قازىرگى زامانداعى جاھاندانۋ ءۇردىسى جاعدايىندا ادام ءومىرىنىڭ بارلىق سالاسىندا ءتىل ساياساتى ساياسي جانە ەكونوميكالىق وقيعالارمەن، ۇردىستەرمەن تىعىز بايلانىستى بولىپ وتىرعانى بەلگىلى. ءتىل ساياساتى ونى تەوريالىق تۇرعىدان تانىپ-بىلۋدەن باستاپ، ونىڭ قولدانبالى جاعىنا دەيىنگى ارالىقتىڭ بارلىعىن قامتيدى. ءتىل ساياساتىن بىرقالىپتىلىقپەن جۇرگىزۋدىڭ وبەكتيۆتىك قيىندىقتارى دا بولادى. ول قيىندىقتار، ەڭ الدىمەن، ءتىلدىڭ قارىم-قاتىناس قۇرالى بولۋىمەن جانە بەلگىلى ءبىر ۇلتتىڭ ءتول بەلگىسى بولۋىمەن بايلانىستى. ويتكەنى وسى اتالعان قيىندىقتار ءتىلدىڭ تولىققاندى  قارىم-قاتىناس قۇرالى بولۋى ءۇشىن جەتكىلىكتى دارەجەدە جاسالماي جاتقان ىقپالداردان باستالادى.

قازاق ءتىلى [سيمۆول] قازاقستان رەسپۋبليكاسىنىڭ مەملەكەتتىك ءتىلى. سوندىقتان قازاق ءتىلىن مەملەكەتتىك ءتىل مارتەبەسىندە دامىتۋ ساياساتى مەملەكەت، ۇكىمەت، قازاق حالقى مەن قازاقستان حالقى اسسامبلەياسى تاراپىنان جۇرگىزىلەتىن بارلىق جۇمىستار مەن ءىس-شارالاردىڭ جيىنتىعى بولىپ تابىلادى. بارلىق اتقارىلعان جۇمىس قازاق ءتىلىن مەملەكەتتىك ءتىل مارتەبەسىندە ساقتاۋ، قورعاۋ، دامىتۋ، سونىڭ نەگىزىندە قازاق ءتىلىنىڭ فۋنكتسيونالدىق ايماعىن كەڭ قامتۋ باعىتىندا ىسكە اسىرىلادى.

قازاق ءتىلى جۇيەسىنىڭ نورماسى [سيمۆول] وز بولمىسىندا ىرگەتاسى مىقتى، دىبىستىق جۇيەسى مەن لەكسيكاسى باي، سوزجاسامدىق مەحانيزمى وزىق، گرامماتيكاسى تەرەڭ تامىرلى الىپ بايتەرەكتى بىلدىرەدى دەسەك قاتەلەسپەيمىز. ويتكەنى قازاق ءتىلى [سيمۆول] ماعجان جۇماباەۆ «التىن ءتىلىم» دەپ جىرلاعانداي، باعالى مەتالل بولىپ تابىلاتىن التىننىڭ دا قاسيەتىنە يە بولىپ وتىرعان قاسيەتتى تىل.

