دۇيسەنبى, 22 ءساۋىر 2019
قىلمىس 1595 9 پىكىر 20 شىلدە, 2018 ساعات 20:50

دەنيس تەننىڭ قازاسىنا قاتىسى بار دەلىنگەن ەكىنشى كۇدىكتى ۇستالدى

وليمپيادا جۇلدەگەرى دەنيس تەننىڭ ولىمىنە قاتىسى بار بولۋى مۇمكىن ەكىنشى كۇدىكتى ارمان قۇدايبەرگەنوۆ ۇستالدى. بۇل تۋرالى الماتى قالالىق ءىىد ارنايى بريفينگ وتكىزىپ، حابارلادى. 

«2018 جىلى 20-شىلدەدە دەنيس تەننىڭ ولىمىنە قاتىسى بولۋى مۇمكىن دەگەن كۇدىكپەن 1994 جىلى تۋعان قىزىلوردا وبلىسى قارماقشى اۋدانى،  اقاي اۋىلىنىڭ تۋماسى قۇدايبەرگەنوۆ ارمان بورىباەۆيچ ۇستالدى. قازىر ول ءوزىنىڭ قىلمىس جاساعانىن جانە دەنيس تەنگە ەكى جەرىنەن پىشاق سالعانىن مويىندادى. كۇدىكتى اقساي 2 شاعىن اۋدانىنان كوشەدەن ۇستالدى. بۇلار وزدەرىنە اقشا كەرەك بولعان سوڭ، وسى قادامعا بارعان»، - دەدى الماتى قالالىق ءىىد-ءنىڭ باسشىسى سەرىك كۇدەباەۆ.

پوليتسيانىڭ ايتۋىنشا،  ەكەۋى دە بۇرىن ءىستى بولعان.

"ەكەۋى دە ىستەگەن ءىسىن موينىنا الدى. ولار دەنيس تەندى ءولتىرىپ العانىن كەيىن الەۋمەتتىك جەلىدەن ءبىر-اق بىلگەن", - دەدى ول.

ايتا كەتسەك، قازاقستاندىق مانەرلەپ سىرعاناۋشى دەنيس تەن 19 شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19 شىلدەدە كۇنى تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنان جاراقات الدى. 25 جاستاعى تەن ۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. بىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن. 2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى. ادام ءولتىرۋ بابىمەن قىلمىستىق ءىس قوزعالدى.بۇگىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.سونداي-اق،  دەنيس تەننىڭ ولىمىنە كۇدىكتى نۇرالى قياسوۆ كۇزەتپەن المالى اۋداندىق سوتىنا جەتكىزىلگەن. الدىن الا تاراتىلعان اقپارات بويىنشا دەنيس تەننىڭ ولىمىنە قاتىستى كۇدىكتى ەكىنشى ادام - ارمان قۇدايبەرگەنوۆ تە ۇستالدى.

Abai.kz

9 پىكىر