مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىن تاۋەلسىز قازاق ەلىنىڭ بولاشاعىنا باعىت-باعدار بەرەتىن اسا ماڭىزدى قۇجات دەپ قابىلدادىم. ۇلت كوشباسشىسى ءتۇبى - تۇركى، مىنەزى - جىلقى، ۇلتى - قازاق، رۋحى - ازات ۇلى دالا ۇرپاقتارىنا قانمەن بەرىلگەن تەكتىلىك پەن نامىس اتتى قاسيەتتەردى ساقتاي وتىرىپ، ەڭبەك پەن ءبىلىمنىڭ ارقاسىندا عانا جاڭارۋعا جول اشىلاتىنىن ناقتى قادامداردىڭ باعدارلاماسىن ۇسىنا وتىرىپ جەتكىزگەن. ەلباسى ۇلتتىق بولمىس جانە حالىقتىق مادەنيەت مايەگىمەن تىنىس الاتىن ۇلتتىق كود ماسەلەسىنە ەرەكشە نازار اۋدارىپتى. ۇلتتىق كود دەگەنىمىزدىڭ ءوزى تۋعان ءتىل، سالت - ءداستۇر، ەل تاريحى دەسەك، وسى رۋحاني قۇندىلىقتارىمىزدى جوعالتپاۋ ارقىلى عانا وركەنيەتكە تولىققاندى جەتۋگە مۇمكىندىگىمىز بار ەكەندىگىن ايتقان ەلباسىنىڭ ەل بولاشاعىنا الاڭداۋشىلىعىن دا اڭعارۋ قيىن ەمەس.

بۇل قۇجاتتا بىزدەرگە، جۋرناليستەر قاۋىمىنا، جاڭا زامان تالابىنا ساي اقپاراتتىق كەڭىستىك قالىپتاستىرۋ ءىسى تاپسىرىلدى. «قازاق «تۋعان جەرگە تۋىڭدى تىك» دەپ بەكەرگە ايتپاعان. پاتريوتيزم كىندىك قانىڭ تامعان جەرىڭە، وسكەن اۋىلىڭا، قالاڭ مەن وڭىرىڭە، ياعني تۋعان جەرىڭە دەگەن سۇيىسپەنشىلىكتەن باستالادى. سوندىقتان مەن «تۋعان جەر» باعدارلاماسىن قولعا الۋدى ۇسىنامىن»،- دەگەنى جاستاردى پاتريوتتىق رۋحتا تاربيەلەۋدە بۇگىنگى زامان تالابىنان تۋىنداعان ۇسىنىس دەر ەدىم. اسىرەسە شەتەلدەن جۇماق ىزدەپ كەتىپ جاتقان جاستارعا وي سالا وتىرىپ، تۋعان جەر، وتان، اتا-انا الدىنداعى پارىز بەن قارىزدى جاستاردىڭ بويىنا ءسىڭىرىپ، ساناسىنا سىلكىنىس اكەلەتىن قادام دەپ ويلايمىن. اتا-بابامىز اق نايزانىڭ ۇشىمەن، اق بىلەكتىڭ كۇشىمەن قورعاپ، بۇگىنگى ۇرپاعىنا امان-ەسەن جەتكىزگەن اتامەكەنگە ادالدىق يدەياسى دەپ قابىلدادىم.

وسى رەتتە وزىمە ەرەكشە اسەر ەتكەن مىنا ءبىر وقيعانى بايانداي كەتكىم كەلىپ تۇر: سەمەيدە تۋىپ، بۇل كۇندەرى استانالىق بولىپ كەتكەن ءبىر قۇربىم پەرزەنتحانادا تۋعان نەمەرەسىنىڭ كىندىگىن دارىگەردەن سۇراپ الىپ، نارەستە دۇنيە ەسىگىن اشقاننان كەيىن «ۇرپاعىمنىڭ كىندىگى اتاجۇرتىنا بايلاۋلى بولسىن، وتانىن، تۋعان جەرىن ءسۇيىپ ءوسسىن دەگەن ىرىممەن اتا-باباسى، اتا-اجەسى تۋعان توپىراققا كومۋگە بەرىپ جىبەردىم» دەگەنىن ەستىگەندە، ءسۇيسىنىپ تۇرىپ، اتاجۇرتقا ادال بولۋدى انانىڭ سۇتىمەن، اجەنىڭ الديىمەن، بەسىكتىڭ جىرىمەن بويىنا سىڭىرگەن ۇرپاقتىڭ تۋعان جەرىنىڭ تۋىن جوعارى ۇستار ادال پەرزەنتى بولارىنا كۇمانىم جوق دەگەن ەدىم. ەلباسىمىز ايتىپ وتىرعان ۇلتتىق كودتىڭ نەگىزى دە وسى بولسا كەرەك.

ريزا مولداشەۆا،

شىعىس قازاقستان وبلىستىق ءماسليحاتىنىڭ دەپۋتاتى

Abai.kz