التىننىڭ مەتالل رەتىندەگى باستى قاسيەتى - ونىڭ ءتۇرلى حيميالىق رەاكتسيالار مەن پروتسەستەرگە دەگەن شىدامدىلىعى. سونىمەن بىرگە التىن وتە جاقسى جىلۋ وتكىزگىش بولىپ تا سانالادى. التىننىڭ تاعى ءبىر ماڭىزدى قاسيەتى – ونىڭ نىعىزدىعى. قازاق ءتىلىنىڭ دە وسىنداي قاسيەتىنە بارلىق ۋاقىتتا قازاق حالقى دا، قازاقستاندىقتار دا كۋا بولىپ كەلەدى. قازىرگى اۋىزشا قازاق ءتىلىنىڭ كوپولشەمدى جۇيەسىندە ساقتالعان قانشا سۋبستارت، ادسترات، سۋپەرسترات بولىپ بولۋگە بولاتىن تىلدىك قاباتتار بار! تاريحتىڭ قانشا داۋىلى سوقسا دا، قازاقتار الەمگە تاراپ كەتسە دە، بىرتۇتاستىعىن ساقتاعان قازاق ءتىلى سول تاراپ كەتكەن قازاقتاردىڭ ءوزىن تانۋى مەن باۋىرىن تانۋىنىڭ، وتانىن تانۋىنىڭ بەلگىسى عانا ەمەس، قۋاتتى قوزعاۋشى كۇشىنە اينالىپ وتىر. قازاقستاننىڭ ءتورت تاراپىنان كەلگەن قازاقتار عانا ەمەس، شەتەلدىك قازاقتاردىڭ دا ەش ديالەكتى دەگەنگە كەزدەسپەي، قىسىلماستان ءوزارا  قازاقشا ەركىن سويلەۋىنىڭ ءوزى ءتىلىمىزدىڭ نىعىز دا بىرقالىپتى ساقتالعان التىننىڭ سيپاتىنا يە ءتىل ەكەنىن دالەلدەيدى. بۇل تۇستا احمەت بايتۇرسىنۇلىنىڭ: «ءتىلدىڭ مىندەتى - اقىلدىڭ اڭداۋىن اڭداعانىنشا، كوڭىلدىڭ ءتۇيۋىن تۇيگەنىنشە، قيالدىڭ مەڭزەۋىن مەڭزەگەنىنشە ايتۋعا جاراۋ. ايتا الاتىن ادامى تابىلسا، ءتىل شاما-قادىرىنشا جارايدى. بىراق ايتا الاتىن ادام تابىلۋى قيىن»، - دەگەن ءسوزى وتە ورىندى بولماق.

ۋاقىت قازاق ءتىلى جۇيەسىن دە، سويلەۋ ەرەكشەلىكتەرىن دە، ونىڭ ىشىندە لەكسيكالىق، ونوماستيالىق، تەرميندىك ياعني بارلىق لەكسيكالىق تەتىكتەرىن دە قارقىننان قالمايتىن قوزعالىسقا ءتۇسىردى.

بىراق زاماننىڭ ءوزىنىڭ سول كەزدە ۇستانعان ساياساتى مەن ەكونوميكالىق باعىتتارىن تاريح پاراقتارىنا «ءمور ەتىپ» باسىپ قالدىراتىن ءبىر ەرەكشە «قىزمەتى» بار. زاماننىڭ ءمورى، اسىرەسە، جەر مەن سۋ، مەكەن، كوشە، اۋىل اتاۋلارىنا بايلانىستى قاتتى سوعىلىپ، ولاردى كەتىرۋ وتە شابانداپ قالىپ جاتادى.

تاۋەلسىزدىك – جەر مەن سۋ دەگەن كيەلىمىزدىڭ ءتول اتاۋلارىن «زىنداننان شىعارىپ»، موينىنا تۇسكەن بودان بۇعاۋىن سىپىرىپ الىپ تاستاۋدان باستالادى.

