مينيسترلىكتىڭ حابارلاۋىنشا، 2017 جىلى قابىلدانىپ، 2018 جىلى 9 قاڭتاردا كۇشىنە ەنگەن "تەلەراديو حابارلارىن تاراتۋ تۋرالى" زاڭعا ەنگىزىلگەن تۇزەتۋلەرگە ساي، شەتەلدىك تەلە جانە راديو ارنالار 9 شىلدەگە دەيىن قازاقستاندا وكىلدىگىن اشۋعا مىندەتتەلگەن.
وسى مەرزىم ارالىعىندا قازاقستاندا تىركەۋگە الىنعان 307 شەتەلدىك تەلە جانە راديو ارنانىڭ 219-ى ءوز وكىلدىگىن اشقان، 88-ءى تالاپتى ورىنداماعان. وسىعان بايلانىستى 88 ارنانىڭ ەسەپكە قويۋ تۋرالى كۋالىگى قايتارىلىپ الىنعان، ەندى قىزمەتتەرى توقتاتىلماق.
مينيسترلىك سايتىندا جاريالانعان 88 تەلە جانە راديو ارنالارى تىزىمىندە رەسەيلىك Russia Today TV, "دوجد" تەلەارنالارى، ۇلىبريتانيالىق Sky News, امەريكالىق Fox News Channel تەلەارناسى، Bloomberg Television, France 24 ارنالارى بار.
اقپارات جانە كوممۋنيكاتسيا مينيسترلىگى قازاقستاندا حابار تاراتقىسى كەلەتىن شەتەلدىك تەلە جانە راديو ارنالار ەندى قايتا تىركەۋگە تۇرىپ، ءوز وكىلدىگىن اشۋى ءتيىس ەكەنىن ەسكەرتتى.
Abai.kz
