• ءماجىلىستىڭ كوشپەلى وتىرىسى الماتىداعى ۇلتتىق كىتاپحانادا ءوتتى
• گۇلميرا يسينباەۆا وزگە ۇلت وكىلدەرى ءۇشىن ىلەسپە اۋدارمانىڭ ءجۇرىپ وتىرعانىن، سوندىقتان جيىننىڭ قازاق تىلىندە وتەتىنىن ەسكەرتتى.

.......................................................................................

بۇگىن الماتى قالاسىنداعى ۇلتتىق كىتاپحانادا قر پارلامەنتى ءماجىلىسىنىڭ كوشپەلى وتىرىسى ءوتتى. «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان جيىنعا «Abai.kz» پورتالىنىڭ ءتىلشىسى دە قاتىسىپ قايتقان ەدى.

ادەبيەت پەن مادەنيەتتەگى ماڭىزدى ماسەلەلەردى سۇزگىدەن وتكىزگەن بۇل جيىنعا قر پارلامەنتى ءماجىلىسى توراعاسىنىڭ ورىنباسارى گۇلميرا يسينباەۆا، قر مادەنيەت جانە سپورت ۆيتسە-ءمينيسترى اقتوتى رايىمقۇلوۆا، ء ماجىلىس دەپۋتاتتارى جانە ءاسانالى ءاشىموۆ باستاعان ۇلت زيالىلارى، قوعام قايراتكەرلەرى مەن ساياساتتانۋشىلار تەگىس كەلىپتى.

الماتىدا العاش رەت وتكەن ءماجىلىستىڭ كوشپەلى وتىرىسىندا كوتەرىلگەن ماسەلەلەردىڭ ءار قايسىسى دەرلىك نىساناعا ءدوپ تيگەنىمەن، كۇرمەۋىن شەشۋ كەيىنگە شەگەرىلدى. مينيسترلىك وكىلدىكتەرى مەن دەپۋتاتتار دايارلاپ اكەلگەن زاڭ جوبالارىنىڭ كەيبىرى شيكى ەكەنىن تاۋەلسىز ساراپشىلار مەن مەملەكەتتىك ورگان وكىلدەرى دە ايتىپ قالدى. مىسالى، ءماجىلىس دەپۋتاتى بەيبىت مامراەۆ تەاتر، مۋزىكا جانە كينو ونەرى، مادەني دەمالىس قىزمەتى، كىتاپحانا جانە رەسپۋبليكالىق مادەني ۇيىمداردى قايتا قۇرۋ مەن تاراتۋ ماسەلەرى جونىندە «ۋاكىلەتتى ورگانمەن كەلىسۋ بويىنشا» دەگەن وزگەرتۋ ەنگىزۋدى ۇسىنعان. بۇل وزگەرتۋگە سايكەس،  رەسپۋبليكا كولەمىندە قۇرىلاتىن نەمەسە تاراتىلاتىن كەز كەلگەن بىرلەستىك، ۇيىم نەمەسە مادەنيەت وشاقتارى تەگىس جەرگىلىكتى باسقارۋ ورگاندارىنىڭ باقىلاۋىنا وتەتىن بولادى.

ءماجىلىستىڭ كوشپەلى وتىرىسىنا قاتىسقان الماتى قالاسى اكىمىنىڭ ورىنباسارى ارمان قىرىقباەۆ مىرزا زاڭ جوباسىنا ۇسىنىلعان وزگەرتۋدىڭ ولقى ەكەنىن ەسكەرتىپ، قايتا قاراۋعا قالدىرۋدى سۇرادى.

ارمان قىرىقباەۆ، الماتى قالاسى اكىمىنىڭ ورىنباسارى:

-بۇل زاڭ جوباسىن كونتسەپتۋالدى تۇردە قولداۋعا بولادى. بىراق، رەسپۋبليكا كولەمىندەگى بارلىق ۇيىمداردى اشۋ مەن جابۋدى جەرگىلىكتى باسقارۋ ورگانىنا مىندەتتەۋ دۇرىس ەمەس دەپ ەسەپتەيمىن. مۇمكىن وڭىردەگى ۇيىمنىڭ جابىلۋىن باقىلاۋدا ۇستاۋعا بولاتىن شىعار، الايدا ءار ءبىر اشىلاتىن ءىرىلى-ۇساقتى ۇيىمدى اكىمشىلىك ءوز اكتيۆىنە الا المايدى. سەبەبى، ءاربىر ۇيىمدى باسقارۋ ءۇشىن بيۋدجەت كەرەك. سولاي عوي. دەمەك، سالماق قالا بيۋدجەتىنە تۇسەدى. سوندىقتان، بۇل وزگەرتۋ ەنگىزۋ تۋرالى ۇسىنىستى تەك كونتسەپتۋالدى تۇردە قولداۋعا بولادى. جانە ءبىر ايتا كەتەرلىگى، مەن ءوز باسىم سوڭعى 5-10 جىلدا وڭىردە جابىلىپ قالعان تەاتر نەمەسە وداقتى ەستىمەدىم. مۇمكىن سوناۋ شالعاي ايماقتاردا بار شىعار. جانە بۇل زاڭ جوباسىن وزگەرتۋ ءۇشىن الدىمەن جۇمىس توبى بۇكىل وبلىستاردىڭ پىكىرىن ءبىلىپ الۋى كەرەك دەپ ويلايمىن. شەشىمدى سودان كەيىن عانا قابىلداعان دۇرىس بولار.