استانا قالاسىندا  2016 جىلعى 6 قىركۇيەكتە وتكەن «ونوماستيكا جانە كورنەكى اقپارات: مىندەتتەر مەن ۇسىنىستار» اتتى سەمينار-كەڭەسىنىڭ ماتەريالدارىنا سۇيەنسەك، بۇگىنگى كۇنى قازاقستان رەسپۋبليكاسىنىڭ جەرىندە  «لەنين، سوۆەت، وكتيابر، الەكسەەۆكا، نيكولاەۆكا، انتونوۆكا، كوممۋنيستيچەسكايا، پرولەتارسكايا، پياتيلەتكا، سەميلەتكا، 25 لەت وكتيابريا، 40 لەت وكتيابريا، 50 لەت وكتيابريا، 60 لەت وكتيابريا، 21 پارتسەزدا، 22 پارتسەزدا، 30 لەت ۆلكسم، 50 لەت ۆلكسم، 60 لەت ۆلكسم، 50 لەت كاز سسر، بۋدەننوۆكا، كومسومولسكايا، پيونەرسكايا، تسەليننايا، ماركس، ەنگەلس، باۋمان، كيروۆ، تۋحاچەۆسكي، ۋريتسكي، فرۋنزە، كوتوۆسكي، دزەرجينسكي، كالينين» اتاۋلارىنىڭ الىنىپ تاستالماق تۇگىلى، جۇزدەپ كەزدەسەتىنى تۋرالى «ونوماستيكالىق جۇمىستاردىڭ بۇگىنگى جاي-كۇيى جانە ونى جەتىلدىرۋ جولدارى» اتتى بايانداماسىندا قازاقستان رەسپۋبليكاسى پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى بالاەۆا ايدا عالىمقىزى اتاپ كورسەتتى.

بۇل ويدى وسى سەميناردا ءسوز سويلەگەن تىلدەردى دامىتۋ جانە قوعامدىق-ساياسي جۇمىس كوميتەتى توراعاسىنىڭ ورىنباسارى مەلدەشوۆ عالىمجان سارسەنبايۇلى دا قوستاپ، ماسەلەگە سان قىرىنان تالداۋ جۇرگىزىلگەن بايانداما جاسادى.

ونوماستيكا – قازاقستان رەسپۋبليكاسىنىڭ تاۋەلسىزدىگىن پاش ەتىپ تۇراتىن كوك تۋدان ءبىر كەم تۇسپەيتىن ۇلكەن سالا. ويتكەنى قازاقستاندا تۋعان جاس ۇرپاق ەسىن بىلگەن كەزدەن-اق، اينالاسىنا كوز تاستاپ، دۇنيەنى تانۋدى جەردىڭ، سۋدىڭ، كوشەنى، قالانىڭ، اۋىلدىڭ اتىن مەڭگەرۋدەن باستايدى. سودان باستاپ ەركىن ەلدىڭ ەر ۇرپاعىن تاربيەلەۋ ماسەلەسى قاراما-قايشىلىقتارعا تولى بولماي، داڭعىل جولمەن جۇرەتىندەي اشىق بولۋىن ويلاۋىمىز كەرەك. قازاقستاننىڭ جەرىنە قوناق بولىپ كىرگەن كەز كەلگەن شەتەلدىك ونىڭ جەرىنىڭ، سۋىنىڭ اتاۋىن كورگەننەن-اق، تاۋەلسىز ەلدىڭ بولمىسىن تاني الاتىنىنا ەش داۋ بولماسى حاق. سوندىقتان وسى سالادا ءالى دە بولسا قارقىنمەن جاسايتىن جۇمىستار شاش-ەتەكتەن.

قازاق ءتىلىن مەملەكەتتىك ءتىل مارتەبەسىندە، قازاق ۇلتىنىڭ انا ءتىلى دارەجەسىندە، قازاقستاندىقتاردىڭ قارىم-قاتىناس ءتىلى دەڭگەيىندە دامىتۋدىڭ وڭتايلى ءتاسىلى  [سيمۆول] قازاق ءتىلىن، قازاق مادەنيەتىن جانە تەحنولوگيانى بىرىكتىرۋ ارقىلى تۇتاس دۇنيە ازىرلەپ ۇسىنۋ دەپ سانايمىز. وسى رەتتە ماڭىزدى جۇمىستاردىڭ ءبىر باعىتى رەتىندە تىلدەردى دامىتۋ جانە قوعامدىق-ساياسي جۇمىس كوميتەتى جوسپارلى تۇردە بىرقاتار ءىس-شارالار اتقارىپ كەلەدى. وسىنداي اۋقىمدى جوبالاردىڭ ءبىرى «ءتىل الەمى» ينتەرنەت-پورتالىن، «اتاۋ.كز» ونوماستيكالىق، «تەرمينكوم.كز» تەرمينولوگيالىق، «ەملە.كز» ورفوگرافيالىق ەلەكتروندىق بازالارى ازىرلەنىپ، قولدانىسقا ۇسىنىلدى. كوميتەت تاپسىرماسىمەن ازىرلەنگەن بۇل  جوبالاردى دايىنداۋدا شايسۇلتان شاياحمەتوۆ اتىنداعى تىلدەردى دامىتۋدىڭ رەسپۋبليكالىق ادىستەمەلىك-ۇيلەستىرۋ ورتالىعىنىڭ قوسقان ۇلەسى زور.

