بۇدان بۇرىن حابارلاعانىمىزداي، وسكەمەندەگى «ەدەلۆەيس» قوناق ءۇي كەشەنىنىڭ ءماجىلىس زالىندا «جەكسەنبىلىك مەكتەپتەردە قازاق ءتىلى مەن ەلىمىزدە ءومىر ءسۇرىپ جاتقان ەتنوس تىلدەرىن جەدەلدەتە وقىتۋداعى ءادىس، تاجىريبە، يننوۆاتسيا» تاقىرىبىندا رەسپۋبليكالىق سەمينار-ترەنينگ ءوتتى.

سەمينار ەتنومادەني ورتالىقتار جانىنداعى جەكسەنبىلىك مەكتەپتەردە قازاق جانە انا تىلدەرىن وقىتۋدىڭ ادىستەمەسىن جەتىلدىرۋ، وزىق تاجىريبەنى زەردەلەۋ جانە قورىتۋ، وقىتۋدىڭ يننوۆاتسيالىق ادىستەرى مەن تەحنولوگيالارىن تاجىريبەگە ەنگىزۋ ماقساتىندا ۇيىمداستىرىلعان. اتالمىش شاراعا ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورى، فيلولوگيا عىلىمدارىنىڭ كانديداتى ەربول تىلەشوۆ، «مەملەكەتتىك ءتىلدى ۇيرەتۋ ەليتالىق كۋرسى» مادەني مەكەمەسىنىڭ ديرەكتورى ساۋلە باقتىباەۆا، كوپتىلدى ءبىلىم بەرۋدى دامىتۋ ورتالىعىنىڭ ديرەكتورى، دوتسەنت ساۋلە اسانباەۆا، ادىسكەر عالىمدار، ءتىل ماماندارى مەن جەكسەنبىلىك مەكتەپ وقىتۋشىلارى قاتىستى.

سەمينار-ترەنينگكە قاتىسقان قوناقتار وسكەمەندەگى «ۆوزروجدەنيە» جەكسەنبىلىك مەكتەبىنىڭ جۇمىسىن ەرەكشە اتاپ ءوتتى. مەملەكەتتىك تىلمەن قاتار توعىز ءتىلدى تەگىن ۇيرەنۋگە مۇمكىندىك بەرەتىن، ءوزىنىڭ جەكە عيماراتى مەن جارعىسى بار بۇل ءبىلىم ورداسى – رەسپۋبليكاداعى ەڭ مىقتى جەكسەنبىلىك مەكتەپتەردىڭ بىرىنەن سانالادى.

سەمينار بارىسىندا ادىسكەر — عالىمدار تىلدەردى وقىتۋدىڭ ءتيىمدى ءادىس-تاسىلدەرىمەن جانە تەحنولوگيالارىمەن ءبولىستى. جەكسەنبىلىك مەكتەپ وقىتۋشىلارى مەن رەسپۋبليكاعا بەلگىلى ۇزدىك ادىسكەرلەر پانورامالىق جانە شەبەرلىك ساباقتارىن كورسەتتى.

سونداي-اق، قازاق تىلىمەن قاتار كورەي، وزبەك، دۇنگەن، گرەك، تۇرىك، ءازىربايجان، بالقار ءتىلى مۇعالىمدەرىنىڭ قارقىندى وقىتۋدا ينتەربەلسەندى ادىستەردى قولدانۋ جانە وقىتۋداعى يننوۆاتسيالىق تەحنولوگيالار جايلى باياندامالارى تىڭدالدى.

-مەن تارازداعى №4 مەكتەپتە وزبەك ءتىلى مەن ادەبيەتىنەن جانە 1996 جىلدان بەرى جەكسەنبىلىك مەكتەپتە مەملەكەتتىك ءتىل-قازاق تىلىمەن قاتار تاجىك، وزبەك تىلدەرىنەن ساباق بەرىپ كەلەمىن. مۇنداي سەمينار-ترەنينگتەردىڭ ءبىز ءۇشىن ماڭىزى زور. ءتىل ءبىلىمى سالاسىنداعى بىلىكتى ماماندارمەن كەڭەسەمىز، وزگە وڭىرلەردەگى جەكسەنبىلىك مەكتەپتەردىڭ ۇستازدارىمەن سۇحباتتاسىپ، تاجىريبە الماسامىز. ءتۇرلى شەبەرلىك ساباقتارى ءوتىپ جاتىر. ءار ادام ءوز ۇلتىنىڭ ءتىلىن، مادەنيەتىن ءبىلۋى ءتيىس. جەكسەنبىلىك مەكتەپتە ءتىل ۇيرەنەم دەۋشىلەردىڭ جاسىنا شەكتەۋ جوق. تەك مەكتەپ وقۋشىلارى عانا ەمەس، انا ءتىلىن تەرەڭ بىلگىسى كەلەتىن ەرەسەكتەر دە كەلەدى،-دەيدى تارازدىق ۇستاز ۇلبولسىن حادىرباەۆا.

-ەلباسى جۇرگىزىپ وتىرعان مەملەكەتتىك ساياساتتىڭ ارقاسىندا ەلىمىزدە قازاقستان حالىقى اسسامبلەياسى جۇمىس ىستەيدى. جەكسەنبىلىك مەكتەپ مۇعالىمدەرىنە ارنالعان بۇل سەميناردىڭ ءمانى زور. شەبەرلىك ساباقتارىنداعى ءادىس-تاسىلدەر مەن وزىق تاجىريبەلەر وڭ ناتيجەسىن بەرەدى دەپ سەنەمىن. مەملەكەتتىك ءتىلدى بىلەتىن، سىيلايتىن حالىققا اينالساق، ەڭبەگىمىزدىڭ جەمىسى سول بولماق،-دەدى ەربول ەردەمبەكۇلى.

Abai.kz