قۇرمەتتى نۇرسۇلتان ءابىشۇلى!

بارشا ەل-جۇرت سەنىپ وتىرعان سەنات دەپۋتاتتارى قازاقستان حالقىنىڭ مۇددەسىنە قايشى كەلەتىن «جەر زاڭى» جوباسىن ءبىراۋىزدان ماقۇلداپ جىبەردى. قر پارلامەنتىنىڭ ءماجىلىس جانە سەنات دەپۋتاتتارى «جەر زاڭى» جوباسىنا وزگەرىس ەنگىزۋ تۋرالى حالىقتىڭ ۇسىنىس-تالاپتارىن ەش ەسكەرمەدى جانە قابىلدامادى.

سەنات پەن ءماجىلىس ماقۇلداعان «جەر زاڭى» جوباسى بولاشاقتا ەلىمىزدىڭ ىشكى تۇتاستىعىنا، مەملەكەتىمىز بەن ەكولوگيامىزدىڭ قاۋىپسىزدىگىنە جانە تاتۋ-ءتاتتى ءومىر ءسۇرىپ وتىرعان قازاقستان حالقىنىڭ بىرلىگىنە، ۇرپاعىمىزدىڭ بولاشاعىنا ۇلكەن قاۋىپ-قاتەر توندىرەدى دەپ قاتتى الاڭدايمىز! ءسوزىمىز ناقتى، دالەلدى بولۋى ءۇشىن قازىرگى تاڭدا قولدانىستاعى قازاقستان رەسپۋبليكاسى جەر كودەكسىنىڭ زاڭدىق كۇشى بار باپتارىنا سۇيەنىپ وتىرمىز.

بىرىنشىدەن،  جەر زاڭى جوباسىنىڭ 23-بابىندا «قر شەكارالىق ايماقتا ورنالاسقان جەرلەر  شەتەلدىكتەرگە، ازاماتتىعى جوق ادامدارعا جانە ولارمەن نەكەدە وتىرعان قازاقستان ازاماتتارىنا بەرىلمەيدى» دەپ جازىلعان. ەندى زەر سالىپ قاراساق, بۇل باپتا تەك شەكارا اينالاسىنداعى  جەرلەر عانا شەتەلدىكتەرگە بەرىلمەيدى دەلىنگەن.

بۇل باپ قازاقستاندىقتاردىڭ مۇددەسىنە وتە قايشى، ەڭ ءالسىز تۇسى بولسا، مينيسترلەر مەن اكىمدەر جانە باسشىلار ءۇشىن بولاشاقتا وتە ۇتىمدى، وتە ءتيىمدى، وتە پايدالى بولماق. سەبەبى، اككى اكىم-باسشىلار وسى باپتىڭ ءالسىز تۇسىن شەبەر پايدالانىپ، وسى باپتى نەگىزگە الىپ موراتوري بىتكەننەن سوڭ، ياعني 2021 جىلدان كەيىن شەكارادان تىس ايماق پەن وڭىرلەردەگى جەرلەردى شەتەلدىكتەرگە، ازاماتتىعى جوق ادامدارعا 25 جىلعا جالعا بەرە الادى.

ەكىنشىدەن، قازىرگى جەر كودەكسىنىڭ 24-بابىندا اۋىل شارۋاشىلىعى ماقساتىنداعى جەرلەر شەتەلدىكتەرگە، ازاماتتىعى جوق ادامدارعا جانە  شەتەلدىك زاڭدى تۇلعالارعا جيىرما بەس جىلعا دەيىن جالعا بەرىلەتىنى تايعا تاڭبا باسقانداي ەتىپ ناقتىلانىپ جازىلعان. الايدا، 24-باپقا ۋاقىتشا 5 جىلعا ءسىزدىڭ جارلىعىڭىزبەن موراتوري جاريالاندى.  دەسەك تە، بۇل باپتىڭ زاڭدىق كۇشى مۇلدە جويىلمادى، تەك 2021 جىلدىڭ 31 جەلتوقسانىنا دەيىن ۋاقىتشا عانا توقتاتىلدى. ياعني، 2021 جىلدان كەيىن 24 - باپقا سۇيەنىپ، مەملەكەتتىك شەكارادان تىس ايماق پەن وڭىرلەردەگى جەرلەر شەتەلدىكتەرگە، ازاماتتىعى جوق ادامدارعا، ياعني الەمنىڭ اسا قاۋىپتى قىلمىسكەرلەرى مەن قانىشەر قاراقشىلارىنا 25 جىلعا جالعا بەرىلە باستايدى. ال ازاماتتىعى جوق ادامدار - وتانى جوق  قاڭعىباستار جانە وتاندارىن ساتىپ وزگە ەلدەن قاشىپ، ءبىزدىڭ ەلگە تىعىلعان اسا قاۋىپتى، وتە قاتىگەز قىلمىسكەرلەر (باۋكەسپە قاراقشى نەمەسە ەكسترەميست-تەرروريست ت.ب.) جەرىمزگە كىرەتىنىن وتە جاقسى بىلەمىز.

