ۋكراينانىڭ توڭكەرىسپەن قۋىلعان پرەزيدەنتى ۆيكتور يانۋكوۆيچ رەسەيدىڭ «پەرۆىي كانال» ارناسىنا بەرگەن سۇحباتىندا «مۇمكىندىك تۋا سالىسىمەن» دەرەۋ ۋكرايناعا ورالاتىنىن ايتقان. بۇل تۋرالى BBC جازدى.

«ەلگە ورالۋعا مۇمكىندىگىم تۋا قالعان ساتتە مەن كەرى ورالامىن جانە ۋكراينا تۇرعىندارىنىڭ ءومىرىن جاقسارتۋ ءۇشىن ءبارىن دە جاسايمىن»، - دەگەن يانۋكوۆيچ ءوز سوزىندە.

ۋكراينانىڭ جوعارعى راداسى بىلتىرعى جىلى 4 ساۋىردە يانۋكوۆيچتى پرەزيدەنتتىك مارتەبەسىنەن ايىرعان بولاتىن. ۋكراينا كونستيتۋتسياسى بويىنشا پرەزيدەنتتىك مارتەبە يمپيچمەنت ناتيجەسىمەن جويىلماسا ءومىر بويى ساقتالادى. يانۋكوۆيچ ۋكراينا پرەزيدەنتى بولىپ 2010 جىلى 25 اقپاندا سايلانعان. وتكەن جىلى اقپان ايىنىڭ سوڭىندا كيەۆتەگى جالپىحالىقتىق تولقۋدان سوڭ ول پرەزيدەنت تاعىنان قۋىلعان ەدى.

يانۋكوۆيچ جانە ونىڭ اينالاسىنداعى كەيبىر شەندىلەر بەيبىت تۇرعىنداردىڭ ءولىمى ءۇشىن ايىپتالىپ، ولارعا حالىقارالىق ىزدەۋ جاريالانعان. بۇگىنگى تاڭدا يانۋكوۆيچتىڭ ورنالاسقان جەرى ناقتى بەلگىسىز. ونىڭ رەسەي اۋماعىندا جاسىرىنىپ جۇرگەن بولۋى مۇمكىن.

ەلدىڭ بۇرىنعى پرەزيدەنتى ەلگە ورالۋدان ءۇمىتىن مالىمدەپ جۇرگەن كەزدە، قازىرگى پرەزيدەنت پوروشەنكو «نەبەسنايا سوتنيا» مەملەكەتتىك ناگرادالارىن تاپسىرۋ سالتاناتىندا وعان قاراتىپ «ونىڭ ماڭگىلىك توزاق وتىنا جاناتىنىنا ەش كۇماندانبايمىن، بۇل جەر بەتىندەگى زاڭنان تىسقارى سوت» دەگەن.

نۇرعالي نۇرتاي

Abai.kz