"الماتىداعى جاعدايدى قالىپقا كەلتىرۋ ءۇشىن بارىنشا جاعداي جاسالىپ جاتىر. پوليتسيا وقيعا ورنىنا دەر كەزىندە شىققان. مەن بۇل جەردە قىلمىستى قالاي اشقانىمىز تۋرالى ايتىپ وتىرمىن. قىلمىس ساعات 14:56-دا بولسا، كەشكى ساعات 23:30-تە كۇدىكتىلەردىڭ ءبىرىن ۇستادىق" دەدى مينيستر رەسەي ىشكى ىستەر مينيسترلىگى وكىلدەرىمەن وتكەن بريفينگ بارىسىندا.

قاسىموۆتىڭ ايتۋىنشا، ءبىرىنشى كۇدىكتى ارقىلى پوليتسيا ەكىنشىسىن ۇستاعان. ءۇشىنشى كۇدىكتى جانار تولىباەۆا قالادان كوشىپ كەتپەك بولعاندىقتان ونى ۇستاۋ قيىندىق تۋعىزعان. سول ءۇشىن اقساي اۋدانىندا ۇلتتىق گۆارديا ارنايى وپەراتسيا ۇيىمداستىرعان. قازىر كۇدىكتىلەردەن جاۋاپ الىنىپ، ساراپتامالار جاسالىپ جاتىر.

سپورتشى ولىمىنەن 20 كۇن وتكەن سوڭ قىلمىسقا قاتىستى العاش رەت پىكىر بىلدىرگەن مينيستر ءۇش كۇدىكتىنىڭ دە الماتىعا باسقا ايماقتاردان كەلگەنىن ايتتى.

"ەكەۋى - جامبىل، ال تاعى ءبىرى - قىزىلوردا وبلىسىنان كەلگەن. ءۇشىنشى كۇدىكتى ايەل الماتىعا داياشى بولىپ جۇمىس ىستەمەك بولعان. ۇستالعان ەكى جىگىت كولىكتەردىڭ ايناسىن ۇرلاۋمەن اينالىسقان" دەدى قاسىموۆ.

جيىن بارىسىندا مينيستر دەنيس تەننىڭ وتباسىمەن كەزدەسكەنىن ايتتى.

19 شىلدەدە الماتىدا قازاقستاندىق مانەرلەپ سىرعاناۋشى، سوچي وليمپياداسىنىڭ قولا جۇلدەگەرى، ازيا ويىندارىنىڭ چەمپيونى دەنيس تەن پىشاق جاراقاتىنان اۋرۋحانادا قازا تاپقان. سپورتشى قالا ورتالىعىندا كولىگىنىڭ جانىندا الدەكىمدەر سالعان پىشاق جاراقاتىنان اۋرۋحاناعا جەتكىزىلگەن سوڭ قايتىس بولعان.

دەنيس تەننىڭ قازاسىنا كۇدىكتى رەتىندە 23 جاستاعى ارمان قۇدايبەرگەنوۆ پەن 1994 جىلى تۋعان نۇرالى قياسوۆ ۇستالعانى بەلگىلى بولعان.

سپورتشىنىڭ قازاسىنان كەيىن قازاقستاندىقتار مينيستر قاسىموۆتىڭ وتستاۆكاعا كەتۋىن تالاپ ەتكەن.

Abai.kz