جالپى العاندا ءماجىلىستىڭ كوشپەلى جيىنىندا 15 پوزيتسيادان تۇراتىن 4 وزگەرتۋ قارالدى. سونىڭ ىشىندە تەاتر جانە كينوداعى تىلدىك نورمالاردىڭ ساقتالۋى (بەيادەپ سوزدەرگە شەكتەۋ قويۋ), وڭىرلەردە كىتاپحانا جۇمىستارىن ۇيلەستىرۋ، قوعامدىق جانە مەملەكەتتىك ۇيىمداردى قۇرۋ جانە تاراتۋ، كوركەم شىعارمالاردى ساتىپ الۋ جانە قالامگەرلەرگە قالاماقى تولەۋ ت.ب. ماسەلەلەرى تالقىلاندى.

50-دەن استام ۇيىمنىڭ (مەملەكەتتىك جانە قوعامدىق) وكىلى قاتىسقان كوشپەلى وتىرىستى ءماجىلىس دەپۋتاتى بەكبولات تىلەۋحان جۇرگىزىپ وتىردى. القا-قوتان جيىندى قر پارلامەنتى ءماجىلىسىنىڭ ۆيتسە-سپيكەرى گۇلميرا ىستايبەكقىزى اشىپ، وزگە ۇلت وكىلدەرى ءۇشىن ىلەسپە اۋدارمانىڭ ءجۇرىپ وتىرعانىن، سوندىقتان جيىننىڭ قازاق تىلىندە وتەتىنىن ەسكەرتتى.

گۇلميرا يسينباەۆا، قر پارلامەنتى ءماجىلىسىنىڭ ۆيتسە-سپيكەرى:

-VI سايلانعان پارلامەنتتىڭ 1-سەسسياسىن اشقان كەزىندە ەلباسى نۇرسۇلتان ءابىشۇلى قابىلداناتىن زاڭ جوبالارىن قوعامدىق تالقىلاۋدان وتكىزۋدى تاپسىرعان بولاتىن. قابىلداناتىن زاڭ جوباسىنىڭ نەمەسە وعان ەنگىزىلەتىن وزگەرىستەردىڭ ونىمدىلىگىن ارتتىرۋدا مۇنداي جيىننىڭ ماڭىزى وتە زور ەكەنى داۋسىز. زاڭ جوباسىنا دەپۋتاتتار باستاماشى بولعانىمەن، وعان قاتىستى ناقتى ماسەلەلەردى سول سالانىڭ ماماندارى ءجىتى بىلەدى. سوندىقتان، زاڭدى قابىلداۋدا نەمەسە وزگەرتۋ ەنگىزۋدە ساراپشىلاردىڭ دا پىكىرىن ەسكەرىپ، ءپىسىرىپ، جەتىلدىرىپ بارىپ ۇسىنۋ ءتيىمدى.

بەكبولات تىلەۋحان، قر پارلامەنتى ءماجىلىسىنىڭ دەپۋتاتى:

-شىنىندا دا وسى قازاق مادەنيەتىنىڭ، ادەبيەتىنىڭ تاريحىندا ويىپ الار ورنى بار دەگەن، ارقاسى اتان تايدىرارداي دارداي تۇلعالاردىڭ ءبىرازى وسى جەردە بولدى. وزدەرىنىڭ پىكىرلەرىن ءبىلدىردى. اششى ايتىپ وتىر، ورىندى ايتىلىپ وتىر. ارينە، مۇنىڭ بارلىعى ەسكەرىلەدى. ءبىز ۇسىنعان جوبالارعا قاتىستى ءالى دە بولسا ۇكىمەتتىڭ قورىتىندىسىن كۇتەمىز. جەڭىستى جوبالار دا جوق ەمەس. مىسالى، دەپۋتاتتىق كورپۋستان كەتكەن نارسە – مىنا جازۋشىلاردىڭ ەڭبەگىنە ساي قالاماقىلارىن الۋ ماسەلەسى بولدى. قازىر ۇكىمەتتىڭ قاراۋىنا جىبەرىلدى. بۇل زاڭدار قازىر تالقىلانۋ ۇستىندە عوي. بىراق، بارىسىن كورىپ وتىرسىزدار جامان ەمەس. اسىرەسە، مادەنيەت قىزمەتكەرلەرىنىڭ تالاپتارىن قاناعاتتاندىراتىن زاڭ جوبالارى قابىلدانىپ جاتىر. جەرگىلىكتى اكىمدىكتىڭ ۇيىمداستىرۋىمەن وتكەن بۇگىنگى جيىنىڭ جالپى قورىتىندىسى كوڭىل كونشىتەرلىك بولدى دەپ ەسەپتەيمىن.

ءماجىلىستىڭ كوشپەلى وتىرىسىنان نۇرگەلدى ابدىعانيۇلى

Abai.kz