الماتىدا كوپ بالالى كاسىپكەر ايەل ەكونوميكالىق قىلمىستاردى تەرگەۋمەن اينالىساتىن مەكەمەنىڭ ماماندارىن ايىپتادى. تامىز ايىندا ەكاتەرينا كيمدى وبلىستىق مەملەكەتتىك كىرىستەر دەپارتامەنتى "ەسەپشوتتىق فاكتۋرالاردى جالعان جاسادى" دەگەن ايىپپەن قۇرىقتاعان. الايدا بۇل ايىپتاۋمەن كەلىسپەگەن كاسىپكەر جەمقورلىققا قارسى ۇلتتىق بيۋرو مەن وبلىستىق پروكۋراتۋراعا ارىزدانادى. - دەپ حابارلادى استانا تەلەارناسى.

ول قۇزىرلى ورگان قىزمەتكەرلەرىنىڭ ءىرى كولەمدە پارا تالاپ ەتكەنىن تاسپاعا ءتۇسىرىپ العان. كاسىبىنەن ايىرىلىپ، 60 ادامدى ءماجبۇرلى دەمالىسقا جىبەرگەن "جاس كاسىپكەر" ىسكە باس پروكۋراتۋرانىڭ ارالاسۋىن سۇرايدى.

التى بالانىڭ اناسى وسىعان دەيىن كاسىبىن دوڭگەلەتىپ كەلگەن. بيىل جازدا قالانىڭ ورتالىعىنان جالعا ورىن الىپ، دۇكەن اشادى. الايدا كوپ ۇزاماي، قۇزىرلى ورگان وكىلدەرى ەكاتەرينانىڭ قۇجاتتارىنان شيكىلىك تاپقان. ايەلدىڭ ۇستىنەن قارجىلىق قۇجاتتاردى دۇرىس تولتىرمادى دەگەن كۇدىكپەن قىلمىستىق ءىس قوزعالادى. ياعني «ءىس جۇزىندە جۇمىستار ورىندالماي، قىزمەتتەر كورسەتىلمەي، تاۋارلار تيەپ-جونەلتىلمەي جاتىپ، شوت-فاكتۋرا جازدى» دەگەن ايىپپەن تەرگەلە باستاعان.

كاسىپكەردىڭ ايتۋىنشا، ءىستى جابۋ ءۇشىن تەرگەۋشىلەر ءىرى كولەمدە پارا تالاپ ەتىپ وتىر.

ەكاتەرينا كيم، كاسىپكەر:

- مەن ءىستىڭ جاريالى بولۋى جانە ءادىل تەرگەلۋى ءۇشىن باس پروكۋراتۋرانىڭ ارالاسۋىن قالايمىن. ەسەپ-شوت فاكتۋراسىن جالعان جاساۋ فاكتىسى بويىنشا مەنىڭ كومەكشىم قۇزىرلى ورگان قىزمەتكەرلەرىمەن بىرىگىپ، ماعان جالا جاپقانىن ايتقىم كەلەدى. ءىستى جابۋ ءۇشىن اتالعان مەكەمەنىڭ وكىلدەرى پارا تالاپ ەتىپ وتىر. مەندە ونى دالەلدەيتىن 158 دىبىستىق جازبا بار.

ەكاتەرينا كيم ىلە اۋدانىنداعى جالعان قۇجات جاساۋ بابىمەن ايىپتالعان جالعىز ادام ەمەس. بۇل ىسكە جاقىندا ارالاسقان تانىمال ادۆوكات دجوحار ۋتەبەكوۆتىڭ ايتۋىنشا، الماتى وبلىستىق كىرىستەر دەپارتامەنتىنىڭ ۇستىنەن وسىنداي شاعىممەن 4 كاسىپكەر حابارلاسقان. بيزنەس يەلەرىن بوپسالاۋ دەرەگى نەگىزىندە قازىر قارجى مينيسترلىگىنە حات دايىندالىپ جاتىر، دەيدى قورعاۋشى.

دجوحار وتەبەكوۆ، قورعاۋشى:

- جالعان ەسەپ شوت-فاكتۋرالارىن جازىپ، ونى كاسىپكەرلەر جاسادى دەپ پروۆوكاتسيا جاسايتىن فاكتىلەرمەن كوپ كەزدەسىپ ءجۇرمىن. اسىرەسە الماتى وبلىسى ىلە اۋدانىندا ەكونوميكالىق قىلمىستاردى تەرگەۋ قىزمەتى جەڭىل اقشا تابۋ ءۇشىن قىلمىستىق جۇيە قالىپتاستارعانىن اڭعارۋ قيىن ەمەس.

كاسىپكەردەن 50 مىڭ اقش دوللارىن تالاپ ەتكەن وبلىستىق ەكونوميكالىق قىلمىستاردى تەرگەۋ قىزمەتىنىڭ مامانى انىقتالىپ، جۇمىسىنان الاستاتىلعان.

الماتى وبلىسىنىڭ پروكۋراتۋراسى قازىر بۇل دەرەك بويىنشا تەكسەرۋ جۇرگىزىلىپ جاتقانىن مالىمدەدى.

ايدىن راەۆ، الماتى وبلىسى پروكۋراتۋراسىنىڭ باسقارما باسشىسى:

- ازاماتشا كيمنىڭ ارىزى بويىنشا قاداعالاۋ ورگانى تەكسەرۋ جۇرگىزىپ جاتىر. قىلمىستىق ءىس زەرتتەلىپ، ونىڭ ۋاجدەرى زەرتتەلەدى، سوسىن مىندەتتى تۇردە  جاۋاپ بەرىلەدى.

ەكاتەرينا كيم دۇكەنىن جاۋىپ، تاۋارلارىن ءۇيىنىڭ اۋلاسىنا تاسىپ جاتىر. جەتىنشى سابيىنە اياعى اۋىر ايەل كەز-كەلگەن ۋاقىتتا قاماۋعا الىنۋدان قورقادى. ال كەپىل رەتىندە قۇياتىن قوماقتى قاراجاتى جوق، سەبەبى ونىڭ ەسەپ-شوتتارى مەن بانكتىك كارتالارى الدەقاشان بۇعاتتالعان.

ريشات اسقاربەكۇلى 

Abai.kz