«اتاۋ.كز» اتتى ونوماستيكالىق ەلەكتروندىق بازا دايىندالدى. بۇل بازاعا بارلىق وڭىرلەردەگى قالا، ەلدىمەكەن اتاۋلارى، ءىرى قالالارداعى كوشە اتاۋلارى، مادەني نىسان اتاۋلارى ەنگىزىلدى. سايتتىڭ جۇمىسى ونوماستيكاعا قاتىستى جۇمىستاردىڭ بارشاعا اشىقتىعى مەن قولجەتىمدىلىگىن قامتاماسىز ەتەدى.

پورتال تۋرالى تىلدەردى دامىتۋ جانە قوعامدىق-ساياسي جۇمىس كوميتەتىنىڭ توراعاسى ق.ج. اسىلوۆ: «جالپى جۇرتشىلىقتىڭ ءتىل مادەنيەتىن ارتتىرۋدى،  مەملەكەتتىك ءتىلدىڭ قولدانىلۋ اياسىن كەڭەيتۋدى، ونلاين جانە وففلاين رەجيمىندەگى ساباقتار ارقىلى ءتىل ۇيرەنۋشىلەردىڭ قازاق، ورىس، اعىلشىن تىلدەرىنەن ءبىلىمىن تەرەڭدەتۋدى كوزدەيتىن پورتالدىڭ  بولاشاعى جارقىن بولعاي!» - دەپ، اق تىلەگىمەن پورتالدىڭ تۇساۋىن كەستى.

پورتالدىڭ قولدانىلۋ اياسىن كەڭەيتۋ ماقساتىندا كۇندەلىكتى اقپاراتتار لەگىمەن الماسىپ وتىراتىن جاڭالىقتار جانە قوعامعا قاجەتتى تەرميندەرگە قاتىستى ەكى بلوك ءۇش گرافيكادا بەرىلەدى (كيريلل، لاتىن، اراب). بۇل قولدانۋشى وقىرمانداردىڭ سانىن ارتتىرادى، مەملەكەتتىك ءتىلدىڭ ناسيحاتتالۋ اۋقىمىن كەڭەيتەدى. اتاپ ايتقاندا، قىتايدا، وزبەكستاندا، تۇركىمەنستاندا، تۇركيادا جانە ەۋروپادا تۇراتىن قازاقتار پورتالداعى ماتەريالدارمەن تانىسا الادى.

«ءتىل الەمى» پورتالى مەن «Atau.kz» ونوماستيكالىق، «Emle.kz» ورفوگرافيالىق، «Termincom.kz» تەرمينولوگيالىق سايتىنىڭ ىسكە قوسىلۋى ينتەرنەت كەڭىستىگىندەگى تىلدىك كونتەنتتىڭ كوبەيۋىنە، ونى قولدانۋشىلار سانىنىڭ ارتۋىنا، مەملەكەتتىك ءتىلدى قاشىقتىقتان ۇيرەنۋشىلەر قاتارىنىڭ وسۋىنە مۇمكىندىك جاسايدى.

