دۇيسەنبى, 25 ماۋسىم 2018
4408 7 پىكىر 11 ماۋسىم, 2018 ساعات 10:56

ەلباسى قازاقستاننىڭ مەملەكەتتىك قارىزى كوپ دەيتىندەرگە جاۋاپ بەردى

قازاقستاننىڭ مەملەكەتتىك قارىزى الەم بويىنشا ەڭ تومەن. بۇل تۋرالى بۇگىن قىتايعا مەملەكەتتىك ساپارىن قورىتىندىلاپ، قازاقستاندىق باق وكىلدەرىنە سۇحبات بەرگەن قر پرەزيدەنتى نۇرسۇلتان نازارباەۆ ايتتى، دەپ حابارلايدى قازاقپارات تىلشىسى.

«بۇكىل الەم بويىنشا ءبىزدىڭ مەملەكەتتىك قارىزىمىز ەڭ تومەن. امەريكالىقتاردىڭ قارىزى 14 ترلن دوللارعا تەڭ. بۇل ىشكى جالپى ونىمنەن دە جوعارى. گەرمانيا قارىزى جالپى ىشكى ءونىمنىڭ 90, يتاليادا – 120, يسپانيادا 100 پايىزدى قۇرايدى. ال ءبىزدىڭ قارىزىمىز نە ءبارى 13 ملرد دوللار عانا. ياعني، جالپى ىشكى ءونىمنىڭ 10 پايىزىنان دا تومەن»، – دەدى نۇرسۇلتان نازارباەۆ.

وسى ورايدا مەملەكەت باسشىسى ەلىمىزدىڭ مەملەكەتتىك قارىزى ۇلعايىپ كەتپەۋىن ۇنەمى ءجىتى قاداعالاپ وتىراتىندىعىن ايتتى.

«ال بۇلار (قىتايلىق كومپانيالارمەن بىرلەسكەن جوبالار) مەنىڭ ۋاعدالاستىعىمنىڭ، جاقسى قارىم-قاتىناسىمنىڭ ارقاسىندا ورىن الىپ جاتىر. بيزنەسمەندەرگە جاقسى جول اشىپ بەرىپ وتىرمىن. ولارعا سەنەدى، ويتكەنى مەملەكەتكە سەنىم ارتادى. بۇل جوبالاردىڭ بارلىعى دا كوممەرتسيالىق، بيزنەس توپتاردىڭ اراسىندا جۇزەگە اسىرىلادى»، – دەدى ەلباسى.

نۇرسۇلتان نازارباەۆ استانادا جەڭىل رەلستى ترامۆاي جوباسىنا عانا الىناتىن قارىز مەملەكەتتىكى ەكەندىگىن اشىق ايتتى. «بۇل جەر ۇستىندەگى مەترو دەسەك تە بولادى. مۇنى سالۋ مەملەكەتتىڭ مىندەتتەمەسى. ويتكەنى، ينفراقۇرىلىمىن سالىپ، تەنيكاسىن ەشكىم ساتىپ الا المايدى. ينفراقۇرىلىمدى مەملەكەت سالۋى ءتيىس»، – دەدى قر پرەزيدەنتى.

Abai.kz

7 پىكىر