12 تامىز كۇنى قازاق-قىرعىز شەكاراسىن 15-20 ادام بۇزىپ كىرگەنى تۋرالى اقپارات تارادى. بۇل بەلگىلى ءبىر دارەجەدە تاۋەلسىز ەلدىڭ قاۋىپسىزدىگىنە قاتەر ءتوندىرۋ بولىپ سانالادى. قازىر شەكارا قىزمەتىنىڭ قوسىمشا كۇشتەرى مەن قۇرالدارى جامبىل وبلىسىنىڭ جامبىل اۋدانىنداعى قىرعىز رەسپۋبليكاسىمەن شەكارالاساتىن ۋچاسكەگە جەتكىزىلگەن.

جامبىل وبلىستىق ءىىد-ءنىڭ ءباسپاسوز قىزمەتىنىڭ حابارلاۋىنا قاراعاندا، 12 تامىز كۇنى كەشكە قازاق-قىرعىز شەكاراسىنىڭ جامبىل وبلىسى جاسوركەن اۋىلىنا جاقىن تۇستاعى (تارازدان 15 شاقىرىم) «جاسوركەن» شەكارا بەكەتى كۇزەتەتىن ايماقتان بەلگىسىز توپ قازاقستان شەكاراسىن كەسىپ وتپەك بولعان. وبلىستىق ءىىد-ءنىڭ تۇسىندىرۋىنشە، 13 تامىزعا قاراعان ءتۇنى قر ۇقك شق «وڭتۇستىك» وڭىرلىك باسقارماسىنىڭ تاراز شەكارا وتريادى «جاسوركەن» شەكارا بەكەتى جاساقتارى مەملەكەتتىك شەكارانى كۇزەتۋگە شىققان. 15-20 بەلگىسىز ادام (سانى انىقتالىپ جاتىر) قاراڭعىدا قازاقستان مەملەكەتتىك شەكاراسى جاعىنا  قاۋىپسىزدىك ءسپيرالدى بەلدەۋىنەن ءوتىپ كەتپەك بولىپ، تەمىر توردى كەسۋگە ارەكەتتەنگەن. شەكاراشىلاردىڭ ءبىرى، 21 جاستاعى وقو تۋماسى داۋىس بەرىپ، شەكارا بۇزۋشىلاردىڭ زاڭسىز ارەكەتىن توقتاتۋ ءۇشىن كالاشنيكوۆ اۆتوماتىنان  ەسكەرتۋ ءۇشىن اسپانعا وق اتقان. الايدا شەكارا بۇزۋشىلار دورەكىلىك تانىتىپ، شەكاراشىلارعا تاس لاقتىرىپ، باسىن جارالاعان. سول كەزدە شەكارا جاساعى ەكى رەت وق اتقان. شەكارا بۇزۋشىلاردىڭ ءبىرىنىڭ باسىنان وق ءتيىپ، قازا تاپتى.

«قازا تاپقان قازاقستاننىڭ ازاماتى، جامبىل وبلىسى جاسوركەن اۋىلىنىڭ تۇرعىنى، جاسى 30-دا، - دەپ ءمالىم ەتتى دەپارتامەنتتەگىلەر. - ءمايتتى سويۋ كەزىندە ونىڭ ءولىمى باستان تيگەن وق جاراقاتىنان بولعانىن كورسەتتى. ءىس قر قك-ءنىڭ 380-بابى 1-بولىگى بويىنشا (بيلىك وكiلiنە قاتىستى كۇش قولدانۋ) تىركەلدى. ءمايىتتى سىبايلاستارى الىپ كەتىپ، ونى تۋىستارىنا جەتكىزگەن. ال وزدەرى بەلگىسىز كولىككە وتىرىپ، جامبىل وبلىسىنىڭ اۋماعىندا ءىز جاسىرعان. قازىرگى ۋاقىتتا جەدەل-ىزدەستىرۋ شارالارى جۇرگىزىلۋدە، قازا تاپقان ادامنىڭ تۋىستارىنان جاۋاپ الىنىپ جاتىر».

قوش. ايدىڭ-كۇننىڭ امانىندا شەكارامىزدى جيىرماعا جۋىق ادام بۇزىپ ءوتىپ، ەلىمىزدە تايراڭداپ ءجۇر. ءبىز شەكارامىزدى بۇزعانداردىڭ كىم ەكەنىن ءالى انىقتاي الماي وتىرمىز. نەگە؟

ءشارىپحان قايسار

Abai.kz