10 تامىز كۇنى Abai.kz اقپاراتتىق پورتالى "ارداگەرگە كومەك دەپ مۇعالىمنەن اقشا جيناۋ زاڭدى ما؟" اتتى ايمان ساعيدۋللاەۆانىڭ ماقالاسىن جاريالاعان ەدى. سول ماتەريالدا ايتىلعان ماسەلەلەرگە قاراساي اۋدانى اكىمدىگى رەسمي جاۋاپ بەردى.

قاراساي اۋدانىنىڭ اكىمدىگى، جاڭاتۇرمىس ورتا مەكتەبىنىڭ قازاق ءتىلى ءپانىنىڭ مۇعالىمى ا.ساعيدۋللاەۆانىڭ  «اbai.kz» سايتىندا  شىققان حاتىنا بايلانىستى تومەندەگىنى حابارلايدى.

قازاقستان رەسپۋبليكاسىنىڭ 2001 جىلعى 23 قاڭتارداعى № 148-II «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭىنىڭ 6-بابىنا سايكەس ۇلى وتان سوعىسىنداعى ۇلى جەڭىستىڭ 72 جىلدىعىنا وراي، «قاراساي اۋداندىق ءماسليحاتى «ۇلى جەڭىستىڭ 72 جىلدىعىنا وراي، اۋداندىق ءماسليحات دەپۋتاتتارىنىڭ اۋدان تۇرعىندارىنا ۇندەۋى تۋرالى» 2017 جىلدىڭ 2 ناۋرىزىندا №12-6 شەشىمى قابىلداندى. شەشىمدە قاراساي اۋداندىق ءماسليحاتى دەپۋتاتتارىنىڭ ۇلى وتان سوعىسىنداعى ۇلى جەڭىستىڭ 72 جىلدىعىنا وراي اۋدان تۇرعىندارىن ءبىر كۇندىك ەڭبەكاقىلارىن ارنايى اشىلعان ەسەپ شوتقا («ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ قاراساي اۋداندىق فيليالىنىڭ قوعامدىق بىرلەستىگىنىڭ شوتىنا) اۋدارۋعا شاقىرۋ تۋرالى ۇندەۋى قابىلداندى. ۇندەۋدىڭ ءماتىنى 2017 جىلدىڭ 10 ناۋرىزىنداعى اۋداندىق «زامان جارشىسى» گازەتىنىڭ №10 باسىلىمىندا جاريالاندى.

«ارداگەرلەر ۇيىمى» رقب-ءى قازاقستان رەسپۋبليكاسىنىڭ سوعىس، ەڭبەك ارداگەرلەرىنىڭ باسقا دا ساناتتاعى بارلىق زەينەتكەرلەرىنىڭ قوعامدىق بىرلەستىگى نىسانىنداعى كوممەرتسيالىق ەمەس ۇيىمى بولىپ تابىلادى. «ارداگەرلەر ۇيىمى» رقب-ءنىڭ جوعارى اتقارۋشى ورگانى سەزد بولىپ تابىلادى. «ارداگەرلەر ۇيىمى» رقب ورتالىق كەڭەسىنىڭ جانە ورتالىق رەۆيزيالىق كوميسسياسىنىڭ ەسەپتەرىن تىڭداۋ، ولاردىڭ جۇمىستارىن باعالاۋ سەزدىڭ قۇزىرەتىنە جاتادى.

اتالعان  ماسەلە بويىنشا بارلىق ءبىلىم بەرۋ ۇيىمدارىندا پەداگوگيكالىق ۇجىمى جينالىستارى وتكىزىلىپ، بۇل شارا ەرىكتى تۇردە جۇرگىزىلىپ جاتقاندىعى تۋرالى ءتۇسىندىرىلدى. ناتيجەسىندە مۇعالىمدەر ءبىر كۇندىك جالاقىنى ارداگەرلەر ۇيىمىنىڭ ەسەپ-شوتىنا اۋداراتىندىعى تۋرالى شەشىم قابىلداندى. قابىلدانعان شەشىم تۋرالى حاتتامالار مەن مۇعالىمدەردىڭ قول قويىلعان ۆەدوموستۆالارى بارلىق ءبىلىم بەرۋ ۇيىمدارىندا جيناقتالعان.  اكىمدىك نەمەسە ءبىلىم ءبولىمى تاراپىنان  ەشقانداي ماجبۇرلەۋ بولماعاندىعىن جەتكىزەدى.

سول سەبەپتەن «ارداگەرلەر ۇيىمى» رقب-ءنىڭ قاراساي اۋداندىق فيليالىنىڭ قوعامدىق بىرلەستىگىنىڭ قورىنا ءبىر كۇندىك ەڭبەكاقىلارىن جيناۋ تۋرالى ۇندەۋ شىعارۋعا جانە جينالعان قارجىنىڭ ەسەبىن بەرۋ اۋدان اكىمىنىڭ قۇزىرىنا جاتپايدى.

ا.نازارباەۆا

Abai.kz