ۇشىنشىدەن، جەر كودەكسىنىنىڭ  6-بابىندا: «شەتەلدiكتەر، ازاماتتىعى جوق ادامدار جەر قۇقىعى قاتىناستارىندا قازاقستان رەسپۋبليكاسىنىڭ ازاماتتارىمەن  تەڭ  قۇقىلى» دەپ انىق جازىلعان.  قازاقتا «جات جۇرتتى تورگە شىعارما» دەگەن دانا ءسوز بار? نە ءۇشىن ولار ءبىزدىڭ تورىمىزگە شىعىپ،  جەر قاتىناسىندا قازاقستان حالقىمەن تەڭ دارەجەلى قۇقىققا يە بولۋ  كەرەك؟! ەلىمىزگە  كولدەنەڭ كەلگەن  كوك اتتىلار – شەتەلدىكتەر جانە ءوز وتاندارىن ساتىپ، ءوز ەلدەرىنەن قاشىپ  كەلگەن اسا قاۋىپتى قىلمىسكەرلەر مەن باۋكەسپە قاراقشىلار ءبىزدىڭ ەلىمىزگە تايراڭداپ كەلىپ، قازاقستان رەسپۋبليكاسىنىڭ ازاماتتارىمەن نە سەبەپتى، نە ءۇشىن  تەڭ قۇقىلى بولۋ كەرەك؟!

قۇرمەتتى نۇرسۇلتان ءابىشۇلى!

اتا-بابامىز جاندارىن قيىپ، قاندارىن توگىپ قورعاپ،  ۇرپاقتارى - بىزگە ميراس ەتىپ قالدىرعان جەرىمىزدى شەتەلدىكتەرگە جانە الەمنىڭ قىلمىسكەرلەرى مەن قاراقشىلارىنا جەرىمىزدى 25 جىلعا جالعا بەرىپ، اتا جۇرتىمىزدى تاپتاتىپ، اتا-بابا ارۋاقتارىن قورلاتامىز با؟! اكەلەرىنەن قالعان جەكە دۇنيەدەي ءماجىلىستىڭ 107 جانە سەناتتىڭ 47 دەپۋتاتى 18 ميلليون حالىقتىڭ بولاشاعىن، جەر تاعدىرىن وزدەرى شەشپەك پە؟ الدە ۇلان-عاسىر بايتاق جەردى تەك سولاردىڭ عانا اتا-بابالارى قورعاپ قالىپ پا؟

قۇرمەتتى پرەزيدەنت مىرزا!

ءسىز قازاقستان رەسپۋبليكاسى كونستيتۋتسياسى مەن زاڭدارىنىڭ  كەپىلى رەتىندە، قازاقستان حالقىنىڭ مۇددەسىنە قايشى كەلەتىن «جەر زاڭى» جوباسىن بەكىتپەي كەرى قايتارۋىڭىزدى سۇرايمىز!  قر كونستيتۋتسياسىنىڭ 3 -بابىندا «مەملەكەتتىك بيلىكتىڭ بىردەن-ءبىر باستاۋى – حالىق» دەپ كورسەتىلگەن بولسا، ءوزىمىزدىڭ كونستيتۋتسيالىق قۇقىعىمىزدى پايدالانا وتىرىپ، ءماجىلىس پەن سەنات دەپۋتاتتارى ماقۇلداعان «جەر زاڭى» جوباسىنا ەش كەلىسپەي، ءوزىمىزدىڭ اشىق نارازىلىعىمىزدى ءبىلدىرىپ،  ەل-جۇرتتى قاتتى الاڭداتىپ، قوعامدا  ۇلكەن رەزونانس تۋعىزىپ وتىرعان  تومەندەگى باپتارعا حالىقتىڭ ۇسىنىس-تالابىن ەنگىزۋدى تالاپ ەتەمىز!

1.قر جەر كودەكسىنىڭ 24-بابىنا: «اۋىل شارۋاشىلىعى ماقساتىنداعى جەر ۋچاسكەلەرى شەتەلدىكتەرگە، ازاماتتىعى جوق ادامدارعا جانە ولارمەن ارالاس نەكەدە وتىرعان قازاقستان ازاماتتارى مەن ازاماتشالارىنا، سونداي-اق شەتەلدىكتەر جانە جارعىلىق قورىندا شەتەلدىكتەردىڭ 1 پايىز ۇلەسى بولسا دا جەر ساتىلمايدى جانە جالعا بەرىلمەيدى»

2.جەر كودەكسىنىنىڭ 6-بابىنا: «شەتەلدiكتەر، ازاماتتىعى جوق ادامدار جانە ولارمەن ارالاس نەكەدە وتىرعان قازاقستان ازاماتتارى مەن ازاماتشالارى، سونداي-اق شەتەلدiك زاڭدى تۇلعالار اۋىل شارۋاشىلىعى ماقساتىنداعى جەر قۇقىعى قاتىناستارىن  ەش پايدالانا المايدى».

3.«جەر زاڭى» جوباسىنىڭ 23-بابىنا: «قر شەكارالىق ايماعىندا ورنالاسقان جانە قازاقستاننىڭ بارلىق تۇتاس اۋماعىندا ورنالاسقان جەرلەر شەتەلدىكتەرگە، ازاماتتىعى جوق ادامدارعا جانە  ولارمەن ارالاس نەكەدە وتىرعان قازاقستان ازاماتتارى مەن ازاماتشالارىنا بەرىلمەيدى».

تالعات قاتاۋوۆ،

بقو تاۋەلسىز كاسىپوداق ۇيىمىنىڭ توراعاسى، قوعام بەلسەندىسى

ورال قالاسى تەل. 87753161671

بۇل ۇندەۋگە قول قويۋ جالعاسادى

Abai.kz