سەنبى, 19 قازان 2019
انىق 7353 45 پىكىر 7 قازان, 2017 ساعات 15:56

باقىتبەك سماعۇلوۆ: اعايىن الاڭ بولماسىن!

 

بىزگە بۇگىن ءماجىلىس دەپۋتاتى باقىتبەك سماعۇلوۆ مىرزا حابارلاستى. دەپۋتات نەشە كۇننەن بەرى Abai.kz اقپاراتتىق پورتالىنىڭ باس تاقىرىبىنان تۇسپەي تۇرعان 251 جاننىڭ تاعدىرىنا قاتىستى ماقالانى وقىپ, وقىپ قانا قويماي، ماسەلەگە بارىنشا ءمان بەرىپ، ءتيىستى ورىندارعا قوڭىراۋ سوعىپ جاتقان كورىنەدى. اتالعان ماقالا شىققان كۇنى ول ىشكى ىستەر مينيسترلىگىنىڭ كوشى-قون پوليتسياسى كوميتەتىنە حابارلاسىپ: «251 وتباسىن كەرى قايتارىپ قويىپ قاراپ وتىرامىز با؟» دەپ ساۋال تاستاپتى. كوميتەتتەگى جاۋاپتى تۇلعالار دەپۋتاتتىڭ ساۋالىنا: «ءبىز Abai.kz سايتىندا شىققان ماقالانى وقىدىق. قانداستارىمىزعا جالعان قۇجات جاساپ بەرگەندەر ۇستالىپ، قازىر جاۋاپقا تارتىلىپ جاتىر. ءىستىڭ بارىسى تولىق انىقتالعانشا ۇندەمەي وتىرمىز. بۇل ىسپەن وتكەن اقپان ايىنان بەرى ۇقك قىزمەتكەرلەرى دە اينالىسۋدا. الداعى كۇندەردىڭ بىرىندە بارىنە كوز جەتكىزەتىن بولامىز، سوسىن كەسىمدى ءسوزىمىزدى ايتامىز. ال، الىستان كوشىپ كەلگەن اعايىننىڭ ءبىر دە ءبىرىن كەرى قايتارمايمىز. ولار قايتكەندە اتاجۇرتى قازاقستاندا قالادى»، - دەپ جاۋاپ بەرىپتى. نار تۇلعالى، بالۋان جوتالى، باتىر دەپۋتاتىمىزدان الگىندەي جىلى لەپەستى ەستىپ «بارەكەلدە!» دەستىك. سودان كەيىن دۇنيە جۇزىندەگى قازاقتىڭ جوعىن جوقتاپ، بارىن تۇگەندەپ وتىرۋعا ءتيىس قاۋىمداستىققا، قاۋىمداستىقتىڭ جۇمىسىنا بىردەن ءبىر جاۋاپتى ادام زاۋىتبەك تۇرىسبەك مىرزاعا «استانانىڭ قاي قۋىسىنا تىعىلىپ قالدىڭىز؟» دەپ ىزدەۋ سالعان ەدىك. زاۋكەڭدى داۋكەڭنىڭ – داۋرەن قۋاتتىڭ سايتى ىزدەپ جاتقانىن كورە قالعان دەپۋتات سماعۇلوۆ بۇل جولى دا ابجىلدىك تانىتىپ، تۇرىسبەككە تۋرا قوڭىراۋ شالىپتى.  قوڭىراۋ شالىپ، ماسەلەنىڭ ءمان-جايىن ايتا باستاعان ەكەن، زاۋىتبەك تۇرىسبەك تە سوزگە كەلمەستەن: «قاۋىمداستىق 251 قانداستىڭ حال-جايىنا قاتتى الاڭداپ، قاراپ وتىر. قولىنان جەتەلەپ كەلتىرمەسەك، كەلگەن قازاعىمىزدى كەرى يتەرەتىن ەل ءبىز ەمەسپىز. 251 مە، ودان كوپ پە، ىقتيار حاتتىڭ اۋىرە سارساڭىنا ءتۇسىپ قالعان قازاق بالاسىن جاۋتاڭداتپايمىز. ماسەلە وڭ شەشەمىن تابادى»، - دەگەندى ايتىپتى. بۇعاندا «بارەكەلدە!» دەيمىز. وسىنداي كوڭىل توعايتاتىن جىلى سوزدەردى جەتكىزگەن دەپۋتات باقىتبەك سماعۇلوۆ: «Abai.kz پورتالى ارقىلى اعايىنعا الاڭ بولماسىن ايتامىن. قوسۇرەيلەنىپ، قورقۋدىڭ قاجەتى شامالى. سونداي-اق بۇدان ۇلكەن ماسەلە تۋدىرۋدىڭ دا كەرەگى از. زاڭسىزدىق بولعان ەكەن، ەندى شەشىمىن تابادى. ەلىم، جەرىم دەپ كەلگەن قاراكوز قانداسىمىزدىڭ ءبىر دە ءبىرىن جات قولىنا بەرمەيمىز. ولاردىڭ جاعدايى جاقسى بولادى. اتاجۇرتىندا ءوسىپ، وركەندەيدى، تامىرىن تەرەڭگە سىڭىرەدى. قىسقاسى، اعايىن الاڭ بولماسىن!» - دەدى.

بىزگە دە كەرەگى – وسى. Abai.kz اقپاراتتىق پورتالى ارزان سەنساتسيا قۋىپ، ارزىمايتىن اتاقتىڭ سوڭىنان ەرگەن ەمەس. 250-ءدىڭ ماسەلەسى دۇرىس شەشەمىن تابا ما؟ ەندەشە، ءبىز سول دۇرىس شەشىمدى الدىمەن سۇيىنشىلەيمىز. دۇرىس شەشىمىن تاپپاي ما، وندا تاعى دا بۇل جايتتى كۇن تارتىبىنە قويامىز. بىراق، سەڭ قوزعالعان سياقتى. ىلايىم سولاي بولعاي!

Abai.kz  

45 پىكىر