مەملەكەتتىك ءتىلدىڭ قولدانىلۋ اياسىن كەڭەيتۋ، مەملەكەتتىك ءتىلدى ۇيرەتۋدىڭ ءتيىمدى ادىستەرىن تاراتۋ، ەلىمىزدەگى ءتىل ورتالىقتارىنىڭ جۇمىستارىن ۇيلەستىرۋ، ءتىلدى قاشىقتىقتان ۇيرەتۋگە مۇمكىندىك تۋعىزۋ جانە ت.ب. وزەكتى ماسەلەلەردى شەشۋدى ماقسات ەتەتىن سايتتار مەن پورتال ءتىلدىڭ الەۋمەتتىك، قوعامدىق قۇبىلىس رەتىندەگى قىزمەتىن مەيلىنشە تولىق قامتيتىن 1)تۇعىر; 2)اقپارات; ءادىس;  4) ءتىل رايى;  5) تارتۋ; 6) تولعانىس; 7) ورتا سياقتى بلوكتاردان تۇرادى. بۇل جوباعا عالىمدار توبى بەلسەنە اتسالىستى. «تۇعىر» بلوگى قازىرگى «باسقى بەت» قىزمەتىن اتقارادى. بۇل باستاپقى بەتتە پورتالدىڭ قۇرىلىم اتاۋلارى، ياعني نەگىزگى بلوكتار جانە جاناما بلوكتار، سونىمەن بىرگە باسقا سايتتارعا سىلتەمەلەر ورنالاستىرىلادى. «اقپارات» بلوگىندا جاڭالىقتار، ءتىلدىڭ وزەكتى ماسەلەلەرى تۋرالى قاجەتتى مالىمەتتەر، مينيسترلىك، كوميتەت، ورتالىق تاراپىنان جۇرگىزىلىپ جاتقان جۇمىستار جونىندە حابارلار بەرىلەدى. بۇل بلوك ۇنەمى جاڭارىپ، تولىعىپ تۇرادى.              «ءادىس»  بلوگىندا قازاق، ورىس جانە اعىلشىن تىلدەرىن وقىتۋعا ارنالعان ادىستەمەلىك ەڭبەكتەر ورنالاستىرىلادى. ولار ىشتەي وقۋ قۇرالدارىنا، ينتەراكتيۆتى يننوۆاتسيالىق مۋلتيمەديالىق باعدارلامالارعا، وقىتۋشىلار مەن ادىسكەرلەرگە ارنالعان عىلىمي-ادىستەمەلىك ەڭبەكتەرگە، بالالارعا ارنالعان ءتىل ۇيرەتۋ قۇرالدارعا، بەينە جانە ونلاين ساباقتارعا، سوزدىكتەرگە بولىنەدى. پورتالدى قولدانۋشى وسى بلوكتاعى وقۋ-ادىستەمەلىك ماتەريالدار ارقىلى ءتىل ۇيرەنە الادى. بلوكتىڭ «عالىمنان كەڭەس»، «ادىسكەرگە كومەك» مودۋلدەرى ارقىلى  ءاربىر قولدانۋشى وزىنە قاجەتتى جالپى تىلگە جانە ءتىل ۇيرەنۋگە قاتىستى كاسىبي، عىلىمي، ادىستەمەلىك كومەك الادى. «ءتىل رايى» بلوگى مەملەكەتتىك تىلدە جارناما ماتىندەرىندەگى قاتەلىكتەرگە، تەلە جانە راديو تىلشىلەرىنىڭ ءسوز قولدانىسىنداعى ولقىلىقتارعا نازار اۋدارىپ، ولاردى تۇزەتۋگە، تىلدىك نورمالاردى ساقتاۋعا باعىتتالادى. «تارتۋ» بلوگىنان قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسى بويىنشا شىعارىلىپ جاتقان باسپا ونىمدەرىنىڭ جانە «ءتىل جانە قوعام»، «تۋعان ءتىل» الماناحتارىنىڭ، «بالاپان الەمى» جۋرنالىنىڭ، «ونوماستيكالىق حابارشى»، «تەرمينولوگيالىق حابارشى» بيۋللەتەندەرىنىڭ جانە ت.ب. ەلەكتروندى نۇسقالارىن دا وقۋعا بولادى. سونىمەن بىرگە بۇل بلوكتا  قازاقتىڭ  ادەبي ءتىلىن، كوركەم ادەبيەتىن تانۋعا، سوز بايلىعىن ەسەلەۋگە جانە ءتىلدى دۇرىس قولدانۋعا جاردەمدەسەتىن ادەبي، پۋبليتسيستيكالىق تاڭداۋلى ۇلگىلەر جيناقتالادى. «تولعانىس» بلوگىندا مەملەكەتتىك ءتىل تاقىرىبىنداعى  عىلىمي، عىلىمي-كوپشىلىك، پۋبليتسيستيكالىق ماقالالار، پورتالدى قولدانۋشىلار تاراپىنان ۇسىنىلاتىن  وي-پىكىرلەر، ۇسىنىستار ورىن الادى. بلوكتا «ءتىل جاناشىرلارى» كلۋبى اشىلىپ، مەملەكەتتىك تىلگە قاتىستى وزەكتى ماسەلەلەر قوعامدىق پىكىر كەڭىستىگىندە تالقىلانادى. «ورتا» بلوگىندا  پورتال تۋرالى اقپارات، بايلانىس، مەكەنجاي كارتاسى، نەگىزگى بلوكتاردا كورسەتىلگەن جوبالارعا تىكەلەي كىرۋگە مۇمكىندىك الۋ ءۇشىن تاقىرىپتىق انيماتسيالىق قيىندىلار ورنالاستىرىلادى. ءتىل باسقارمالارى مەن ءتىل ورتالىقتارى تۋرالى اقپاراتتار ورنالاستىرىلادى.

