الماتىداعى رەسەي باس كونسۋلدىعى الدىندا رەسەيدەگى پرەزيدەنتى سايلاۋىنا داۋىس بەرۋ ءۇشىن تاڭەرتەڭنەن باستاپ ۇزىن-سونار كەزەك پايدا بولدى، - دەپ حابارلايدى اباي-اقپارات Zakon.kz باسىلىمىنا سىلتەمە جاساپ.

مۇنداي كوپ ادام جينالعان جاعدايات ەلىمىزدەگى ەشقانداي سايلاۋدا بولعان ەمەس. پۋتينگە داۋىس بەرۋگە اسىققان جۇرت شىنىمەن رەسەي ازاماتتارى ما، جوق الدە ولاردىڭ قازاقستان سايلاۋلارىنا دا قاتىسۋعا قۇقىلارى بار ما؟ قازاقستاندا قوس ازاماتتىققا شەكتەۋ قويىلعان. بىراق، كەشەگى الماتىدا ءپۋتيندى سايلاماققا انتالاعان حالىقتىڭ كوپتىگى ءبىزدىڭ سانامىزعا ۇرەيلى كۇدىك ۇيالاتىپ كەتتى.

رەسەيدەگى سايلاۋدا سايلاۋشىلاردىڭ 50 پايىزعا جۋىعى عانا داۋىس بەرۋگە كەلگەن. ال، قازاقستانداعى جاعداي مىنانداي...

راس. قازاقستاندا بيپاتريدتەردىڭ (قوس ازاماتتىعى بارلار) كوبەيۋىنە رەسەي تاراپى دا «قوماقتى» ۇلەس قوسىپ جاتىر. عالامتور بەتتەرىن اشساڭىز «قازاقستان ازاماتى رەسەي ازاماتتىعىن قالاي الادى؟» دەگەن سەكىلدى تالقىلاۋلاردان اياق الىپ ءجۇرۋ مۇمكىن ەمەس. ەڭ سوراقىسى سول، قازىر زاڭدىق تۇرعىدا قازاقستان شەكاراسىنان شىقپاي-اق رەسەي ازاماتتىعىن الۋعا بولادى ەكەن. ونى رەسەيدىڭ قازاقستانداعى ەلشىلىگى جۇزەگە اسىرادى. جارناماسىنا قاراساڭىز، جاعاڭىزدى ۇستايسىز. وندا ازاماتتىقتىڭ قۇجاتتارىن رەسەيدە گورى، قازاقستاندا راسىمدەۋ جىلدام، ءارى ءتيىمدى ەكەنى جازىلعان. تالاپتارى دا قىزىق... ەگەر دە ءسىزدىڭ اكەڭىز نەمەسە شەشەڭىز رەسەي ازاماتى بولسا، 2002 جىلدىڭ 1 شىلدەسىنەن كەيىن رەسەيدەگى ارناۋلى نەمەسە جوو-دا وقىساڭىز، كەزىندە كسرو ازاماتى بولىپ، قازىر ەشبىر ەلدىڭ ازاماتىعىن الماعان بولساڭىز رەسەيدىڭ ەلشىلىگىنە باراسىز دا، قىزىل تولقۇجاتتى جان قالتاڭىزعا باسىپ شىعاسىز. بۇل نەنى بىلدىرەدى؟ ەلىمىزدەگى كەز-كەلگەن ادام رەسەي مەملەكەتىنىڭ ازاماتى بولا الادى دەگەن ءسوز. ا، ايتپاقشى رەسەي ازاماتتىعىن العىڭىز كەلسە، ورىس تىلىنەن سىناق تاپسىرۋعا مىندەتتىسىز. ول سىناقتىڭ ءوزىن قازاقستانداعى «زنانيە» قوعامدىق قورى وكىلدەرى قابىلدايدى.

مىنە، كەشەگى سايلاۋ تاعى ءبىر شىندىقتىڭ بەتىن اشقانداي. قازاقستاندا رەسەي ازاماتتىعىن الىپ العاندار تىم كوپ ەكەنى بەلگىلى بولدى. ياعني، ولار ەكى جاقتان زەينەتاقى، الەۋمەتتىك كومەك الىپ وتىر دەگەن ءسوز.

رەسەيدەگى سايلاۋعا قازاقستان اۋماعىنان 17 قالادا سايلاۋ ۋچاسكەلەرى قۇرىلىپتى. ول قالالار: استانا، اقتاۋ، اقتوبە، الماتى، اتىراۋ، قاراعاندى، كوكشەتاۋ، قوستاناي، پاۆلودار، پەتروپاۆل، پريوزەرسك، سەمەي، تالدىقورعان، تاراز، ورال، وسكەمەن، شىمكەنت. ءبىر-ەكى قالا بولسا جارايدى، وزگە ءبىر ەلدىڭ اۋماعىندا 17 سايلاۋ ۋچاسكەسىن قۇرۋ دەگەن ءسوز تاۋەلسىزدىككە قاۋىپ ءتوندىرۋدى بىلدىرمەي مە؟

ءسىز نە دەيسىز؟

قانات بىرلىكۇلى

Abai.kz