دۇيسەنبى, 25 ماۋسىم 2018
1005 0 پىكىر 14 ماۋسىم, 2018 ساعات 12:12

ماكەدونيا پرەزيدەنتى ەلدىڭ اتاۋىن وزگەرتۋ جونىندەگى كەلىسىمگە قول قويمادى

ماكەدونيا پرەزيدەنتى گيورگە يۆانوۆ ەلدىڭ اتاۋىن وزگەرتۋ جونىندە گرەتسيامەن كەلىسىمگە قول قويمايمىن دەپ مالىمدەدى. ونىڭ پىكىرىنشە، بۇل ەل كونستيتۋتسياسىنا قايشى.

يۆانوۆ ءوزىنىڭ بۇل ۇستانىمى ءۇزىلدى-كەسىلدى ەكەنىن مالىمدەدى. ول ەشقانداي قىسىمعا، بوپسالاۋعا نە قوقان-لوقىعا ءتۇسىپ قالمايتىنىن ايتادى. "مەن مۇنداي قيراتۋشى كەلىسىمدى قولدامايمىن دا، قول قويمايمىن دا", – دەدى پرەزيدەنت. ول ناتو-عا نە ەۋروپالىق وداققا كىرۋ ءۇشىن مەملەكەتتىڭ اتاۋىن وزگەرتۋ ساۋدانىڭ باستى تالابى ەمەس دەپ اتاپ ءوتتى.

وسىعان دەيىن ماكەدونيا مەن گرەكيا بۇرىنعى يۋگوسلاۆيالىق رەسپۋبليكانىڭ اتاۋىنا قاتىستى 27 جىلعا سوزىلعان داۋدا كەلىسىمگە كەلگەنى ايتىلعان. ماكەدونيا پرەمەر-ءمينيسترى زوران زاەۆ 12 ماۋسىمدا افينا مەن سكوپە سولتۇستىك ماكەدونيا دەگەن اتاۋعا كەلىستى دەگەن. "ەندى ارتقا جول جوق", – دەپ مالىمدەگەن گرەكيا پرەمەر-ءمينيسترى الەكسيس تسيپراس ءباسپاسوز ءماسليحاتى كەزىندە.

زاەۆ بۇل كەلىسىم ماكەدونيالىقتاردىڭ ەتنيكالىق جانە مادەني يدەنتيفيكاتسياسىن ساقتاپ قالادى دەگەن. ال گرەكيا پرەمەر-ءمينيسترى ماكەدونيا مەملەكەتىنىڭ جاڭا اتاۋى ۇلتتىق جانە حالىقارالىق قۇجاتتاردا كورىنىس تابادى دەگەن بولاتىن.

Abai.kz

0 پىكىر