىر.

دۋستي اۋدانىنىڭ تۇرعىنى ماحمادۋللو ماحمادامينوۆتىڭ حابارلاۋىنشا، ونىڭ ۇلى يسلوميددين ءتورت ايدان بەرى دۋشانبەدەگى №1 تەرگەۋ اباقتىسىندا وتىر. ونىڭ ايتۋىنشا، ۇلىنا 2014 جىلى ماۋسىم-تامىز ايلارىندا سيريادا سوعىستى دەگەن ايىپ تاعىلعان. «بۇل بارىپ تۇرعان جالا. ۇلىم 2014 جىلى 7 شىلدەدە رەسەيدەن ورالدى، 12 تامىزدا ءبىز ونىڭ ۇيلەنۋ تويىن جاساپ بەردىڭ»، - دەدى ول.

دۋستي اۋدانىنىڭ تاعى ءبىر تۇرعىنى مازوري حۋشاكوۆتىڭ ايتۋىنشا، ونىڭ 28 جاستاعى ۇلى اميرجون ءۇش بالانىڭ اكەسى، رەسەيدەن دەپورتاتسيالانعاننان كەيىن ەلدەن ەشقايدا شىقپاعان. «قۇرمەتتى پرەزيدەنت، وسى ءىستى ءادىل شەشىپ بەرۋىڭىزدى سۇرايمىز. مەنىڭ ۇلىم 2014 جىلى 5 قاراشادا رەسەيدەن تاجىكستانعا اۆتوبۋسپەن جەتتى. وعان رەسەيگە بارۋعا تىيىم سالىنعان. ەكى جارىم جىل بويى جەرگىلىكتى بازاردا ارباكەش بولىپ ىستەدى. ۇيىمداسقان قىلمىسپەن كۇرەس باسقارماسىنىڭ 6-ءبولىم قىزمەتكەرلەرى ونى ۇستاپ، دۋشانبەگە جەتكىزدى. نە ءۇشىن ۇستاعاندارىن بىزگە ايتپادى»، - دەدى ول.

دەگەنمەن وسى ءىستىڭ تەرگەۋشىسى بوبوجون حاليموۆ اباقتىدا ازاپتادى دەگەن شاعىمدى جوققا شىعارادى. «بىزدە بۇلتارتپاس ايقاق بار، سونىڭ ىشىندە رەسەي قۇقىققورعاۋ ورگاندارى بەرگەن دالەلدەر جەتكىلىكتى. ەشكىمدى جازىقسىزدان-جازىقسىز ۇستامايدى. ايىپتى دەپ تانۋ ءۇشىن ولار مىندەتتى تۇردە تۇركياداعىداي بىردەمە جارۋى كەرەك پە؟ ازاپتاۋ قولدانىلعان بولسا، ول تۋرالى ادۆوكاتتارىنا نەگە ايتپادى؟ ولاردىڭ بارلىعى دا ادۆوكاتتارىنىڭ قاتىسۋىمەن كۋالىك ەتكەن»، - دەدى تەرگەۋشى.

اباي-اقپارات