«ەير استانا» اۋە كومپانياسىن سوتقا بەرگەن وعىز دوعان جەڭىسكە جەتتى. الماتى قالاسى تۇركسىب اۋداندىق سوتىندا اۋە كومپانياسى مەن وعىز دوعان اراسىنداعى مەملەكەتىك ءتىل داۋىنىڭ نۇكتەسىن سوت توراعاسى قويدى. وعىز دوعان جەڭىسكە جەتتى.

– بۇل مەنىڭ ەمەس، بۇكىل قازاقتىڭ، قازاق ءتىلىنىڭ جەڭىسى. قازاق ءتىلى – مەنىڭ انا ءتىلىم. ءبىز باياعىدان جەڭۋىمىز كەرەك ەدى. تاۋەلسىزدىك العانىمىزعا 26 جىل بولدى. 26 جىل بۇرىن جەڭىسكە جەتۋىمىز كەرەك ەدى، – دەدى وعىز دوعان سوتتان كەيىن.

ايتا كەتەيىك، سوت پروتسەسسى كەزىندە وعىز دوعاندى بەلگىلى زاڭگەر ابزال قۇسپان قورعاپ شىقتى.

ول بۇعان دەيىن الەۋمەتتىك جەلىدە «ەگەر وعىز دوعان سوتقا بەرسە، جەڭىسكە جەتۋىنە كەپىلدىك بەرەمىن» دەپ مالىمدەگەن بولاتىن.

ەندى سوت شەشىمىنە سايكەس «ەير استانا» كومپانياسى وعىز دوعاننىڭ تالابى بويىنشا مەملەكەتتىك تىلدە قىزمەت كورسەتپەگەنى ءۇشىن قازاق حالقىنان كەشىرىم سۇرايدى. سوت «ەير استانا» قىزمەتكەرلەرىنە مەملەكەتتىك ءتىلدى مەڭگەرۋگە مىندەتتەدى. سونىمەن قاتار  ولار وعىز دوعانعا مورالدىق وتەماقى رەتىندە سيمۆوليكالىق 1 تەڭگە تولەيتىن بولادى.

وسى ءىستىڭ باسى قاسىندا جۇرگەن زاڭگەر ابزال قۇسپاننىڭ پىكىرىن بىلگەن ەدىك.

– مەن حالىقتىڭ نارازىلىعىن جەتكىزىپ ۇلت ارازدىقتى قوزدىردى دەگەندى العا تارتىپ ەير استانانىڭ اكتسيونەرلەرىنە اعىلشىنشا حات جازامىن.  ايتا كەتەيىن، وعىز دوعاندى قولداپ كەلگەندەردىڭ قاراسى كوپ. ەلۋ، الپىستاي ادام سوتقا قازاقستاننىڭ تۇكپىر-تۇكپىرىنەن كەلدى. شىمكەنتتەن، ءتىپتى سوناۋ ورالدان كەلگەندەر بار. بۇل حالىقتىڭ رۋحىن كوتەرەتىن شارا بولدى دەپ ەسەپتەيمىن.

Abai.kz