بۇگىن، ءوزىنىڭ تۋعان كۇنىندە، ياعني 3 - جەلتوقسان كۇنى، ءدال 47 جاسىندا بەلگىلى جۋرناليست گەننادي بەنديتسكي دۇنيە سالدى. Ratel.kz سايتىنداعى ارىپتەستەرىمىزدىڭ حابارلاۋىنا قاراعاندا (بۇل سايتتىڭ نەگىزىن قالاعانداردىڭ ءبىرى مارقۇمنىڭ ءوزى بولعان ەدى), بەنديتسكي اۋىر دەرتكە ۇشىراعانىن كەيىنگە دەيىن بىلمەي كەلگەن كورىنەدى. بىلگەن كۇندە دە جاسىماي، جىگىتتىك جىگەر تانىتىپ، ومىردەن وزىپتى.

گەننادي بەنديتسككي جۋرناليستىك زەرتتەۋمەن شۇعىلداندى. ءارتۇرلى اقپارات كوزدەرىنەن العان دەرەكتى جايتتاردى جاريا ەتىپ، تالاي بىلىقتىڭ بەتىن اشتى. سول ءۇشىن دە باسى داۋعا قالىپ جۇرەتىن. بىراق، ول كوپشىلىك وقىرماننىڭ، قاراپايىم جۇرتتىڭ ىقىلاسىنا بولەندى. ابىرويلى بولدى. قازاققا سۇيكەنىپ، قازاقتىڭ جانىن اۋىرتاتىن، ۇلتتىق نامىسىن قورلايتىن ماقالاسىماق جازىپ اتاق پەن شاتاق شىعارعان زامانداستارىنىڭ ماڭىنا جۋىعان كەزىن كورمەدىك. ول شىندىق پەن ادىلدىكتىڭ تاراپىنان تابىلۋعا تىرىساتىن. «شىندىق ءۇشىن كۇرەسپەسەڭ شىندىق ءومىر سۇرە المايدى» دەگەن ۇستانىمنان تايعان جوق. ءسوز بوستاندىعى مەن ازات ويلاردىڭ سالتانات قۇرۋىنا ۇلەس قوسقان ارىپتەسىمىزدىڭ سوڭىندا جارى، ەكى بالاسى، قايعىرىپ دوستارى قالدى. رۋحى كوكتەن جاي تاپسىن.

Abai.kz ۇجىمى