جەكسەنبى, 24 قازان 2021
جاڭالىقتار 2668 0 پىكىر 26 تامىز, 2016 ساعات 10:07

تاجىك بيلىگى "يم-ءنىڭ" 516 جيحادشىسىنىڭ كىمدەر ەكەنىن بىلەدى

تاجىكستاننىڭ قۇقىققورعاۋ ورگاندارى تاياۋ شىعىستاعى اسكەري قيمىلدارعا قاتىسقان 516 تۇرعىننىڭ كىمدەر ەكەنىن بىلەدى. تاجىكستان پرەزيدەنتى ەمومالي راحموننىڭ وبلىس بەلسەندىلەرىمەن كەزدەسۋىندە مالىمدەگەندەي، بۇل اقپاراتتار 2014 جىلدان قازىرگى ۋاقىتقا دەيىنگى ارالىقتى قامتيدى. "تىزىمدەگى 164 ادام تۇتقىندالعان، ال 24-ءى ەلىنە قايتارىلعان".

تاجىكستان پرەزيدەنتى حاتلون وبلىسىنداعى قىلمىس دەڭگەيىنە ەرەكشە الاڭداۋشىلىق ءبىلدىردى. ونىڭ ايتۋىنشا، سوڭعى توعىز جىلدا جانە بيىلعى التى ايدا وبلىس اۋماعىندا 40 مىڭ قىلمىس تىركەلگەن، ولاردىڭ 8 مىڭعا جۋىعى - اۋىر قىلمىستار.

پرەزيدەنت قۇقىققورعاۋ ورگاندارىنان قىلمىس دەڭگەيىن تومەندەتۋدى، اسىرەسە حالىقتىڭ ەكسترەميستىك توپتاردىڭ ىقپالىنا ءتۇسىپ كەتۋىن دوعارۋدى تالاپ ەتتى.

تاجىك جاستارىنىڭ سيرياداعى، يراكتاعى جانە كورشىلەس اۋعانستانداعى سوعىستارعا ارالاسۋى - دۋشانبە بيلىگىنىڭ سوڭعى جىلدارداعى باس اۋرۋىنا اينالدى. تاجىكستان بيلىگى 1100 تۇرعىننىڭ ەكسترەميستىك "يسلام مەملەكەتى" ۇيىمىنا كىرىپ كەتكەنىن مالىمدەدى. بۇعان قوسا، 300 ادام تاياۋ شىعىستاعى سوعىستاردا قازا تاپقانى حابارلاندى. بيلىك بۇنى قاۋىپتى ءۇردىس دەپ ەسەپتەيدى.

تاجىكستان بيلىگى سيريا مەن يراكتان ءوز ەركىمەن ورالىپ، بيلىككە بەرىلگەن ادامدارعا راقىمشىلىق جاريالادى. بيلىك "يسلام مەملەكەتى" جانە باسقا دا ەكسترەميستىك توپتار قۇرامىندا سيريا مەن يراكتا سوعىسىپ جۇرگەن تاجىكتەردىڭ ءتىزىمىن ينتەرپولعا ىزدەۋگە بەردى.

اباي-اقپارات

0 پىكىر