بۇل ۇسىنىستى جاساۋىما بىرنەشە بايسالدى سەبەپتەر بار:

1. ەرلىگى ەڭسەلى، ەڭبەگى ەرەن ەلباسىمىز نۇرسۇلتان ءابىشۇلى نازارباەۆتىڭ تۋعان جەرى الماتى وبلىسىنداعى شامالعان اۋىلى ەكەنىن ءبارىمىز بىلەمىز. سول اۋىلدىڭ اتىنا سايكەستەندىرىپ، ورايلاستىرىپ وي تۇيگەنمىن. «شام»، «العان» دەگەن ەكى ءسوزدىڭ بىرىگۋىنەن قۇرالعان عوي اۋىل اتاۋى. سول سەكىلدى مەن دە «نۇرسۇلتان» جانە «سالعان» دەگەن ەكى ۇعىمدى ۇلاعاتپەن بىرىكتىرە ءبىلدىم.

2. «ولەڭ – ءسوزدىڭ پاتشاسى، ءسوز ساراسى، قيىننان قيىستىرار ەر داناسى... تىلگە جەڭىل، جۇرەككە جىلى ءتيىپ، تەپ-تەگىس جۇمىر كەلسىن اينالاسى!» دەپ اباي بابامىز ايتقانداي، نۇرسۇلتانسالعان – كەرەمەت كوتەرىڭكى كوڭىل كۇيدە ايتىلاتىن اسىل ءسوز! ۇلى ءسوز! ماڭگىلىك ەلدىڭ ماعىنالى مۇراتى! راسىمەن، «تىلگە جەڭىل، جۇرەككە جىلى» ءسوز! ىشىڭىزدەن ىزگى نيەتتەنىپ، قازىرگى استانا كەلبەتىنە قاراپ تۇرىپ، وسى اتاۋدى بىرنەشە مارتە قايتالاڭىزشى! ەل پەرزەنتى رەتىندە عالامات سۇلۋ سەزىم بيلەيدى جانىڭىزدى! شىن تەبىرەنەسىز! اقىنجاندى ەل ەمەس پە ەدىك؟ ءار ازامات اقىنجاندىلىقپەن ايتسىن ەر ەسىمىن! سول كەزدە كوز جەتكىزەسىز بارىنە! جۇرەك ءۇنىن تىڭداڭىز! ول الدامايدى.

3. بۇل ءسوزدى ەستىگەن وزگە ەلدەر ءبىزدىڭ ەلباسىمىزعا دەگەن يگى قۇرمەتىمىزدەن يمەنەتىن بولادى. «ءبىز نەگە قازاق حالقى سەكىلدى سانالى، سالاۋاتتى ەمەسپىز...» دەپ بىزگە قاراپ، بوي تۇزەيدى، وي تۇزەيدى. اۋىزبىرشىلىگىمىزدەن اياق تارتادى عوي.

4. «استانا اتىن وزگەرتۋدىڭ ەش قاجەتى جوق! استانا اتاۋىن ءبارى بىلەدى. بۇل – باياعىدان قالىپتاسقان برەند» دەيتىندەرگە ايتارىم – قاجەتى بار! سەبەبى، استانادا وتكىزىلگەن قانداي دا بولماسىن بەرەكەلى باستامالاردىڭ، شۇعىلالى شارالاردىڭ بارلىعىنىڭ ءبىر جەبەۋشىسى، ءبىر قامقورشىسى ەلباسىمىز نۇرسۇلتان ءابىشۇلى نازارباەۆ ەكەنىن ءدۇيىم دۇنيەجۇزى جاقسى بىلەدى. الەمدىك ويمەن ءبىز ادەپ ساقتاي وتىرىپ، ساناسۋىمىز كەرەك. الەم ءۇشىن – ەلباسىمىزدىڭ ەسىمى – بارىنەن بيىك برەند! قانداي ساياسي سالماعى بار باياندى باستامالاردىڭ بارلىعى ەلباسى ويشىلدىعىنىڭ، ەلباسى دانالىعىنىڭ دارا جەمىسى. وي كۇشى – الەمدەگى ەڭ وراسان كۇش! يگىلىكتى يدەيالاردى ويلاپ تاۋىپ، ولاردى جۇزەگە اسىرۋ – ەڭ ابىرويلى ءىس! ەلباسىمىز استانا تىنىسىن كەڭەيتىپ، ەل مەرەيىن ۇستەم قىلۋدا ءوزىنىڭ وتە زور وي قاجىرىن، قيال قايراتىن سارپ ەتتى. تۇندە ۇيىقتامادى، كۇندىز كۇلمەدى! وسى وزىق ويلى ەلباسىمىزدىڭ ەسىمىن ۇلىقتاپ، ۇلى دالاداعى استانا اتاۋىن نۇرسۇلتان ءابىشۇلىنىڭ ابىرويلى اتىمەن بايلانىستىرۋ – ءبىز ءۇشىن باقىت!

5. بۇل – قۇدايدىڭ بۇيرىعى! اللا-تاعالانىڭ: «پاتشالارىڭ – مەنىڭ جەردەگى ەلشىلەرىم. قۇرمەتتەپ، قاستەرلەڭدەر! قادىرىن بىلىڭدەر!» دەپ بىزگە امانات ەتكەنىن الدىڭعى جازبامدا ايتقان ەدىم عوي! اباي بابا ەندى بىردە: «ءاننىڭ دە ەستىسى بار، ەسەرى بار!» دەيدى. ال، اقىن نۇرلان ورازالين اعامىز ءبىر جىرىندا: «ەسەر ۇلعا ەستى باقىت قونبايدى!» دەپ تولعانادى. باسىمىزداعى باقىتىمىزدىڭ باعاسىن، قادىرىن ءبىلىپ، ءبىراۋىزدان وسى ۇسىنىستى قابىلداعانىمىز ابزال! ادىلدىك ءانىن شىرقاۋعا نەگە جاسقانامىز؟ تاۋەلسىز ەل ەمەسپىز بە؟ ەسەرلىگىمىزدى ەمەس، ەستىلىگىمىزدى پاش ەتەتىن ءسات تۋدى، حالايىق!

بالتابەك نۇرعاليەۆ

Abai.kz