كەشە قر اقپارات جانە كوممۋنيكاتسيالار ءمينيسترى داۋرەن اباەۆ ءوزىنىڭ جاساپ جاتقان ىستەرىن قورتىندىلاپ، قوعامدىق ەسەپ بەردى. سول ەسەپ بەرۋ بارىسىندا نە ايتىلدى؟. جالپى، ەلىمىزدەگى اقپارات سالاسىنىڭ بۇگىنگى دامۋ قارقىنى قانداي؟ مينيسترلىكتىڭ جاساپ جاتقان شارۋالارىنىڭ ناتيجەلەرى، ەلىمىزدە ىسكە اسىرىلعان رەفورمالار، الەۋمەتتىك-ەكونوميكالىق دامۋ، مينيسترلىكتىڭ ستراتەگيالىق جوسپارىنىڭ نەگىزگى كورسەتكىشتەرى قاي دەڭگەيدە؟ بۇل ساۋالدارعا ءمينيستردىڭ ەل الدىنداعى ەسەبىنە شولا وتىرىپ جاۋاپ تابا الاتىن سياقتىمىز.  

«ەگەمەن قازاقستان» مەن «كاز پراۆدا» تۇرلەنىپ كەلەدى

مينيستر اباەۆ ەسەپ بەرۋ كەزىندە قازاق ەلىنىڭ باس گازەتى سانالاتىن «ەگەمەن قازاقستان» مەن «كاز پراۆدا» گازەتتەرىنىڭ فورماتى تۇرلەنىپ، ءتۇرلى-تۇسكە كوشىرىلگەنىن» ايتتى. ءبىزدىڭ ويىمىزشا، بۇل گازەتتەر سىرتقى ءپىشىنى عانا ءتۇرلى-تۇسكە كوشكەن جوق، سوڭعى ۋاقىتتاردا اتالعان گازەتتەردىڭ كوتەرەتىن ماسەلەسى، ساياسي، تاريحي تۇرعىداعى بەت-بەينەسى، اقپاراتتاردى بەرۋ تاسىلدەرى دە باسقا قالىپقا ءتۇستى. ماسەلەن "ەگەمەن قازاقستان" گازەتى قازىر رەسميلىك شەكپەنىن شەشىپ، جالپى بۇقارالىق سيپاتتاعى باسپاسوزگە اينالىپ ۇلگەردى" دەدى ول.

مەملەكەتتىك تەلەارنالار جاڭعىرتىلىپ جاتىر

سونداي-اق، مينيستر مەملەكەتتىك تەلەارنالاردى جاڭعىرتۋ شارالارى جۇزەگە اسىرىلىپ جاتقانىن ايتتى.

"بۇگىندە وتاندىق تەلەارنا كونتەنتى شەتەلدىك ستاندارتتارعا ساي دامىپ جاتىر"- دەدى ول.

راس. قازىر وتاندىق تەلەارنالار جاڭعىرۋدىڭ جاڭا ءبىر كەزەڭىنە ءوتتى. "قازاقستان" ۇلتتىق ارناسىنان باستاپ، بىرقاتار ارنالاردا باسشىلىق اۋىسىپ، تىڭ سەرپىنمەن جۇمىس جاساي باستاعانىن قالىڭ كوپشىلىك ءبىلىپ وتىر. ماسەلەن، «حابار 24» ارناسى ماڭىزدى اقپاراتتاردى جەتكىزۋمەن اينالىسسا، «قازاقستان» ارناسى نەگىزىنەن تالداۋ، ساراپتاما جاساۋ فورماتىنداعى تەلەارناعا اينالىپ كەلەدى. وسى ماسەلەگە ەرەكشە توقتالعان مينيستر  ناۋرىز ايىندا وتاندىق سەريالداردى كورسەتەتىن «ەلارنا» جاڭا ارناسى اشىلعانىن تىلگە تيەك ەتتى. بولاشاقتا «HD فورماتىنداعى تەلەۆيزيانى دامىتۋ جۇمىستارى جۇرگىزىلمەك. شالعاي اۋداندارداعى تسيفرلىق تەلەۆيزيا ماسەلەلەرى دە قولعا الىنباق. بۇگىندە رەسپۋبليكا ەلدى-مەكەندەرى 77%-عا تسيفرلىق تەلەۆيزيامەن قامتىلدى. وتاندىق سپۋتنيكتىك تەلەۆيزياعا باسىمدىق بەرىلىپ وتىر.

1900 اۋىل عالامتورمەن قامتاماسسىز ەتىلمەك

2020 جىلعا دەيىن ۇيالى بايلانىس پەن ينتەرنەتكە قول جەتىمدىلىك ماسەلەلەرىن تۇپكىلىكتى شەشۋ كەرەكتىگىن ايتقان مينيستر 1900 اۋىلدىق مەكەن جىلدامدىعى جوعارى ينتەرنەتپەن قامتاماسىز ەتىلەتىنىن سۇيىنشىلەدى.

سەنساتسيالىق جاڭالىقتارعا اباي بولۋ كەرەك

مينيستر داۋرەن اباەۆ باق-تاعى ۇلكەن پروبلەما - سەنساتسيالىق جاڭالىقتاردىڭ پورتالدار مەن ەلەكتروندى رەسۋرستاردا كوپتەپ كورىنىس تابۋى ەكەندىگىن ايتتى. ەلەكتروندى باق ءوز رەيتينگىسىن جوعارى ۇستاۋ ءۇشىن قايعىلى جاعدايعا ۇشىراعان، زارداپ شەككەن، زورلىققا دۋشار بولعان ادامدار، بالالار تۋرالى جەكە اقپاراتتاردى جاريالايتىنىن، سوندىقتان دا كەي كەزدەرى مورالدىك قۇندىلىقتار ۇمىتىلاتىنىن، ينتەرنەتتەگى كەيبىر اقپاراتتى سۇرىپتاۋ مەن ىرىكتەۋ ماسەلەلەرىندە ولقىلىق جىبەرەتىنىمىزدى ايتتى.  بالالاردى بۇرىس جاڭالىقتاردان، پسيحولوگياسىنا اسەر ەتەتىن اقپاراتتاردان، زياندى سايتتار مەن رەسۋرستاردان قورعاۋ جۇزەگە اسىرىلۋى ءتيىس دەدى مينيستر.

باسپانا ماسەلەسى قاراستىرىلادى

جۋرناليستەردىڭ سۇراعىنا جاۋاپ بەرگەن كەزدە داۋرەن اباەۆ جۋرناليستەردىڭ كوپشىلىگى جەكە مەنشىك ۇيىمداردا قىزمەت ەتەتىنىن، وسى ورايدا ولار ءوز-وزدەرىن قامتاماسىز ەتە الاتىنداي دارەجەدە ەكەندىگىن ايتتى. دەسە دە، الداعى ۋاقىتتا تىلشىلەرگە باسپانا ماسەلەسى قاراستىرالاتىنىن جەتكىزدى.

ءشارىپحان قايسار

Abai.kz