«Termincom.kz» ەلەكتروندىق سايتى «بەكىتىلگەن تەرميندەر»، «تەرميندەر حرونولوگياسى»، «قولدانىستاعى سالالىق تەرميندەر»، «ويتالقى»، «قۇقىقتىق-نورماتيۆتىك بازا»،  «عىلىمي-ادىcتەمەلىك نەگىزدەر» جانە «ىزدەۋ» بلوكتارىنان تۇرادى.

«Atau.kz» ونوماستيكالىق ەلەكتروندىق سايتى «قۇقىقتىق-نورماتيۆتىك بازا»، «عىلىمي-تاجىريبەلىك نەگىزدەرى» جانە «ىزدەۋ» بلوكتارىنان تۇرادى.

«Emle.kz» سايتىندا گرافيكا مەن ورفوگرافياعا قاتىستى تەوريالىق مالىمەتتەر مەن سوزدىكتەر ورنالاستىرىلادى. قازاقشا دۇرىس جازۋ، ءسوزدى دۇرىس ايتۋ (دىبىستاۋ) ەرەجەلەرى تۇسىندىرىلەدى. «ادەبي ءتىل نورمالارى» بلوگىندا سوز سازى، ونىڭ كوركەم ادەبيەت پەن ومىردەگى ماڭىزى، ەرەجەلەرى مەن قاعيدالارى بەرىلسە، «ورفوگرافيا» بلوگىندا سوزدەردىڭ دۇرىس جازىلۋ ەرەجەلەرى بەرىلەدى. «پۋنكتۋاتسيا» بلوگىندا تىنىس بەلگىلەردىڭ قويىلۋ رەتىنە بايلانىستى ەرەجەلەر ەنگىزىلسە، «اببرەۆياتۋرا» بلوگىندا قىسقارعان سوزدەر، ولاردىڭ تولىق اتاۋلارى، قىسقارتىلۋ رەتى، اتاۋلار مەن سوزدەردى قىسقارتۋ بارىسىندا باسشىلىققا الىناتىن قاعيدالار مەن سۇيەنەتىن زاڭدىلىقتار كەلتىرىلەدى. «ماقالالار» بلوگىندا  عالىمداردىڭ وسى سالا نەگىزىندە جازىلعان عىلىمي ماقالالارى بەرىلەدى.

