قازاق حاندىعىنىڭ 550 جىلدىعىنىڭ باستى ەن-تاڭباسىنا قاتىستى جۇرت اراسىندا قىزۋ پىكىرتالاس تۋعانىن الگىندە عانا «ەن-تاڭبا ەلگە جاقپاي قالدى...» دەپ جازعان ەك، (قاراڭىز: http://abai.kz/post/view?id=2922) ايتىپ اۋىز جيعانشا لوگوتيپ اۆتورى «قازنەت» قولدانۋشىلاردىڭ اشۋ-ىزاسىن تۋدىرعان جايتقا تۇسىنىكتەمە بەرىپتى. بۇل تۋرالى Tengrinews.kz ءتىلشىسى حابارلادى.

الماس نۇرازحاننىڭ (سۋرەتتە) ايتۋىنشا، قازاق حاندىعىنىڭ 550 جىلدىعىنىڭ باستى ەن-تاڭباسىنا قاتىستى جاريالانعان بايقاۋعا كاسىبي مامان رەتىندە بىرنەشە نۇسقا جولداعان. ول ءتىپتى ءوز جۇمىستارىنىڭ سايىستا جەڭىپ شىعاتىنىنا سەنىمدى دە بولماعان ەكەن. بايقاۋ قورتىندىسىندا، اۆتوردىڭ سىنعا ۇشىراعان ەن-تاڭبا نۇسقاسى كوميسسيا تاراپىنان تاڭدالعان. «مەنىڭ باسقاشا ويىم بولعان جوق، بۇل بايقاۋدى وتكىزۋشىلەردىڭ تاڭداۋى. ولاردىڭ شەشىمىنە ىقپال ەتە المايمىن عوي...» دەپتى الماس مىرزا اعىنان جارىلىپ. ايتپاقشى، بايقاۋدى جاريالاپ، ەن-تاڭبانى تاڭداعان قازاقستاننىڭ رۋحاني دامۋ قورى بولاتىن. ەڭ قىزىعى... الماس نۇرازحان قر ۇلتتىق مۋزەيى ديرەكتورىنىڭ ءبىرىنشى ورىنباسارى قىزمەتىنە كەلگەنگە دەيىن اتالعان قوعامدىق قوردا باسشىلىق ەتكەن ەكەن. «ماعان بايلانىپ قالعان ەشتەڭە جوق، ەگەر ەن-تاڭبانىڭ ۇزدىك نۇسقاسىن جاساپ شىققان ادام بولسا، مەن العان سىياقىنى سوعان بەرۋگە ءازىرمىن...» دەيدى جەڭىمپاز.

اباي.kz