جۋىردا «Abai.kz» اقپاراتتىق پورتالىندا الماتى وبلىسىنا قاراستى شەلەك اۋىلىندا تۇراتىن، اسىراۋشىسىز قالعان قوس قاريا مەن قوس ءبۇلدىرشىننىڭ تاعدىرى جايلى ماقالا جاريا بولدى.

95 جاستاعى سىلقىمباي اتا مەن 87 جاسقا كەلگەن شاكەن اپانىڭ قولىنداعى قولعاناتى، كەلىنى كەرىمحان نامازحانقىزى قايتىس بولىپ، ونىڭ قوس ءبۇلدىرشىنى مەن قوس قاريا قامقورشىسىز قالعان ەدى. ال، سىلقىمباي قاريا مەن شاكەن اجەنىڭ ۇلى ءالي مەن ۇلكەن نەمەرەسى قاينار قازىر قىتايدا. بىلتىر بۇل وتباسى قازاقستانعا ءبىرجولا كوشىپ كەلگەن. كەيىن، قىتايداعى ءۇي-جايىن ساتىپ كەلمەك بولىپ، ەكى ازامات شەكارا اسادى. سويتكەندە، قىتاي پوليتسياسى بۇلاردىڭ قۇجاتتارىن الىپ قويىپتى. سودان بەرى، مىنە 8 ايدان اسىپتى،  قىتايدىڭ جەرگىلىكتى بيلىگى ءالي مەن ونىڭ ۇلكەن ۇلى قايناردى جىبەرمەي وتىرعان كورىنەدى.

مارقۇم  كەرىمحان نامازحانقىزىن جەرلەۋ راسىمىنە ءبىز دە بارىپ كەلدىك. قايعىنىڭ باتپان جۇگىن ارقالاعان اعايىنعا باسۋ ايتىپ، قوس قاريا  مەن مەكتەپ جاسىنداعى بالاقايلاردىڭ كوز جاسىن كورىپ قابىرعامىز قايىستى. ول وقيعانىڭ ءمان-جايىن وتكەندە ەگجەي-تەگجەيلى جازدىق. وقىپ، تانىسامىن دەگەن جۇرتقا، مىنە سىلتەمە: https://abai.kz/post/72052

«Abai.kz» اقپاراتتىق پورتالى ماقالانى قازاقستاننىڭ سىرتقى ىستەر مينيسترلىگىنە نازارىنا ۇسىنىپ، كومەك سۇرادى. سايتىمىزدا جاريا بولعان ماقالاعا قاتىستى قر ءسىم مەن الماتى وبلىسى اكىمدىگى ءۇن قوسىپ، كومەك قولىن سوزىپ جاتىر ەكەن. بۇگىن وسى جايلى جازباقپىز.

اتالعان ماقالا قايرات ءابدىراحمانوۆ تىزگىنىن ۇستاپ وتىرعان  سىرتقى ىستەر مينيسترلىگىنىڭ قۇلاعىنا جەتىپتى. مينيسترلىكتىڭ ءباسپاسوز قىزمەتى كەزەك كۇتتىرمەستەن مينيسترلىككە، مينيستر قايرات قۇدايبەرگەنۇلىنىڭ اتىنا رەسمي حات جازۋىمىزدى سۇرادى. قوس قاريا مەن قوس بالاپاننىڭ تالاپ-تىلەكتەرىن جازباشا ارىز تۇرىندە مينيسترلىككە وتكىزۋىمىزدى سۇرادى. قازىر حاتتىڭ مازمۇنى ازىرلەنىپ جاتىر.

ايتا كەتەيىك، وسى ارالىقتا الماتى وبلىستىق اكىمدىگىنەن گۇلباقىت قاسەن حابارلاسىپ، شەلەكتەگى قاريالاردىڭ جاعدايىنا قاتىستى اكىمدىك تاراپىنان جەرگىلىكتى باسشىلارعا نۇسقاۋ بەرىلگەندىگىن حابارلادى.

«Abai.kz» اقپاراتتىق پورتالىنىڭ كونتەنت-رەداكتورى، ياعني وسى جولداردىڭ اۆتورى نۇرگەلدى ابدىعانيۇلىنا ەڭبەكشىقازاق اۋدانىنان بىرنەشە ازامات حابارلاستى. اتاپ ايتساق، ەڭبەكشىقازاق اۋداندىق ءماسليحاتىنىڭ حاتشىسى بەكەت تولەگەنۇلى احمەتوۆ، اكىمدىك اپپاراتىنىڭ باسشىسى بەكەن ورىنبەكۇلى كەرىمبەكوۆ، اۋداندىق ىشكى ساياسات باسقارماسىنىڭ باسشىسى مومىنجان يسلاموۆ مىرزالار حابارلاسىپ، شەلەكتەگى قوس قاريا  مەن مەكتەپ جاسىنداعى قوس بالاپانعا الەۋمەتتىك جاردەم ۇسىنعانىن ايتتى. ولار الداعى ۋاقىتتا بۇل وتباسىنىڭ قۇجاتتارىن راسىمدەۋگە كۇش سالاتىنىن ايتتى.

مومىنجان يسلاموۆ، ەڭبەكشىقازاق اۋداندىق ىشكى ساياسات باسقارماسىنىڭ باسشىسى:

-ءبىز سايتتاعى ماقالانى وقىپ، بۇل كىسىلەردىڭ جاعدايىن ەستىپ-بىلدىك. شەلەك اۋىلىنىڭ اكىمىنە دەرەۋ حابارلاسىپ، قوس قارياعا كومەك كورسەتۋدى تاپسىردىق. كەشەلى-بەرى شەلەك اۋىلىنىڭ اكىمى ەسەنعالي ەسەنحانۇلى ەسەنحانوۆ سىلقىمباي اتانىڭ ۇيىندە ءجۇر.

بيۋدجەتتەن شتات ءبولىپ، قوس قاريا مەن قوس بالانىڭ تاماعىن ازىرلەپ، كيىم-كەشەگىن جۋىپ، ءۇيىن تازالاپ وتىراتىن الەۋمەتتىك كۇتۋشى بولدىك. ول كانىگى رەسمي جالاقى الىپ وتىراتىن الەۋمەتتىك قىزمەتكەر.

سوسىن مارقۇمنىڭ قىرقى وتكەنشە كەلىمدى-كەتىمدى كىسىلەرى بار. جاڭاعى قىزمەتكەر سول جەردە بولادى. جەرگىلىكتى اكىمدىك ازىق-تۇلىك، ۇن-مايىن تۇگەل الىپ بەردى.

سوسىن ەڭبەكشى قازاق اۋداندىق كوشى-قون پوليتسياسىنا دا جاعدايدى ايتىپ تۇسىندىردىك. قوس قاريا مەن ەكى بالانىڭ قۇجاتتارىن رەتتەۋگە ولار دا كومەكتەسەدى. ءبىز بۇل ءىستى ءوز باقۋىلاۋىمىزدا ۇستايمىز. كەرەك-جاراقتارىمەن تولىق قامتاماسىز ەتەمىز.

نۇرگەلدى ابدىعانيۇلى

Abai.kz