قورىتا كەلگەندە، قازاقستان رەسپۋبليكاسىنىڭ تاۋەلسىزدىك العانىنا  25 جىل تولۋىنا وراي، قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى جاقسى تارتۋ الىپ كەلدى. جاڭا تەحنولوگيانىڭ كۇندەلىكتى قولدانىستا بولاتىن پايدالى جۇيەگە اينالۋى  –جاڭالىقتىڭ جارشىسى بولدى.

قازىر الەم بويىنشا بارلىق تىلدەردىڭ ىشكى جۇيەسىندە دە، ەكسترالينگۆيستيكالىق، ياعني سىرتقى جۇيەسىندە دە جاھاندانۋدىڭ ءتۇرلى لەبى ءتيىپ، قارقىندى وزگەرىستەر بولىپ جاتىر. سولاردىڭ ىشىندەگى ەڭ باستىسى – اربىر ءتىلدىڭ جوعالىپ كەتپەۋ، ساقتالۋ، قورىن ساقتاۋ، بايىتۋ سياقتى پروتسەستەردى قارقىنمەن وتكەرىپ جاتقاندىعى دەر ەدىك.  بۇرىن ادام ءوزىنىڭ اينالاسىن وزگەرتۋشى كۇش بولىپ سانالسا، ەندى سول ادامنىڭ ءوزىن تەحنولوگيالىق جەتىستىكتەر وزگەرتە الاتىن كۇش بولىپ وتىر. سوندىقتان «ءتىل الەمى» پورتالى دەر كەزىندە جاساقتالىپ، قازاق ءتىلىنىڭ سان عاسىرلار بويى جيناعان كۋمۋلياتيۆتىك قازىناسىن  قاعاز جۇزىندە دە، ەلەكتروندى فورماتتا دا وقۋعا، وقىتۋعا، دامىتۋعا مۇمكىندىك جاسالىندى. بۇل قۇبىلىس – «ءتىلدىڭ مەديايزاتسيالانۋى» دەپ اتالادى. بۇل قۇبىلىستى بارلىق ەلدە زەرتتەپ، باكالاۆرياتتا، ماگيستراتۋرادا ارنايى مامان دايىنداپ، وقىتىپ جاتىر. ەندىگى كەزەكتە، پورتالدىڭ ءارى قاراي دامۋىنا باسشىلىق جاسايتىن تەك كومپيۋتەرشى ماماندار عانا ەمەس، قازاق ءتىلى مەن كومپيۋتەردى بىردەي مەڭگەرگەن مامان ازىرلەۋدى قولعا الۋ كەرەك. الەمدىك اقپاراتتىق كەڭىستىكتە قازاق ءتىلىنىڭ ورنى قالانىپ جانە بۇگىنگى ۇسىنىلىپ وتىرعان تاماشا جاڭا پورتالدىڭ مازمۇن بايلىعى كەڭ پايدالانىلۋى ءۇشىن دە جاڭا ساپاداعى  ماماندار دايارلانۋى كۇتىلەدى. بۇل ماسەلەنى كۇن تارتىبىنە قويىپ وتىرعان وسى جاڭا «ءتىل الەمى» پورتالىنىڭ ءالى دە ويدا مول-مول جاڭالىقتار تۋىنداۋىنا تىرەك بولارى ءسوزسىز دەپ سانايمىز.

گۇلميرا مۇعالقىزى قۇباشەۆا

قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي  جۇمىس كوميتەتى نورماتيۆتىك-لينگۆيستيكالىق جۇمىستار باسقارماسىنىڭ باسشىسى 

Abai.kz