ورىسشا شۋ شىعارعان قاريانى سىناپ، ودان كەيىن تورەعاليدى ايىپتاڭدار!! تورەعالي ءبىر ساتتە حالىق جاۋىنا اينالدى.. نەگە؟ كەيبىرەۋلەر تورەعاليدى قۇرتىپ، جەر اۋدارىپ، جازالاۋ كەرەك دەپ دابىل قاعۋدا..

قادىرلى قازاق جۇرتى، نە دەگەن مەيىرىمسىزدەنىپ كەتكەنسىڭ، نە دەگەن كەككە تولى ۇراندار... كەشە عانا اسپەتتەگەن ازاماتتاردى، ءبىر ساتتە ءبىر اعاتتىق ءۇشىن تابانعا سالىپ تاپتاي سالايىق پا؟ نە دەگەن بايانسىز جاقسى كورۋ مەن جەك كورۋ...

مۇنىڭ تەرەڭىندە ايتىلىپ تىزەسى شىققان، ەتتەن ءوتىپ، سۇيەككە جەتكەن قۇلدىق سانا جاتىر... ءبىز ادىلەت بيلىكتە جوق دەيمىز، سويتسەك وزىمىزدە جوق ەكەن عوي. مەيىرىم مەن كەشىرىم قايدا كەتكەن؟ ەكى قازاق ءبىر اعاتتىققا بولا ءبىرىن-ءبىرى ايىپتاپ، جازالاسا، وندا قازاق بولۋدان كەتكەن ەكەنبىز. قازاقتان مۇسىلماندىقتى الىپ تاستاسا ەشتەڭە دە قالمايدى دەيتىنى وسىدان.. مۇسىلماندىعىمىز ورنىندا بولسا، ەڭ كەمىندە يماندى ويلاپ كەشىرىممەن قارايتىن ەدىك قوي. ءبىر ادامنىڭ ءبىرلى-ەكىلى قاتەلىگىنە بولا تىم شەكتەن شىعىپ كەتپەڭىزدەر، اعايىن. ءبىر جاقتىلى كورە سالا ۇكىم شىعارۋ، ادىلەتسىزدىككە الىپ بارادى. ادەتتە سوت تۋرالى شاعىم ايتامىز، نەگىزى تەرەڭ ساراپتاۋدى وزىمىزدەن، ادىلدىكتى وزىمىزدەن باستايىق.

تورەعالي ءتورالى بۇل شۋلى ۆيديودا شامالى قىزىپ قالعانى ەكى ۆيديودا دا انىق بايقالادى... ونىڭ ءانىن ەستىگەندەردىڭ ءوزى ماحاببات تراگەدياسىن ويلاپ ماستانىپ كەتكەندەرى قانشاما؟ جالپى ادامنىڭ ءبارى قاتەلەسەدى، سول قاتەلىككە بولا تاپتاپ، قۇرتىپ جىبەرسە ءبىزدىڭ ەلدە جان قالماس ەدى، دەمەك ادام دەگەن "ينسان" دەگەن ماعىنانى بىلدىرەدى، ياعني قاتەلىكتەن تۇرادى ەكەن . ءار قانداي نارسەنىڭ ەكى جاعى بولادى. ءبىز تەك تورەعاليدىڭ ەموتسياسىن، اشۋلانعانىن عانا كوردىك، ولاي بولسا ارعى جاعىندا نە بولعانىن بىلمەيمىز. رەسەي تىلىندە شۋ شىعارعان قاريانىڭ، تۋعان جەرىنىڭ نامىسىن ءتۇسىردىڭ دەپ جۇرتتىڭ كوزىنشە ايىپتاۋى قانشالىق ادىلەتتى؟ ورىس تىلىندە سويلەگەن سوڭ ادىلەتتى بولىپ تۇر ما؟ ويتكەنى ءبىز اق پەن قارانى اجىراتۋدان كەتكەنبىز، سەبەبى قۇلمىز.. قۇل ءوزىن سويسا دا، وزگەنىڭ تابانىن ءسۇيىپ ءوتۋدى ادىلەت دەپ بىلەدى... نەگىزى ءان ايتقان ءانشى مەن جىر وقىعان اقىننىڭ جۇرەگى نازىك، سونداي كەزدە بىرەۋ قارسى ءسوز ايتسا، سول جەردەگى ورىنداۋشى پيسيحولوگيالىق جاقتان قىسىمعا تاپ بولادى.. دەمەك ناق مايداندا نە بولعانىن تولىق بىلمەي عايباتتاپ، اۋىر سوزدەر ايتۋىمىز وبال..

تورەعالي قازاقى بولمىستاعى، ۇلتتىق كىلتى بويىندا ساقتالعان ازامات. ودانشا جاستاردى ازدىرىپ بارا جاتقان، جالاڭاشتانا باستاعان ارتىستەردىڭ ارەكەتىن سىناڭىزدار. تورەعالي مەن قايرات نۇرتاستى سىناي بەرۋ ادەتكە اينالىپ بارا جاتىر.. ادامداردىڭ جاقسىلىعىن كورۋگە تىرىسايىق.

سەرىك بوقان 

Abai.kz