بەيسەنبى, 28 ناۋرىز 2024
جاڭالىقتار 7478 5 پىكىر 11 مامىر, 2017 ساعات 15:34

سۋپەر تۋالەت سالۋدان رەكورد جاساعان استانادا قازىر اجەتحانا جوق...

ەندى از كۇندە "الەمنىڭ 3 ميلليونعا جۋىق ءتۋريستى كەلەدى" دەپ كۇتىپ وتىرعان اسەت يسەكەشەۆتىڭ ايدىك شاھارىندا اجەتحانا تاپشى، - دەپ سۇيىنشىلەدى كتك ارناسى.

قالانىڭ قوعامدىق ورىندارىندا (كوشەلەردە) دارەت "سىڭدىرەر" جەر جوق دەگەن قۇلاققا ەرسى ەستىلەدى، راس.

استانادا اجەتحانا بار. ارقايسىسىنىڭ قۇنى 12 ميلليون تەڭگە تۇراتىن 15 «تۋالەت» تۇر.  تەك 2 جىل بۇرىن سەربيادان ساتىپ اكەلگەن سول اجەتحانالار ىستەن شىققان.  قازىر قاڭعىباستاردىڭ تۇنەيتىن باسپاناسىنا اينالىپتى.

ءجا، كەلەدى دەپ كۇتكەن 3 ميلليون تۋريست «تۋالەت» ىزدەپ تال-تەرەكتى ىزدەپ كەتپەسى انىق. ءبىزدىڭ ايتپاعىمىز، بيۋدجەتتىڭ 180 ميلليون تەڭگەسىنە الدىرعان سۋپەر-تۋالەتتىڭ جايى.

15-ءىنىڭ ءبىرى دە بىرەۋدىڭ اجەتىنە جاراماي تۇرعانى الگى جەلگە كەتكەن ءجۇز سەكسەن ميلليوندى ەسكە تۇسىرەدى.

ءبىزدىڭ اكىم-قارالار ارزان دۇنيەنى نەگە قىمباتقا الادى؟ ءبىزدىڭ جالقى سۇراق وسى.

ادىلبەك جاقسىبەكوۆ استانانى باسقارىپ تۇرعان تۇستا ءبىر ايالدامانىڭ ءوزىن – 10 ميلليونعا ورناتىپ تاستادى. ءيا، ارقايسىسى 35 960 اقش دوللارى.

سول كەزدە ساپارلاي كەلگەن رەسەيدىڭ كراسنويارسك قالاسى، سۆەردلوۆسك اۋدانى اكىمنىڭ ورىنباسارى  الەكسەي يساەۆ IT ايالدامالاردىڭ جاڭاسىنا ەمەس، باعاسىنا تاڭ قالعانىن جاسىرمادى.

يساەۆ ءدال وسىنداي جىپ-جىلى ايالدامالاردى 4800 دوللارعا ورناتقانىن ايتىپ، كۇلىپ كەتكەن. كۇلكىگە قالعان جاقسىبەكوۆ پە؟ جوق. وندا كىم؟

يسەكەشەۆ پەن جاقسىبەكوۆ سەكىلدى، ارزاننىڭ زاتىنا قىمبات شىعىن شىعارعان تاعى ءبىر اكىم – باۋىرجان بايبەك.

باۋكەڭ، بىلتىر الماتى كوشەلەرىنە زاماناۋي جابدىقتالعان اجەتحانا ورناتتى. ارقايسىسى 7 ميلليون تەڭگە تۇراتىن بيوتۋالەتتەن قازىر ۇشەۋى بار.

العاشىندا جۇرت جەتى ميلليوننىڭ اجەتحاناسىنا اجەت ءۇشىن ەمەس، الەۋمەتتىك جەلىگە سالۋ ءۇشىن، «سەلفيلەتىپ» قايتۋ ءۇشىن باراتىن. قازىر بۇل دا قىزىقتان قالدى. «تۋالەتتەر» جابىلىپ تۇر.

2016 جىلدىڭ قاراشا ايىندا كەرەكۋدىڭ اكىمى كوپكە كۇلكى بولدى. بيۋدجەتتىڭ 5,4 ميلليون تەڭگەسىنە «تۋالەت» سالدى. ءاي-شاي جوق، الدى دا، سالدى. 1 اجەتحانانىڭ قۇنى 5 ميلليون (بۇل اقشاعا قازاق ساراي سالىپ الادى) تۇرادى. يسەكەشەۆ پەن بايبەككە سەكىلدى ەمەس، قۇدايعا قاراعان ادام ەكەن دەستى جۇرت.

بۇل جارىستا بارىنەن وزعان وقو، جەتىسايدىڭ اكىمى بولدى. بايدۋالى بازارباەۆ دەيتىن اكىم بيۋدجەتتىڭ ەسەبىنەن 3 ميلليونعا اجەتحانا سالىپ بەرىپتى.  جەتىسايدىڭ جۇرتى ءماز. ويتكەنى، بازارباەۆ وزگەلەر سەكىلدى، اشقان تۋالەتتى تاستاپ كەتكەن جوق. ءوزى كەلىپ، سالتاناتتى تۇردە اشىلۋىن جاساپ، لەنتاسىن قيىپ كەتكەن.

تۇيمەباەۆتىڭ تاپسىماسىنان كەيىن وڭتۇستىكتىڭ اۋدان اكىمدەرى اجەتحانا جاپپاي اجەتحانا سالۋعا كىرىسكەن. ولار تۋرالى دا بىلە جاتارمىز.

ءتۇيىن. جوعارىداعى شۇبىلمالى تىزىمنەن ۇققانىمىز، اكىمدەر اراسىندا اجەتحانا سالۋدان جارىس باستالىپ كەتسە كەرەك. سوماسىنا قاراي ساپاسى بولسا كانە؟.. بۇل بيۋدجەت قارجىسىن وڭدى-سولدى جۇمساعىش اكىمدەردىڭ قۇزىرلى بيلىك الدىندا اقتالۋ سەكىلدى كورىنەدى. ايتپەسە، ىستەن شىققان اجەتحانالاردى قىرۋار قارجىعا العانىن بىلەتىن اكىم، جابىلعانىنا قاراپ وتىرا ما؟

نە دەسەك تە، سۋپەر تۋالەت سالۋدان رەكورد جاساعان استانادا قازىر اجەتحانا جوق. الگى تۋريستەر كەلگەنشە «تۋالەت» تاپپاسا، جاقسىبەكوۆتەن كەيىن اكىم بولعان اسەكەڭە جاقسى اتاق جوق.

ال ازىرشە ەلىمىزدەگى ەڭ ۇزدىك اجەتحانا قوجايىندارى – يسەكەشەۆ، اشىمبەتوۆ، بازارباەۆ جانە بايبەك.  كەلەسى تۋالەتتى كىم سالادى؟

نۇرگەلدى ابدىعانيۇلى

Abai.kz

5 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3510